عزام حسن فرح .. أنت ممنوع من التحدث باللغة العربية .. شوف ليك أى رطانة تكلم بها (وش ميت زت!)

Quote: عبدالرحمن الحلاوي صباحاتك بُيُضْ Quote: وهذا يقودنا للحديث عن علاقة جهينة بالمحس بعد إتْفاقِية " البقط " ظل النوبِيون يدينون بِالمسيحِية (600) سنة في خِلالا نشأت بين العرب - المُجْتازين الغَير مُقيمين ، حسب نُصوص الإتْفاقِية - وبين النوبِيين علائِق ... كان الإسلام غض ... كانت السماحة في البَيع والشِراء ... فتزاوج بعض عرب جُهَينة مِن النوبِيات ... وتملكو بِذلِك الأرض ، لأن نِظام الإرث كان بِجهة الأُم ... فكان النوبي يرِثهُ إبن أُخْتِهِ دون إبنِهِ الذي مِن صُلْبِهِ ... المرأة كانت ولا زالت في قُدس ... مُكرمة ، وكانت الملِكات ... حسُنً ... دعنا ننتقِل إلى مشهد آخر ... الجزيرة العربِية ... قارِن الفرق ... عِندما كانت جدتي ترِثُ < الأرض > مِن أبيها مِثل إخْوتِها الذُكور ، كان سَيِدُنا عُمر إبن الخطاب (رضي الله عنهُ) يحفُر < الأرض > لِوأد إبْنتِهِ ... نعود لِمَوضوعِنا ... تزَوج بعض عرب جُهَينة مِن جداتي ... وكُنت أنا خليط بَين هذا وتِلك ... ويقول ، فيما معناهو ، الدِكتور يوسُف فضل ، أُستاذ مادة التاريخ بِجامِعة الخُرطوم في مؤلَفِهِ < تاريخ السودان > أن كُل الذين يدعون بأنهُم عرب في المُديرية/الأقليم الشِمالي هُم نتاج نوبي/عربي (إنتهى) يعني الرُباطاب (برغم غتاتتُم) والشوايقة (بِرغم بُخلهُم) والجعلِيين (برغم حماقتُم) كُل ديل نِحنا خيلانُم ... أها أكان يرضو ولا يابو ، ما ضارينا في شي ... بِتلاحِظ إنو كُل مُدونات نسب الناس في السودان الشغيغ < نسب ناشِف > بِمعنى ، بِذْكُرو فقط الرُجال( محمد ود علي ود عثُمان ود أحمد ... إلخ) إلا نحن النوبِيين بنعمِل شجرتنا < نسب لَيِن > بِمعنى نذكُر الرُجال ( محمد ود علي ود عثُمان ود أحمد ... إلخ) ونقوم نرجع تاني لِمحمد ونكتِب ( محمد ود عشة بِت زهرة بت خجيجه بِت فاطنه بت فِردوس بِت حليمه بِت صافوره ... طَيِب ... ده العرب بِكْتِبو الرُجال بس في نسبتُم؟ مُش الزول مويه أبوهو وأُمو؟ أوريك ليه العرب بِعملو كِده ، يا سيدي الآمنت ليك ... العرب بِسوو كِده (في السودان وغيرو)؟ دايرين يِتْضارو مِن السَيِدة هاجِر أُم سَيِدنا إسماعيل علَيهِ السلام ، وهي أمه (خادِم) (عبده) مُشتراه مِن السوق وأُعْطِيت هدِية لِلسَيِدة سارة بِنت عموائيل زوج سَيِدنا إبراهيم إبن آزر علَيهِ السلام (عموائيل وآزر أخوان) علشان كدي اليهود (أولاد عم العرب) بِقولو إنهُم عِرقًا أنظف مِن العرب ، لأنهُم أبناء السَيِدة سارة بِت عم سَيِدنا إبراهيم علَيِه السلام لزم والسَيِدة سارة أنجبت ليهو سَيِدنا إسحق علَيِهِ السلام وهو أب اليهود ... أها يا خوي أكان سترتونا في < عجْمتنا > الفوقنا دي بِنستُرُكُم حتو في < حبوبتكُم > دي العرب بِقولو ليك < الفحل مو عواف > يِقومو بِموجِب المأثره القاطعِنها مِن راسُم ده ، يِعْتِقو الخادِم ويِتزَوجوها (راجِع طبقات ود ضيف الله) وتلِد ليك ولد ، يِعْتبِروهو ما فوقو أي إنِّه ... زينه وزي الرتينه ... نِحنا في المحس ، التمُر زي ما عرِف كتير والسمك والتمك (البِطيخ) راقِد ، أها بِخاف الأبو ، يِقوم لدو يِشْتهي < خادِم البيت > ما هيلو ... قامو مِن زمان جِدًا نجرو ليهُم حاجة إسمها < مجلِس الرِضاعة > ... ده شنو كمان؟ أقول ليك ... لامِن الولد يِبلُغ مبلغ الرُجال ويبقى كمطاشر كدي بِقوم أبوهو بِعرِس ليهو وفي نفس الوقت بِعرِس لِخادِم/خادِمات البيت بِعبد يِكون كُوَيس كِده ، ويِنتِج عن ذلِك وِلادات ، يِقوم الأبو يِطْلُب بِعقد < مجلِس الرِضاعة > يِلمو فوقو كُبار الحِله (رُجال وحريم) كشهود ويِخلي الخادِم الوالدة جديد ترضِع ولد ولدو ... أها كدى ود الحُر ببقى أخو خدمو بِالرِضاعة وبِشِبو سوا سوا ... وما بِقدر بِشْتهيها ... ويِتْحفِظ بكِده العِرق ، الجاط عِندكُم ، لِدرجة المِتِل بريمة آدم بلل إتْشعبطلو فوق عربي ... أها يا خوي لامِن تقول أنا محسي أو حلفاوي أو دُنْقُلاوي ، بنسألك كام سؤال (أمك بِت منو / أبوك ساقِتو ياتا / جِدك ... إلخ) وبِنلحق حدك وجَدك ... شوف الليلة يِقول ليك أنا < جعلي > بِتلحقو كيف ده ... ما بِتلحِق ... قال جعلي خلاص جعلي ، غصبًاعن أي مك والله أنا لامِن جيت أطلِع الجِنسِية علشان الشِهادة السودانِية ... دخلت ليك اللجنة ، لِقيت أربعة ولا خمسة رُجال ملكِيين وضابِط واحِد ... سألني الضابِط : - جِنسك شنو؟ - محسي ... قام راجِل كبير كِده قاعِد جنبو ، قال لي : - مِن ياتو محس؟ - أبوي مِن عبري وأُمي مِن صُلِبْ ... - < حرم سيدي > بتقرب ليك شنو؟ - حبوبتي ، أُم أبوي ... - أبوها مِنو؟ - بعرفو ، أبوها (سيدي) محمد ود (سيدي) شيخ إدريس علي المرضي ، سيد القُبة الفي قرية كويكة ... قام الضابِط ختم لي ورقي ... شوف ... أها لامِن جيت أطلِع جِنسِية لِبت إبراهيم (زَوجتي) كواهلة بُطانة أبو علي ، أُم هبج ... قعدت حول ... سنة ، لامِن قِدرت أطلِعا ... لأن الشرط إنو تثبِت إنها سودانِية بِجِنسية أبوها أو عمها أو أخوها وحِله ناس بِت إبراهيم ما فوقا وِريقة خلو يِكون فوقا جِنسِية ... لأن أي زول مُمكِن يِتعلم اللُغة العربِية أو يِكون إتْولد في السودان ، يبقى اللُغة ما إثبات ... أكان إثبات البغبغاء حقو يِدوهو جِنِسية البلد البِبَغْبِغ بِلُغتا