كل من يشارك في الإنتخابات القادمة يضع حجراً في صرح شرعية الإنقاذ ..!!

Quote: تاني ( إعادة تشكيل ) ؟ .. تاني ؟؟؟ ما دايرين إعادة يا ود المشرف .. دايرين قيامة رابطة تقلب عاليها واطيها و تمرق بشي جديد لنج .. إعادة التدوير و إعادة الإنتاج دي العالم كفرت بنتائجها نهائي و فور قوود .. الشعوب قادرة يا مشرف إنها تقلب الطاولة على التكهنات كلها .. و المسلمات من طرف . أنا ده واحد من الناس مراهن على أمة الخلايق السودانية المصادرة إرادتها و بيلعبوا بيها النرد هؤلاء العويش الهواليك بالمسميات القديمة و المستحدثة .. بالكهنوت و القداسات و مخدر الكلام و كيمياء الحرباء .. الناس صاحية و واعية كفاية .. الناس متندلة غباين من كترة اللت و العجن و الصفع على القفا من أقرب إيماناتهم الكانوا تاكلين عليها .. ما كلام إنشائي .. و لا أحلام زلوط .. لكن إستقراء للنبض الحقيقي للعالمين هنا .. و من جوه شريان وجعتهم بقول ده .. و بالفم المليان كمان . عملية إنتخابية بتاع مين يا حيدر ؟؟ كل شي مرسوم و مظبط و مخطط بالمزاج الإنقاذي البديع الخلى أصنام حجارة الأحزاب تتطاقش و تبين سؤة طويتها و سجم رماد برامجها و آلياتها .. و طوية شايلوك اليهودي الحايمة بيها . الإنتخابات - هذه المفردة المسحورة - كانت سيناريو جاهز و مظبط من قولة تيت .. إستبقت فيهو الإنقاذ - بخبثها الممنهج - كل سلحفئيات عقلية هذا الكانتون الحزبي لحمة الراس .. و لزتو ليهو طعم مقشر .. فبلعوا صاحبنا .. ما كان ينقص هذا الفيلم الهندي هو شوية تصفيق و كومبارس و دلاقين و مكياج عشان تُرفع لافتات العرض المسرحي التعيس ده .. و مافي كومبارس أحسن من تنابلة السلطان الحزبية .. و لا مكياج أظبط من الهتاف بالخطاب الميكافيلي القديم و مقدود , من جملة اليسار لليمين . و يللا .. صفقوا أيها الناس .. ماشين في السكة نمد ..!! سكة بتاعت حنانكم ؟؟ البيستغبى الشعوب هو الغبي تماما .. البيستذكى عليها و باسمها يكيل .. هو المغلوب في النهاية .. و الشعب ده جبار و قادر و كامن جوه غضبتو الح تشيل كل الوسخ و العفن القديم ده كلو .. باكر .. بعده .. بعد سنة .. خمسة .. عشرة .. المحصلة الكبرى جاية : الكنس . و القيامة من جديد لنج .