ريهان الشاذلى &مريم عزالدين ورندة حاتم على راس قائمة المرشحات (فى تحالف النساء بالاحزاب )

Quote: [5 -مارس ر-2010العدد:5979 ( الصحافة) -------------------------------------------------------------------------------- ونسة(الأرشيف) (مريم عز الدين ....مختبر جديد للسياسة) تحت ظلال الابتسامة كان اللقاء ابتسامة حاولنا فك رموزها هل هي ابتسامة البرلمانية أم هي ابتسامة تستمد وهجها من تفاصيل الحياة السودانية هناك في تندلتي حيث كانت لحظة الميلاد والنشأة الاولى والتي ألقت بظلالها على مريم عز الدين صديق والتي تنحدر بجذورها من شندي وتقيم الآن بالرياض بالخرطوم وبدأ نشاطها السياسي في الجامعة وتحديداً من خلال مؤتمر الطلاب المستقلين، ومنه انتقلت للتحالف السوداني والذي قدمها الآن نحو البرلمان القادم من خلال القائمة النسوية التي ترفع يدها من اجل تحقيق التغير. وتبدو واثقة من الوصول للبرلمان والجلوس تحت ظلال القبة المقابلة النيل حيث تعلو درجات التكيف والتي تقول لانها ستحوله لدرجة الغليان في صراع المطالبة بحقوق كل الفئات فقد مضى عهد برلمان البصمة على القرارات وجاء الدور على برلمان جديد. قعدنا معاها على طاولة حوار وخرجنا بالتالي فإلى حديث البرلمانية اذا وافقوا الجماعة.. ٭ الدخلك درب السياسة شنو؟ - نفس الطريق الذي قادك للحياة هو الطريق الذي يقودك لممارسة السياسة والعمل من اجل تحقيق طموحاتك في ان ترى شعبك في افضل واجمل صورة وان تعيش كما يجب ان تعيش وليس كما يريد لك الآخرون ان تكون. ٭ الآخرون منو؟ - أنا ما حددت زول بعينو لكن أي زول يحاول يضع السودان في غير موضعه هو من الآخرين والعمل السياسي ليس ضدهم بل من اجل ان يكون السودان في موقعه الطبيعي قائداً لركب الامم وليس باقياً في آخر صفوف التنمية واول صف الفساد. عشان كده انا بديت ممارسة العمل السياسي داخل الجامعة وانا اصلاً خريجة مختبرات من جامعة السودان ومن هناك بديت الجري. ٭ أنت قائلة نضال الجامعة البتقولو ده بدخل برلمان؟ - العمل في الجامعات هو الخطوة الاولى لمراحل جاية بعداك القال ليك منو انا بتاعت نضال جامعات انا وصلت لقيادة الميدان أيام السخانة ديك وده ذاتو يعني انو المرأة ناضلت حتى فى الميدان ، لكن سلاح النساء سلاح مختلف عن اسلحة الآخرين التي تصنع الموت والدمار. ونحن نصنع الحب والجمال والكمال. والبرلمان ذاتو خطوة جديدة لمواصلة الرحلة نحو المدن الفاضلة التي نحاول صنعها بامتداد المليون ميل مربع. ٭ يعني انتي كنت بتفكري في موضوع البرلمان ده من زمان؟ - أنا كنت بفكر في اكثر من كده يعني البرلمان ده خطوة اولى وأنا بفكر في اكثر من كده. ٭ يعني دائرة تبقى رئيس ولا شنو؟ - وليه لا طالما انو المسألة بتقوم على اساس المواطنة وتساوى الحقوق والواجبات والمقدرة والكفاءة وطالما نحن لدينا قدرة على الممارسة الراشدة فمن حقنا دخول هذا المعترك واصوات الناخبين هي الفيصل بيناتنا ومسألة رجال ونسوان دي انتهت خلاص. ٭ ما هي فرصك في الفوز؟ - أنا قريبة من الفوز وده ناتج من رغبة الناس وسعيهم لانجاز التغير والنحنا قاعدين نحمل لواءه من اجل اصلاح حال الناس والمجتمع عموماً من خلال رفع ايادينا ونحن ننادي بالتغير من اجل اصلاح المعوج وليس من اجلنا نحن كقائمة. ٭ دايرين تغيروا كيف وبشنو؟ - نحن دائرين نغير بأصوات الناس ودي السلاح الداخلين بيهو المعركة والقادرين على الفوز من خلالها دي سكة الوصول وشنو بقدرتنا على التعامل مع ازماتنا الكتيرة وده من خلال تجاربنا في الحياة العامة. ٭ شابكانا تغير تغير انت دائرة ميزات المجلس؟ - يعني هسة أنت قائل الجوطة دي كلها عشان ميزات المجلس نحنا دايرين ميزات المجلس لكن ما الميزات المادية بل هي ميزات تتعلق بخدمة الناس ودي الميزة الاساسية التي نسعى للاستفادة منها وليس العكس كما يتصور الكثيرون بعداك ما نحنا نشيل الميزات ما هي حقتنا أقلاها حنساهم بيها في حياة الناس وليست في بناء العمارات والاشياء الخاصة. ٭ وحتعملي شنو لو وصلتي؟ - أنا حاعمل كتير من اجل حقوق النساء والرجال عموماً دون تفريق في ما بينهم لان العلاقة بينهما لا تنفصل ابداً فالمجتمع هو تكوين مشترك بينهما لاجل تحقيق اهداف المجتمع ككل. وبالمقابل ساعمل من اجل دعم حقوق الاطفال والشباب من اجل انجاز الاصلاح التام وبصراحة بالاضافة للعلاج والصحة والتعليم فانا سأدعم بشكل اساسي الرياضة وتحديداً منتخبنا الوطني من اجل تشريفنا في المحافل كافة. ٭ وكان ما فزتي حتعملي شنو؟ - حأرجع تاني لاعادة المحاولة من خلال الاستفادة من هذه التجربة واتمنى ان اجد الدعم من كافة الشرائح واليد الواحدة ما بتصفق نحنا دايرين نرفع يدنا من اجل انجاز التغير الذي يقود الوطن نحو بر الامان ولكم الشكر على الاستضافة.