|
|
 Re: بــــــــــوســــــــت..... (Re: محمد ابو القاسم)
|
ابو حميد شقيقى الاصغر00
انادى الليل واقول يا ليل 00
انا المظلوم عزاى دمعه 00
دمعى تسيل وليلى طويل 00
وعايش فى مهب الريح براى شمعه00
• بالجد لمن وصلنى من ناس البيت ولمن كنت بتتكلم معاى براك كنت شايف الحاله كانت صعبه كيف 00
• اطلع بيك ايام تتذكر الالزاميه بمناسبة المرض ده لمن طلعته لجنه طبيه لمرضى (بالكلى والنظر) وزعونا معسكر شمبات كانت الزمان (1997) وكان منالمفروض ان نمتحن قبل هذا التاريخ لكن لان رقم الجلوس لم يطلع قالو شنو قالو سقط سهوا يبقى نحن من دون الناس لماذا ولا هى فترة الاتحاد واعلانا للعداء بصوره واضحه للهؤلاء القوم كانت سبب المهم فاتت فترة الدفاع الشعبى وبقينى اول عزة السودان فى الاول قالو كل زول يمشى واحد من المعسكرات المذكوره (الجيلى –جبل اولياء –المرخيات وووو) والعيان يشيل ورقو الطبى عشان يشوفو ليهو صرفه00 المهم اتفقنا انو نمشىالجيلى عشان الوكت داك اغلب الرفاق ناس امدرمان مشو الجيلى بعدين المرخيات دى قالو موت وكده 00 قعدنا 3 ايام تفاصيلها كالاتى:-
1. جينا محملين فى الباصات كالخراف ووصلنى معسكر الجيلى كان مدرسه داخلية سابقه تم توزيعنا واتلمينا اغلبنا فى السريه التلاته اها اخوك قام دق جرس للرائد شرطه بتاع المعسكر مافى مويه بعد نقاش متزن قال لى اتصرف (العسكريه تصرف) الممهم بلغت الشباب الرائد قال كده يلا الشباب (قدو) السلك ودقشوا الحله الاشترى سجايرو او صاعودو او اشاياء تفهم بالاشاره من مكفيات بعد ما انتهينا قلت ليهم داير استحم (لوووول) نظام الود حنكوش وكده طرقت باب وادونى مويه فى جرد وجنبهم كده (غيط) واستحميت هناك (كوماندوز بس) انتهينا رجعنا والناس نيام 00اتاريهو كانو العساكر مشركين فى كل مكان يتصيدون الذى (قدو) السلك غايتو قلنا كل زول تحمل مسؤليتو ونصرف فى الضلام ده المه انا قايتو ما قبضونى 00لكن الشى ابتذكرو انو دخلت فى مشاده مع العساكر فى شنو ماعارف قوم يا العسكرى سوقنى والشباب واداره داخليه هناك محل نايمين كل عسكرى ماسك ليهو زول وراقد فى سريرو ويتونس معاهو ونحن واقفين (نظام بتسلى) المهم الليل مشى الساعه كم لااعرف قايتو الا يكون هو نعس قال لى امشى وخليت ليك فى لسه ناس واقفين جينا انخمدنا وانتهى اليوم الاول00
2. من الدخش جمعونا قالو دايرين زول يقعد فى الداخلية (الثكنات) يحرس حاجات زملاءهو واى شى يتفقد يكون مسؤل منها ياعم طوالى رفعت ليك يدى ومشيت بقيت متكل واصحابك مدروشين لكن ماقصرته معاكم نضفتها ليكم المحل(قطعته صفق النيم) ورشيتو رتبته الحاجات وجيتو 10دقايق خاشين ياكافى البلا وسختو زى ماكان 00 لى نصت نهار كده قام جمعونا تانى قالو جانا اظنو محافظ الخرطوم (الصادق محمد سالم ) ولا منو مابتزكر قام سال ليك الشباب (الدفعه) ناقصاكم حاجه الشباب صنو ساى ناس الامن طبعا اظن انا ما كنت معاهم قالو مافى زول يفتح خشمو واخوك ماعرف يلا شباب المويه مافى وادك مافى ووو.. قولو حاجه ولا فى زول هبب لى شعرت بانو حابقى زى قصه الزول مع الفيل فى كتاب الانجليزى بتاع المتوسطه الفيهو (دكتور تروته) book 2.3.4.5.6 لحدى (بوك 6) الملك كان فيل وبكسر مزارعهم اها قالو يكلمو بموضوع الفيل ده والملك كان ظالم ومخوف ناس القريه اها اتفقوا يمشوا ليهو يكلمو كل زول يقول كلمه لمن ينتهى الموضوع اها اشجع واحد فيهم اتبرع يفتح الموضوع قام قال ليهو جلالة الملك الفيل بتاعك ..والتفت للتانى عشان يتم الموضوع التانى خاف ..قام املك قال ليهو بى نهره الفيل مالو ..اها صاحبنا عرف انو (حايدقس) لو فتح خشمو بالموضوع ولو ما كمل الموضوع برضو (حايدقس) ..قام اتصرف سريع قال ليهو ياجلالتك نحن جينا هنا عشان الفيل بتاعك شفناهو وحيد ودايرنك تقوم تجيب ليهو فيل تانى ويبقو اسره ..الملك فرحه قال ليهو فكره وقام حياهو وطبق الفكره وبقت الافيال ترعى فى المزراع وزول قادر يفتح خشمو وندمو كيف بعد ما كان فيل واحد بقو مجموعه..(وحجيتكم مابجبتكم خيرا جانا وجاما اكل عشاكم وجرى خلاكم ) انتهت (وفى القصه عبره لى وللاخرين) 00اها لمن مافى زول داير يتكلم معاى عشان نكلم المحافظ بى مشاكنا لانو (فردى ) حردو الاجتماع ده وابو يجو (معارضه داخل معسكرات الجبهه) جيت انا 00ولمن فترته قلت ليهم انا بكره بتجى اللجنه الطبيه وبمرق المشلكه فيكم انتو وطلعته طوالى ولا دقيت رجلى ولا حاجه 00جانى العسكرى جارى ده شنو قلت ليهو انا اساسا عيان واسه راسى لفه وماشايف ماشى ارتاح داير اصل سريع قبال ما اقع هنا اعمل ليكم مشكله مع المحافظ 0طبعا لمن يكون فى مسعول الناس (بتكبكب) عمك حن على وقال لى امشى العنبر ارتاح لمن انا زاتى استغربته 00اها تمخط اللقاء على شنو ماعرف المهم الرفاق اتو 00اها قاعدين كده عندنا واحدة مسلط جدا اسمو (عمر) بنقول ليهو عمر (عمر كبو كل الناس تحبو) او (الامبراطور) العصريه كده قاعدين بى مزاج فاذا بعمر يصرخ ليك فينا (واى واى واى شديد واى كتير) فينا البضحك وفينا المستغرب وعمر يصرخ جادى 00اها التعلمجيه سمعو ليك الصراخ( وجو) جارين ياود مالك وعمر مواصل الصراخ ياود مالك ....00اها اخد ليهو صنه كده والناس مستنيه تعرف عمر مالو فاذا بعمر يقول للتعلميه (الضب) (الضب) جاء مارى جنبى 00 والناس انفقعت بالضحك والتعلمجى ماعرف يقول شنو قام قال ليهو (دينك ودين الزبير ودين الترابى الجابكم لينا هنا مالكم دايرن تجننونا ) وطلع00 ونحن (انفقعنا بالضحك)00 وكان اليوم الثانى انتهى00
3. ده يوم الوداع للمعسكر يا (مركب فيك سنبك) وتقعد يا اتخارجت اها طبعا كلنا بى شهاداتنا الطبيه الا (محمد فاروق) فطبعا كلنا جينا سوى بقت ليهو حاره نمشى نخليهو براهو فقال لينا انا لو ماطلعت معاكم لاداير شهاده لاداير جامعه 00 قلنا ليهو اشمى حاول ناس اللجنه ديل باى طريقه نحن زاتنا مابنخليك 0قام ابوحميد مشى (حنس) ليهو واحد ماعارف اتفق معاهو على شنو قايتو داك قال ليهو تمشى تجيب شهاده مريضه عشان فى لجنه تانيه (محمد فاروق) قال ليهو دى خليها على ومشى المسلط جاب ليهو شهاده قدر الليله وبكره وهو نصيح شديد ولطيح وخش معانا معسكر شمبات....00 كان الوكت بقى ليل قالو لينا اقعدو بكره الصباح 00قلنا ليهم صباح شنو وكلام فارغ شنو ورقنا وعندنا تانى البقعدنا معاكم شنو 00واتوكلنا ركبنا لينا دفار مسطحين ونغنى نغنى لحدى بدايه بحرى قمنا نزلنا خشينا جوه الى تقاطع المؤسسه ومن هناك (اتفرزعنا) كل زول شاف ربو وين نس امدرما فى جه وناس الخرطوم فى جه وناس بحرى فى جه علىاساس نتل بكره نبرمج حنمشى شمبات دى بتين00
*المعسكر (شمبات)00
صراحه كان تطريبه رغم انى ماقعته فيهو كتير لانو بكون محتج لمويه نقيه والمويه هناك بتجى من البحر ومابتفع معاى المهم ادونى اوراقى وقالو(المنسقاتيه) لى لمن(اخوانك) ديل انتهو تعال عشان نوزعك 00طبعا هو المعسكر كان ترطيبه لانو كان داخليات ناس زراعه جامعة الخرطوم والمنطقه ديك ظليله وبعدين الشباب كانو نامين فى سراير (دبل بيت) وحمامات بالدش والشاى الصباح تحت عند ست الشاى والعنو قريشات بوديهم يغسلوهم ويكوهم ليهو واللبس (ترين سوت ) يعنى على كيفك ما كاكى والتمام تحت الشجر والساعه 8 وطبع الشباب بستهبلو يقولو بعد ده تعبانين 00مرات يقولو ليهو اقعدوا مرات ارجع العنبر 00انا زاتى زى الكنت عايش معاهم ماعاطل وهم كلهم هنا كل يوم معاهم (الواحد مرطب اكتر من بتهم) 00لكن كان (مالينهم ) ليك محاضرات ايييييييييييييييك (نظام غسيل مخ وكده) 00
من الطرائف هناك لو تذكر قصة التور الفكاهو (عمر) على ما اعتقد وقلب ليك المعسكر قلب وادكم فيهو اداره داخليه زى السم اليوم داك00 قايتو ناس عزة السودان التانيه اتضرروا كتير مننا لانو معسكرنا ده كلو نصحيين 00فناس عزة السودان الثانيه قالو ليهو العيان زاتو يقعد فى المعسكر لكن مايشتغل 00لكن نحن ماعملو فينا البدع زملانا الودهم المطار والناس نيام والواحد يلقى نفسو قدرام الطياره والسلاح فى راسو وكم فقدنا منهم ياااااااااااااه (ابوحميد) ده براهو بوست تانى00
* التوزيع :-
اغلبهم وزعوهم فى الشرطه انا معاى كم نفر ودونا(ديوان الزكاة ) الفى الحاره التاسعه قال نظام تحصيل عشان كان قريب من بيت ناس جدنا فى الحاره السابعه ومحل بيتنا القديم الحاره التاسعه00
لكن للاسف ما استمريت وحاتك انت عارف ما كنت مرتاح 00الواحد بتمر عليهو حاجات تقطع القلب والكيزان ديل يغيظو كيف 00يعنى يجى المسكين يكون داير دعم يتكلمو معاهو بى طريقه قبيح وسخريه واستهزاء يطلع وحالتو تقطع القلب والواحد يموت هنا بالغيظ 00بقيت اتسيب وفى الاخر قلت اوضح وجة نظرى عديل مشيت لو احد فيهم قلت ليهو انا ماشى لى خالتى فى بورتسودان حاطره لمدة اسبوعين اكون معاها اطفالها صغار وزوجها سافر بجى بعد اسبوع 00قال لى مافى طريقه بديك الخميس وتجى السبت (غايتو جنس فهم) اقول ليك اليوم الاربعاء يعنى اقطع التذكره بتين واسافر بتين انت بورسودان دى مدنى دايره يوم كامل واجيك بتين ثم انى اقول ماشى اقعد مع خالتى زوجها مسافر (استغفرتك يامالك روحى ) علىقول حبوبتنا00
المهم قلت ليهو بتصرف مشيت جيت راجع بتين ماعارف لقيت كل الشباب وزعوهم على مكاتب دواوين الزكاه الودوه السوق الشعبى امدرمان والودهو وين ماعرف 00اها جيت راجع وريتهم خلقتى قالوا يوزعونى امدرمان (دقيت جرس) ياهنا يابلاش 00قالوا هنا لا يا يرجعونى المنسقية تانى 00 قلت ليهم برجع زملانا القاعدين قالو لى اسمع اترجاهم عدى قلت ليهم (ودينى) ما اترجهام كان يودونى (راجا ) زاتا00 ومشيت المنسقيه لقيت لى (بنيه) (رائد) قالت دايره ليها مجندين يشتغلو معاها فى (مركز الاطراف الصناعيه) بالقرب من (المنطقه الصناعية الخرطوم) رفضت قلت ليهم شفو لى محل تانى00 ايو جنس تلتله ومشاكل وناس الامن يدخلوك اوضهم دى (انت داير تعمل مظاهرات واسئله سخيفه)لانو جد اخلاقى وصلت مش نخرتى وصلت نخرت جدى زاتو من امشى وتعال امشى وتعال00 الى ربك فتحها على يوم لقيت لى رائد كده يحرك لى اجرائتى الليها سنه عشان يجدوعنى فى حته تكون قريبه ومريحه اها قايتو اتوكلت كلمتو خشى معاى والملاعين كانو ماشافو خلقتى دى 00بى كل استهبال انت منزومان مفروض تتوزع لى ماقاعد تجى (كيف ماقاعد ..!!؟؟) 00 شافو الدبابير دى تلمع فىالكتوف خلاص اتجننو فينى لو الواحد عارف كده كان جاب الحاج رغم انو عارف ماحيجى معاى مخلينى اكل نيم بس واولاد جيرننا حاجاتهم بتجيهم لحدى عندهم (قليتو مانحسدهم) لكن برضو كويسه تربيه وكده00 اها المنسق قال لى اسمع نوزعك (سلاح الموسيقى ) كيف؟00يامان رضيت طوالى اولا اخوك بحب الموسيقى موت وبعدين زاتو نرتاح من التلتله دى00 وانتهينا من هم كبير ومرحله اخرى فى برنامج الالزاميه00
*سلاح الموسيقى:-
فتره جميله كان كل يوم (مهلشين) ونحضر حفله وحتى الشغل زاتو العساكر قالو ما واثقين فينا حنجوط ليهم شغلهم اها بقينا نجى تمامت عدد بس ولانو نحن ما ادربنا ماعندنا شى وبعدين سلاح الموسيقى سلاح فنى يعنى مافيهو قيود العسكريه الصارمه ديك يعنى تلقى ده بتونس مع مع دى والضابط مع العسكرى مافى قيود شديده خالص على هذا الاساس حيانا كانت حلوه نجى بس المهم تجى (تتمم) ومرات بعد الفطور نمشى نقعد فى (السريه الخامسه) يجى الفنانين ديل (يبرفوا) هناك 00اها مرات من بعد الفطور (كل زول يمشى يشوف ربو وين) 00عدا زملانا الدربو مرات بكونوا سادين 00
اها فىالحال ده وتمام لكن الماهية ال (50الف) كانت بتجينا ناقصه وكل مرة ناقصه اكتر 00يوم جمعونا للماهيه الرائد بتاعنا ماعرف منو التسلط عليهو وراهو انو ابو فى الديش منو ماتعرف كمان ناس الديش يعرفو انو الزول ده ابوه دياشى يوروهو العين الحمراء اها بقى داير يتلتلنى لكن داير يجبها ظريفها بدا ليهو بى كم زول داير يحقوهم (صلعه) عشان مايكون فيها شى لم يجنى لكن قبل الحلاقه قال لى (اجرى) لحدى العمود داك وتعال لمن جيت قال لى يلا ارجع لف عكسو00وجيت قعته للحلاقه 00بس مع اول جره للمكنه وكانت مكنة كهرباء (الكهرباء قطعت) بقى الشعر مقروم من وراء وحاله بقت صعبه امواس مافى 00رسلو صاحبى (مجتبى) عشان يجب موس ابى وانا زاتى رفضت تانى اقعد بس المشكله بقت فى الشعر المقروم ده 00برضو نقول محظوط كنت لابي لى فنيله فيه نظام طاقية (جنس حظ) قتيت ليك راسى والواطه سخانه لكن اسوى شنو 00اها انا ومجتبى قامو دخلونا (الكركون) 00قايتو انا عشان حلقو لى(اطلقوا سراحى ) قبال مجتبى لكن صاحبنا ده بقى قاعد جوه والساعه اتنين جاى انا قايتو انتظرتو وبقيت حارسو الرائد قال لى ما تمشى قلت ليهو ماماشى منتظر صاحبى قال انتظر وانا قعدت انتظر قايتو لمن جات زى 4 كده فكوه ومشينا سوى 00لمن وصلنا المحطه الاوسطى امدرمان مشيت على الشباب البحلقوا بدون دكاكين فى فى احد ازقة السوق وراء المركز العام للحزب الاتحادى وجنب الجامع الكبير فى وسط السوق 00الشباب هنا ماقصرو فطاحله قايتو وزنو الشعر بى طريقه بقت اشبه لى الصلعه 00الراجل هو زاتو ماقصر بدل يشيل شوية شعر نكنتو ليك من جذورو 00قابتو الشاب ماقصر ومشين على كده افترقنا هو ركب مشى يبتهم (ابروف) وانا مشيت (الكليه الحربيه)00 الحادثه دى خليت رصيت لى كلمات فى مجتبى وفى حالنا00
*اسرى
الشمس لم تكن سخية ككل يوم
درجاتها عندى بين الصفر تحت السكون00
والاسباب تاتى دون عتاب
فكم قيثاره ضاع صوتها فى السجون00
الشمس اليوم قل عطؤها
صارت بخيلها فقدت نبض الشجون00
الم تكن لحن عبقريا لذيذ
واليوم تهت بين خطوط الكاكى والكركون00
كم مثلك ضاع ى الصدى
كم مثلك مصير مجهول ترقبه العيون00
ويح نفسى وجدتك الرق
اانهارت عدالة الدنيا اصبها الجنون00
وماذا لحق بنبتة رويتها بدمك
وباى فاس عسكرى مخبول يكون00
فا انا اقف معك بشراينى
اساندك رغم العواصف والظنون00
ستعود للحريه
ومهما مشيت فالطريق يهون00
وستخرج خنجر القرارات
انت وغيرك وكل شخص فى المليون00
اذا انت فى المعركه والنضال
للثوار انت مع النصل المسنون00
لقد دعتك الظروف الارتحال
وسجن القدر قلبه الحنون00
لاتندم لاتتحسر فهى صدفة
وعندها وجدت سيل منون00
ياسر النشاذ فى امواجه
وتعود الشمس بدفئها الحنون0
عدى كم يوم كده كان فى محاضره فى السلاح (سعادة اللواء) جمع السلاح وجابونا نحن المجندين يطرشنا كان فاهمين حاجه المهم جينا0 0فى نهاية المحاضره فتحو باب الاسئله لم نجاء الدور علينا بقلب رجل واحد (فتينا) ليك الرائد بانو بياكل قروشنا كل شهر يقول لينا دفاتر وشنو ماتعرف 00دخلناهو ليك فى اضافرو واللواء فى حينها محبه يحرجو 00قفل على كده بس قبل ما الناس يتوزعو الرائد قال داير كل المجندين يكونوا قاعدين 00وادانا (البيان) التالى نصو00من الان فصاعدا الحضور زى العساكر من الدغش (تمام الصباح) وحتى شايفين زملانكم الجاين فىالباب ديل ما محسوبين فى حضور اليوم فقط الحضرو المحاضره دى00اذا اصلو داير المعامله 00صبحت شمي اليوم التانى وقلنا دغش شنو البنجى فيهو ولا على كده (قرض) 00اها بعد فتره سمعنا بانو رفدوه هو بعض الضباط فى السلاح لانو (سفو) ليهم قريشات00 والله فى00
تانى الواحد بعد داك نزل الجامعه وسافر وجاء وراجع قبل الغربه دى كان فضل ليهو كم شهر مشى اشتغها فى قسم الكمبيوتر فى اذاعة الديش00 واظنو فضل لى كم زى 3 شهور وانتهى او اقل 00
الفتره بتاعت سلاح الموسيقى كانت جميله (الواحد ) يحى الفنان (عمر الشاعر) وشكر كتيرا علىالهدية (عود عراقى تم تسجيل به سهره فى تلفزيون دبى) والفنانين الكانو بهناك بظهروا هناك 00
ده كلها يا ابوحميد ذركرايت بدها مشروع مرضك واخليك تتذكر فيها كل حرف ومشوار ومشوار يا اخى الصغير00
ياما سهرنا ليالى 00
ياحليلك ياغالى 00
دايرك تسلم على ناس البيت والحاجه والاخوات وخالد وتقول ليهم ولدكم بخير وصحه وعافيه وجد مشتاق ليك (ياطير ياطايرمن بعيد فوق الغمام من ربوعى ..احمل الشوق ياحمام) 00
وايضا للذكرى (فى زول بيعمل فى اخوه الكبير كده)00
النضــــــــال00 الــوهم والحقيقــــة??!!!……
---------------------
وتمتد الرؤيا بعد الرؤيا الي الابد
|
|
 
|
|
|
|
|
| العنوان |
الكاتب |
Date |
 بــــــــــوســــــــت..... | معتز تروتسكى | 10-16-04, 00:07 AM |
| Re: بــــــــــوســــــــت..... | samwal ebrahiem | 10-16-04, 00:22 AM |
| Re: بــــــــــوســــــــت..... | معتز تروتسكى | 10-16-04, 06:53 AM |
 Re: بــــــــــوســــــــت..... | معتز تروتسكى | 10-16-04, 00:25 AM |
| Re: بــــــــــوســــــــت..... | عوض الله الفولانى | 10-16-04, 04:10 AM |
| Re: بــــــــــوســــــــت..... | معتز تروتسكى | 10-16-04, 08:55 PM |
| Re: بــــــــــوســــــــت..... | معتز تروتسكى | 10-16-04, 09:10 PM |
| Re: بــــــــــوســــــــت..... | معتز تروتسكى | 10-16-04, 10:42 PM |
| Re: بــــــــــوســــــــت..... | mahdy alamin | 10-16-04, 04:49 AM |
| Re: بــــــــــوســــــــت..... | معتز تروتسكى | 10-16-04, 07:00 AM |
 Re: بــــــــــوســــــــت..... | ناجى الزبير الملك | 10-16-04, 04:07 PM |
| Re: بــــــــــوســــــــت..... | معتز تروتسكى | 10-16-04, 10:48 PM |
| Re: بــــــــــوســــــــت..... | معتز تروتسكى | 10-16-04, 10:45 PM |
| Re: بــــــــــوســــــــت..... | معتز تروتسكى | 10-16-04, 10:55 PM |
 Re: بــــــــــوســــــــت..... | tmbis | 10-16-04, 10:58 PM |
| Re: بــــــــــوســــــــت..... | معتز تروتسكى | 10-17-04, 09:29 AM |
| Re: بــــــــــوســــــــت..... | لؤى | 10-17-04, 11:00 AM |
| Re: بــــــــــوســــــــت..... | معتز تروتسكى | 10-18-04, 03:05 AM |
| Re: بــــــــــوســــــــت..... | معتز تروتسكى | 10-21-04, 04:48 AM |
| Re: بــــــــــوســــــــت..... | معتز تروتسكى | 10-21-04, 04:52 AM |
| Re: بــــــــــوســــــــت..... | معتز تروتسكى | 10-21-04, 04:56 AM |
| Re: بــــــــــوســــــــت..... | معتز تروتسكى | 10-21-04, 04:59 AM |
| Re: بــــــــــوســــــــت..... | معتز تروتسكى | 10-21-04, 05:02 AM |
| Re: بــــــــــوســــــــت..... | معتز تروتسكى | 10-24-04, 08:49 AM |
| Re: بــــــــــوســــــــت..... | محمد ابو القاسم | 10-24-04, 11:46 AM |
| Re: بــــــــــوســــــــت..... | معتز تروتسكى | 12-13-04, 07:09 AM |
| Re: بــــــــــوســــــــت..... | مأمون التلب | 12-13-04, 07:24 AM |
| Re: بــــــــــوســــــــت..... | معتز تروتسكى | 12-18-04, 00:44 AM |
| Re: بــــــــــوســــــــت..... | alfatih | 12-17-04, 02:32 PM |
|
| |
معتز تروتسكى
فيس بوك
تويتر
انستقرام
يوتيوب
بنتيريست