|
|
 الــزول الذي.... حِـــرد اهلــــو!
|
لزول لما يكون في زول ما داير يتلوَّم معاهو .. والزول دا غائب مِنّو يقول الغائب عذرو معاهو.. لكن أن بقى مكجِّن زول وغاب مِنّو طوالي يشتغل ليهو ويطلِّعو زول ما فيهو فائدة وزول سجمان ساكت... برنامج في قناة النيل اللزرق إسمو "ألو مرحبا" فيهو فقرة قاعدة تكوس للناس الودرانين وضَهَبانين من أهلهم.. لكن والله ما داخل لي راسي زول كبير وواعي وضهبان في زمن الاتصالات وبارك الله في الخواجات السهّلو لينا التواصل.....الفقرة ناجحة ما فيها نضم ... وناس كتار جمعو بسببها ..... علا يا جماعة الخير في ناس زايغين عديل كدي... وما دايرين يرجعو ولا دايرين سيرة أهلهم... لسبب عارفنِّو هم وحمدو في بطنو..... -هالو -ألو مرحبا معاك ألو مرحبا أسمعي يا بت الناس ... أنا آدم ود كتّر خيرو.. أهلي في أُم طرقن عُراض.... أنا مرقت من أهلي من سنة خمسة وتمانين وتاني ماني راجع ماني راجع..... النحدِّسك... عايني جاي.. أوَّلك بالتبادي بعتا البقيرة .. وقلت داير أعرِّس.. مشيت دُرتا أُم بلّه بت خالي العوض.... قالو ليّ أُم بلّه دايرا ودَّ اعمها... خليتا قلت الحالة واحدة ومافي فرق بيني وبين ودَّ اعمها.. مشيت دُرتا كلتوم بت أُمحمد ود عجبنا... أُمي وقفت ألفاً أحمر ... قالت ليَّ البت كعبة وممحوقة ومُبذِّرة.. داك الليلة قالت لقتها عاجنه ليها تلاتة بيضات الّلات جنا جداد ومُجلبِطة بيهن وشيها كايسة للسماحة... وحلفت أُمي قالت وليدات أخوها يبكو من الجوع والبويضات دي خاتِنّهِن لفطورهم مسَكتهِن هي وفقشتِن في كورية وجلبطت بيهِن وشيها...وبعدين قدما كعب و حظّها زي الزِفت.. يوم ولدوها ماتت حبوبتا التاية... ويوم سمايتا ماتت ستّنا مرة الّلمين... ويوم طِهارتها ماتت حبوبتا أُم أبوها ... إن بقيت داير تكتُلني أنا عرِّسا....خليتا مشيت دُرتا أُم زين بت عمِّي طه برضو أُمي قالت ليَّ البت شرفانة وجِنّها أكِل وطبعها شين وقت تجي تشرب أيِّ شي قاعدة تمد لسانا... داك الليلة شربت لها قزازة الّت بستي كولا قومي مِدّي لسانك واللسان يدخل في خشم القزازة والقزازة تلصق فيها عِلا ودوها الخرتوم وحلفو قالو لِك عشرة دكاترة يقومو ويقعدو حِتّين يا الله مرقو اللسان من القزازة ... برضو خليتا.. مشيت درتا التاية بت حسبو... برضو أُمي أبت .. قالت البت ديمة مرضانة والمِراريا ما عندها شَغَلة غيرا.. تشِدَّها المِراريا وتنزِل منّها تنزِل المِراريا يشِدّها التيفويد.... ينزِل التيفويد يمسكها أبو اللغود...السنة كلها في الحال دا... ألو .. إنتي سامعاني ؟غايتو يا زولة فكّرتا كدي وقلت أنا أسافر ...وما يخبروني وين... أنا حسّي في الِلبيض .. والله يَخبرو بكاني عِلا أطير وامشي بلدن طيرو عجمي وامرقها في السوكي....
|
|
  
|
|
|
|
|
| العنوان |
الكاتب |
Date |
| الــزول الذي.... حِـــرد اهلــــو! | سجيمان | 02-23-10, 10:38 AM |
| Re: الــزول الذي.... حِـــرد اهلــــو! | طارق جبريل | 02-23-10, 11:02 AM |
| Re: الــزول الذي.... حِـــرد اهلــــو! | سجيمان | 02-23-10, 04:41 PM |
| Re: الــزول الذي.... حِـــرد اهلــــو! | د.نجاة محمود | 02-23-10, 04:48 PM |
| Re: الــزول الذي.... حِـــرد اهلــــو! | سجيمان | 02-24-10, 06:59 PM |
| Re: الــزول الذي.... حِـــرد اهلــــو! | سجيمان | 02-24-10, 08:37 AM |
| Re: الــزول الذي.... حِـــرد اهلــــو! | عبدالناصر معتصم | 02-24-10, 08:48 AM |
| Re: الــزول الذي.... حِـــرد اهلــــو! | Hisham Ibrahim | 02-24-10, 12:13 PM |
| Re: الــزول الذي.... حِـــرد اهلــــو! | سجيمان | 02-25-10, 04:54 PM |
| Re: الــزول الذي.... حِـــرد اهلــــو! | سجيمان | 02-25-10, 08:24 AM |
| Re: الــزول الذي.... حِـــرد اهلــــو! | سجيمان | 03-03-10, 11:18 AM |
| Re: الــزول الذي.... حِـــرد اهلــــو! | سجيمان | 03-04-10, 08:17 AM |
| Re: الــزول الذي.... حِـــرد اهلــــو! | هويدا شرف الدين | 03-04-10, 10:26 AM |
| Re: الــزول الذي.... حِـــرد اهلــــو! | emad altaib | 03-04-10, 10:39 AM |
| Re: الــزول الذي.... حِـــرد اهلــــو! | سجيمان | 03-04-10, 07:20 PM |
| Re: الــزول الذي.... حِـــرد اهلــــو! | المر | 03-06-10, 01:21 PM |
| Re: الــزول الذي.... حِـــرد اهلــــو! | saif massad ali | 03-06-10, 03:44 PM |
|
| |
سجيمان
فيس بوك
تويتر
انستقرام
يوتيوب
بنتيريست