فـــر FOUR " شفط " الشامبيــون ...

Quote: الباب البجيب الريح د.عادل الصادق المكي فــرفــور.. والشامبيون.. الريدة لا زم تستمر! كان مشروب الشعير.. سئ الذكر و المدعو البيرة.. ما لقي زول يعمل ليهو دعاية دعايتو منو وفيهو... غنية " البيرة ام جمل والشراب اسكوب.. كُب يا علي في كبابي الشوب"...الغنية دي كانت تغنا في بيوت الافراح خلسة... وهي دعاية مجانية لشراب الشعير الوحيد والاوحد في السودان انذاك والمعروف بالبيرة ام جمل كانت في قزاز والقزازة مرسوم فيها جمل يفنجط. اما علي البيكب في كبابي الشوب قطعا يكون كان زول فنجري واخو اخوان.... وكان الزمن داك الزول المارق من اللليد وما ساعل من صفاته شراب البيرة وشراب السجاير وسف الصعوط والبيمشي السينبا ويلعب الكشتينة...وزول فيهو الصفات دي ما كان بيعرس باخوي واخوك.. وكان يمارس عليه ضغط من المجتمع لكي يرعوي.. ويرجع الي صوابه... وفي الصلاة يدعو ليهو ربنا يهديهو من مشي السينما ولعب الكشتينة...وقد كان احدهم مولع بلعب الكتشينة والدته شكته لاحد المشايخ.. فاخذ الشيخ يضربه ويقول ليهو" تاني بتمشي السينما؟... تاني بتمشي السينم؟ا".... فرد عليهو المسخوت السينمائي" يا شيخنا الشي مو سينما... الشي كشتينة"..صلح الشيخ عشان الضرب ينفعو او ربما يكون دق لعب الكشتينة اخف من دق مشي السينما فيخفف الشيخ من الدق!!... و كما وانه يريد ان يبدي انه في غاية التعاون لعلاج نفسو من لعب الكشتينة...الليمات دي تطالعنا دعاية .. شراب شعير .. بيرة منزوعة الجمل والكحول وسميت شامبيون...لكن في النهاية بيرة ان طارت السما...فرفور.... غنا ليها في دعاية.... مجموعة بتاعت رجال يسدو عين الشمش.. وكل واحد شايل ليهو قزيزة شامبيون و يغنو و يشيلو ورا فرفور" شامبيون شامبيون"...المحيرني انو فرفور يغني و هو زعلان.. ما عارف المزعلو شنو؟ والعجيب انو الشيالين فرحانين بالشامبيون ويورو في الناس في القزازة قادم الكميرا...زول بيغني لبيرة ولشراب في رايو انو سمح زي دا... حقو يطرح وشيهو شوية... عشان الناس تفتنع بانو البيرة دي بت كلب ومافي زيها اتنين...ونبقى نحن ما عندنا شغلة في الدنيا دي غير نشرب شامبيون وندشا ونقول" ارقد يا عيش انا جرابك"..... ونباري باقي الدعايات ونمشي نشتري عناقريب وطرابيز من المحلات العاملة دعاية..ونمشي ونحن شبعانين ورويانين شامبيون .. و علي حس الشبعة دي العنقريب ان قالو لينا بمليون نمرق القروش من جيبنا ونقول لهم ادونا اربعة عناقريب وطربيزتين....قلت يا ريت يعيدو تصوير الدعاية ويقولو لفرفور.. اطرح وشيك واضحك.. شوية.. والفلهمة في الغنا ال للبيرة ما جاية.... ويعتذرو لجمهور الشامبنيوناب... عن زعل فرفور ومقابلتو ليهم وهو صاري.. ويشوفو اي عذر لفرفور..يعني ممكن كان راسو موجعو وقت التصوير... او اي حاجة تنفي التهمة عن الشامبيون وانو فرفور زعلان من الشامبيون...اقو قولي هذا متمنيا لفرفور النجاح .. والتقدم... وللشامبيون دوام التالق وان يحافظ على انو منزوع الكحول والجمل..وان لا تصغر نفسو ويدس لو عقاب كحول في قزازة ويجينا مارق بيهو....

هنـــا