المرشح عباس عبدالعزيز ..سيحصد ما زرعه في كجبار

Quote: ويا اخى الفاتح انتو ما فاهميين حاجة معليش اقول ليك انتو يبدو لى مخموميين ساكت يا اخى الفاتح الحكومة دى واضحة زى وضوح الشمس لكن صدقنى فى ناس للاسف فى البلد دى عاوزيين يعارضو ساكت . والجوطة دى كلها قائمة على ان الحكومة قالت عاوزة تعمل دراسات للنظر فى مدى امكانية وضرورة اقامة سدود فى المنطقتين لصالح ومستقبل المنطقة والسودان. فى ناس عارضو وقالو لا دراسات ولاسدود دى معقولة دى فى حد يقول للحكومة لا ما من حقك تعملى اى دراسات لا سدود ولاغيره معقولة دى واصلو الحكومات دى شغلتها شنو وخاصة حكومة زى دى عاوزة تشتغل فى السودان ده بى خطط واستراتجيات واقعية كما قلت لصالح البلد ومستقبل ابناءه جميعا . ده الحصل يا الفاتح . فى ناس كان عندهم رؤية مخالفة لسياسات الحكومة وكانو عاوزين يحفظو على ارضيتهم السياسية والانتخابية بالواضح كده فى ناس كان رايهم طيب الحكومة دى الشغالة بى مزاج وقاعده تكسب ولاء المواطنيين بما قدمته من خدمات وتنمية فى كل انحاء السودان وكسب ولاء المواطنيين فى الخرطوم وغيرها من الولايات عاوزة تقبل على الشمالية كمان الشمالية فى رايهم منطقة شيوعيين واخر انتخابات فى عهد ديمقراطى فاز فيه مرشح لليسار وهو المرحوم محمد صالح ابراهيم طيب كيف نخليه للجبهجيه ديل لازم نعمل حاجة ونكسب ارضيه فجاءوابفرية واكذوبه ان الحكومة دى عاوزة تعمل زى حكومة عبود تغرق كمان الفضل من اراضى النوبة ... يا اخى الفاتح ابشرو والله الحكومة شغالة اليومين ديل فقط للنوبة بس نحن فى المحليه بدينا نخطط لاعادة القرى النوبية القديمة يعنى حدودنا زمان مع مصر كانت قرية فرص ثم اشكيت ودبيرة بدينا نخطط لكل هذه القرى حتى يعود كل النوبين الى قراهم ويعمروها من جديد واخر قريه تم اعتماد خرطتها ورفعها للولاية للتصديق النهائى هى قرية اشكيت بعدد 2000 قطعة سكنية مش ده الى دايرنو الناس ولا حاجة تانية وغير كده برضو حتى الحكومة المصرية بدات تخطط وتملك للقرى النوبية ايضا فى حدودها مع السودان كما قلت عند فرص واشكيت هذه هى الحقائق يا الفاتح مجردة من كل شى وخلاصة وختاما اقول يا الفاتح لك ولكل الاخوة المتخوفين من اقامة السدود والله العظيم وكتابه الكريم لن تقم للنوبة قائمة ارضا ولا انسانا الا بهذه السدود ووين فى ياتو عالم ولا فى ياتو دنيا قامت نهضة بالزراعة ولا بالثقافة فقط كل الدنيا تطورت ونهضت بالصناعة والماكينة والتكنلوجيا انظروا لامريكيا واليابان والصين والمانيا وحتى اسرائيل يا اخوانا اصحو ... والله نحن لو نوبه صح من بكره نكورك ونملا الدنيا عاوزين السد عاوزين السد ولو ضيعنا الفرصة دى ومن هذه الحكومة بالذات على المنطقة السلام وعلى النوبة الفناء اللهم هل بلغت فاشهد عباس عبد العزيز 2009/04/01