زمن أكانت " القاهِرة " تكتُب و" لبنان " تطبع و " السودان " يقرأ ... ولى ... القِرايا دايرا حاجتين ، بِقن ما مُتوفِرات في السودان ... دايرا وقت ودايرا فُلوس ... في سودان عُمر البشير ، ماف وقت ... البيت كُلو شغال ... الراجِل والمرا والبِت والولد ، علشان يِتلمو في صينِية فوقا صحن واحِد بس ... الصالِح العام (الطبقة البِتقرا) إترحل ليها آلاف العُمال ومُوظفي الخِدمة المدنِية والعسكرِية ... الناس المشو لِلصالِح العام مُتَوسِط أًسَرُمْ ، النقول (5) أفراد أضرب وشوف ، مِتِل ديل يِقرو ولا يِهِمو لأكِلُم وشرابُم وفاتورة كهربتُم وعِلاجُم ، خليها الدِراسة ، لأن أغلبُم مرقو أولادُم مِن الجامعة ومرقهُم دون الجامعة لِسوق العمل ، بِمُرتبات نُصها بِتروح في المُواصلات والفطور واللِبس ... الجريدة بِتْشاركو فوقا يا زُهير ... تقول لي يِشْترو كِتاب ... الواحِد لو بِيقرا في كِتاب والغاز كِمل بِقفِل كِتابو ، ولامِن يِعود عِلا يبدا فوقو مِن جديد ... الوقت نِعمة كبيرة والزول ما بِكون عِندو وقت فراغ عِلا يِكون تَمْوين شهرو مَوجود قِدام عِيونو (زيت/سُكر ... إلخ) الإمام الشافِعي رحمة الله عليه قال : كان شغال في بيتو زوجتو جات قالت ليهو < الدقيق إنتهى > قال طارت مِنو (100) مسألة فِقْهِية كان شغال فوقا ...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة