***** اسال حروفى وعيونى المناها تنوم *****

الأخت منال
سلام وتقدير
وعشان ياريت عيونك إغشاها النوم ..
أهدى إليك نزفاً من حنين علّه وعسى يفيد
وممنون لكل هذا الجمال من الكتابة الصادقة ..
:
:

أبقالِك بساط الريح

أضاري عليك من لفح الحنين والريح

أقش الدمعة من خداً جفاهو حبيب

وهاجر لي درب ودّار

وساب زولاً وحيد وكسيح

إقاسم (البركل) الهم العليو تبريح

غريبة حكاية الشوق البشب تلويح

إناغم زولو نص الليل

وإتوسد غنا (الكاهلي) الحنين وفصيح

وغريبة حكاية الريدة البقت تجريح

تكوس الهمسة من ذاتاً

بقت مربوطة بي زولاً ضنين وشحيح

نسيمات العتامير الهاجة طول الليل

تجرجر في أساها كسيح

تولول .. صوت بكاها وحيح

مناها تقابل الرفقة التشد وتريح

تقالد فيها نسماتكِ

وتختر بيها لي زمناً بهيج وفسيح

نسيماتك تخش رويحاتنا قبّال صريف النال

وقبّال ما إصدح النبَّهان لي ناسو البخبرو وصال

تهدهد لي دواخلنا المعرّش فيها تل حزناً

مكوّم من دميعاتن ضناها سؤال

حليل الراحو في درب الهوى الما طال

حليل الراحو من عشاً غشاهو (البوم)

وعربد في رباهو (جُهال)

حليل ( طير الرهو ) رحّال

حليل التاه إفتش عِزو في صي القبور ولوال

وحليل أيامنا يا الزولة الدعاشك فال