|
|
 Re: الود الجميل (علي طاهر) يكتب للبنى الحسين (Re: فيصل عباس)
|
إلى الأستاذة لبنى أحمد حسين ،،، مع التحية ...
يا لُبنى ،، بت أحمد حسين
هاكي الكلام الشين و زين
كل الكلام الفي القليب
نزفو اليراع
مطلوقة فينا كلاب سكك
خرباشة تمسك في الجروح
و تزيد جروح الروح وساع
بوليس ، طبنجة و امنجية
ما بعرفو غير أمرك مطاع
ياخ بنطلونك أحلى من
زيف الوطن ..
و شدرة كضب تثمر خداع
مستورة ياخ و ما عليك
إلا الدجل محتاج بناطلين تسترو
محتاج كمان كمين قناع
الطيبة ياخ طيبة النفوس
الطيبة في وشك ملامح من أمان
ما بتعرف الخوف المشاع
يا بنية قالو الايثانول
ناكر هويتو في وطن
مرتاد ضياع
طيارة ياخ معقولة بس طيارة قال
طيارة بتطير في سما الإفك
المبطن بالضلال محتاج جناحين للصراع
مقصودة فيك الكلمة تمرق من حشاك
باردة بتطمن في النفوس الما لقت
حق القلم و المسطرة كراسة لي درس العصر
باردة بتطمن في النفوس الما لقت
فول الفطور و رغيفة في وقت الغدا
و فول العشا ..
باردة بتطمن في الرويحة السافرت من غير وداع
مقصودة فيك الكلمة تمرق من حشاك
حارة بتتش جوف الظلم تحرق حقيقة الجرح كي
حارة بتتش وش البشاع
مقصودة فيك الكلمة تمرق من حشاك
طلقة بتنيش جسم الوهم الفينا ساكن من زمن
ما لاقي زول يقولو هاك طلقة شجاع
مقصودة فيك الكلمة تمرق من حشاك
ليمونة لي البطن الطمام
الما لقت ليمونة في الوطن الزحام
ليمونة تزرع في طمامنا الامتناع
مقصودة فيك الكلمة
تمرق من فوهة القلم المعمّر
ضد قوانين الخنوع و الانصياع
يا لُبنى ،، يا بت الحسين
ياخ اكتبي عن كل زين
ياخ اكتبي عن أي شي
شايفاهو شين
و حكيك يا بت يا وطن
صاب القلوب بالالتياع ...
علي طاهر
|
|
 
|
|
|
|
فيصل عباس
فيس بوك
تويتر
انستقرام
يوتيوب
بنتيريست