لغير الاعضاء سودانيز اون لاين ,,, ماذا تريد ان تقول لياسر عرمان , مرشح الحركة الشعبية

Quote: لشكل جديد * الى كل أنثى أطفأت (حفرة دخانها ) رأفةً بزهور الطلح ( البرم) يادرّه لامتين فى الصدف ياقمرا لامتين فى البيوت؟ ما تسيبى أحزان الغرف تتوصّى بيها العنكبوت يازوله أروع ما تكون لمّــن ( تقنطر ) لى (وأشوت) (ضفّــارى) موروث الوهم باب الحراسات القديم ما سامعه وكتين تطلعى ولمّن طوابيرك تفوت الناس بصافيها الفرح وشارعنا بطلع ليهو صوت ؟ طربانه جايّاك من بعيد تعزف مزازيق (الشفوت) الرصّــو أحزانم حجار ختوها فى الركن اللئيم خليها يوم تتهنّى بيك تطرب معاكى وتنتشى وصوت طبلها ينقرش معاك سر روعة أيقاع المشى غير متعة ( التصفير) حرام من (غلّتــك) ما تلقى شى أكلت (ملفاتها) الوراك تمّــت غداها الباقى (نيــم) فى ( لسته)عايز أكتبها ليك متمنّى ما تباريكى يوم عشق الغوايش والختم والحنّــه بى كل الرسوم وتياب مذيعات الغبار ألوانها ماليهن لزوم إتخيّــرى اللبس البسيط وأتحدى بيك كل الحريم وما دام كبرتى على الوشوم والمدعو( نقرابى ) الرشوم (موس الفراعنه) تسيبى كيف يبنيلو أهرام من هموم؟ ما تخلّــى (نفّاج) أو (دريب ) لى طيره فى خدّك تحوم* دا وكلّ زيف بنده عليك يوماتى من (علب الكريم ) وأفرح كتير ساعة المغيب لمّن (حريق طلحك) يقيف وجنب الهشاب فى كم قطار يتهادى صمغو على الرصيف ما الراعى والريم والطيور محتاجه لى ضلّو الريف وين إنتصارك لى الزهور ؟ ما قلتى إحساسك رهيف كيف يرضى ليك ( تتعصفرى ) ويتأتم (البرم ) البقوم ؟ ومستنى يوم تتعب رؤاى يرموهو ( تى شيرتك) على وترحل غشاوت العيون بصراً حديد يرتدّ لى وأقراكى بى شوفى الجديد إنسانه خلّت جمرى حــى ما عارفه من بسمه بتشيل ( عبّادى) لو آنستا ضــى* بحسب بتوقيت البروق أفطــر على وجهك وأصوم شان ضاوى من قبل الظلال والدنيا بى المكياج تفوه وماخد نضارو ( الماخمج ) من التبسم فى الوجوه يا لابسه فى الروح السوار عينيك منارات يوم أتوه وسط الرموش الواقعه ما بين همبريبك والسموم وأتأملك واقع معاش قدامى من بعد إقتراح أكثر رشاقه من الفراش قمــريه فارداهو الجناح وأصدق بشارات الرشاش أنسام مرسلها الصباح تطلع (مداعى) مع الدعاش ( تعــــزم ) (حناكيش) الغيوم الكانو قانصين من زمان لى حفل ميلاد الورود من قالو بى أغلظ يمين حالفين خطاهن ما تعود لى ناس بتستلهم رقيص أفراحا من هبل القرود* وما بتنزل النيل خطوتين تتامل ( الوز) البعوم (واتأبطك خيراً) وفير فجراً تخاصرينى ونمــش ميّــاده بى الخصر البدين * من سوّى من جوعك كرش نفتح بلاغات الضلام فى ( دفتر أحوال ) الشمش ومن قلبها الضـوّاى شديد نجلب مشاعل لى الديوم وما ضرّه لو كبس الضلام وإحساسك الصادق أمر نفرش بساطات الغرام فى وش برندات القمر واقرا القصايد الزاهيه بيك والساخره من كم ( مؤتمر)* نطفى النجيمات القريب بى الفرحه نتغطى وننوم نصحى ونهد صنم (اليسار) و (الزادو مختصر الكلام) (واهل الجلاليب القصار) (وقبّــه) ( مشايخ كوكادام) ونختم ( بمشروع الدمار) (الأصّل) الفقـــر التمام (المكّــن) (الهمباته) من عرق المساكين والرسوم ويكسح (تسوناميك) ويشيل ما يخلّى غير (ياسر سعيد)* عايزنّو ناطقنا وزميل فى مركب الريد الجديد قوليلو أركب ياجميل شايفنو سودانكم بعيد وخلّى ( الكوماندر) (سلفاكير) يدعمنا بى ( باقان أموم ) حنفى مايو 2006 الكثير من الموروث الثقافى والإجتماعى والسياسى للسودان لا يعجبنى . * أعجبنى ما قاله د راشد دياب : العين السودانيه تعودت على القبح " *لاتعجبنى ألوان الثوب السودانى الكثيره والصارخه جدا (خاصة فى كردفان ودارفور) وحتى فى المدن الكبيره أحيانا برغم محاولات تسويقه عن طريق مذيعات النشره الجوية ( المثيره للغبار والأتربه). * لاتعجبنى نقوش الحنّاء على البشرة السمراء . * المبالغه فى إظهار كم الغوايش والختم ( البوبار والفشخره) . * أعجبنى إنقراض الشلوخ والرشوم ( النقرابى ) و(درب الطير) وغيرها من الوشوم وعقبال الختان الفرعونى. * تعجبنى ( برمة الطلح ) اكثر من أى انثى مدخّنه. ولاتعجبنى رقصة القرد * أعجبنى ماقاله مريد البرغوثى فى رائعته الشهوات : شهوة لوجود النساء اللواتى يخفن قليلاً ولكن يقفن طويلاً بجفن الردى وهو نائم وطرحاتهن الغيوم واقدامهن الجنان وفى روحهن الاساور والماس لا فى المعاصم يطرز اثوابهن العجاج الكريم فيخدشن خوذة عصر الغزاة ويسقطن عصر الهوانم قلت أسودن هذا المعنى البديع وأدعو نساء بلادى للبس اسورتهن وحليهن فى أرواحهن ( يالابسه فى الروح السوار) • أعجبنى رد ياسر عرمان على سؤال غبى عن مصيره إذا أنفصل الجنوب ؟ فقال : ( ما اهمية مصيرى أمام مصير وطن ؟ نحن ذاهبون فى كل الاحوال ويبقى الوطن) ومعجب بباقان لشجاعته ومصادمته ، وأعجبتنى فكرة السودان الجديد عموما حين طرحها د جون قرنف واستلهمت منها عنوان القصيده • ( لشكل جديد) فالشعراء والفنانون معنيون بالجمال . ( لست حركه شعبيه) بعد دا كلو . • ( دريب) : تعنى درب الطير نوع من الوشوم مثله مثل النقرابى • العبّادى : هو البرق العبادى ودوما يتوقع منه مطراً بعكس البرق الخلّب • الخصر البدين : من الإدانه وليس البدانه (يدين) • مشروع الدمار : المشروع الحضارى •