|
|
 حديس التلاتاء (53)
|
شاطىء الشؤم..
ويدلف حديس التلاتاء باب عامه التاني..يتاتي..يتاتي..زي قدلة جنى الوزين..مرة تشده الفصيحة أمل كرار..ومرة يمسك بيديه الصغيرتين أحدكم..وهكذا..يدلعه جميع اعضاء المقيلة..زي وليدا وحيد "عند أمو"..وماغاب عن همه السودان..وما نام يوما ولم "تزاول" له كردفان..ويهضرب بها في احلامه دون اضغاث..وتغريه بجمالها الشاهق وجبالها..كجزء من الجمال الباطش حق بت عمك ابراهيم داك..تنمو شدرتنا المقيلة..بجهودنا جميعا ومعاناتنا..كأنها شدرة هبيل "بطرقها" العريض الضليل..ومن فريعاتها عيدان لحفر الدخان..والتي لا نتمنى لها أن تنطفي بمطافئ ختام الوردية..في سهولنا في كردفان شدر الهبيل.."يتجوز" الرمال..زواج ينتهي بموت احدهما..وتدوم الذكرى إلى الابد..زحف الصحراء تكفل "بكتل" الهبيل..وترك الرمال لا تعرف ان تتوقف..ترحل لتنسى ببُعد المكان وما تنسى ولن تنسى..في خريفنا كانت الطرفة البكاي..والنترة..والمطر يشيل الليل "يكب" شووووو..بقى اليوم ينقط بس..طج..طج..طج..كدموع مواسير مدينة الأبيض..في هذا العهد البائس..والتي خدعوها بانها عروس..ولا تزال تنتظر الفارس..وهي ترتدي ثوب زفاف من الزمن القديم..و"متحننة" ومتمحنة ايضا وقااااعدة..ولم تغير اسماءها..الميرم..اب جهل..أب خمسة..اب شرى..كما يظنون..تنتظر فارسا لا يمشي في شوارعها "بعربية" آخر موديل ليستفزها.. بل يمشي كداري..كلقطة احتجاج على عدم وجود الشوارع..خليك من المشي بعربية الحكومة وعكس الشارع ..وحبس رجال المرور من عيد اطفالهم..ونساءهم اللائي تتدخن لهم بحطب الهبيل..والذي اضحى نادرا حتى نساء الخرتوم يشتهين الدخان منه..لأن طعم دخان الهبيل "جاذب"..بأناقة..واليضوقو ما بخليهو.."تب"..
- ناس المرور غلطانين..الوالي يعكس الشارع..يعكس الاتجاهات..مثلا25مايو تصبح 30 يونيو انتو مالكم..
- مرحى يا شلوبة مرحى.. دافع عن ناسك ديل وغلطاتهم "النية"..يا اخي الواحد كان لازم يغلط..اليغلط غلطة "نجيضة"..لكن والله تعجز وتقعد في الواطة دي..ورايك يكمل..و"يعوعي" ديكك..كان تابعت الناس ديل..أفرض وقع حادث ومات زول..مسئولية منو؟..
- يكون غلطان المرحوم..وبعدين دا افتراض غير واقعي..والوالي دا جبتو انتو..ناس الأبيض؟
- صحيح جابتو الدكتاتورية..لكن طيب ليه انتو تفترضوا مثلا ان المراقبين الدوليين للإقتراع إن تم.. سيسعون لفتنة كفتنة زمبابوي..وكأنه افتراض واقع ليس له دافع..
- عشان ..عشان..في الحقيقة..والشاهد أنو..وعدد مقدر..وفي هذه السانحة..والصهيونية العالمية.."يتبع"
|
|
 
|
|
|
|
|
| |
فيس بوك
تويتر
انستقرام
يوتيوب
بنتيريست