القاء القبض على كابتن المريخ فيصل العجب ظهر اليوم

Quote: ياخ العجب ده (سونغ) كابتن ومدافع الكاميرون في عز أيامو ما قدر يقبضو ! تقول لي نيابة مصارف ! هي النيابة دي بتقبض والا بتستصدر أمر قبض .. كدي نفهم النيابة دي شغلها كيف لأنو يا عمك عندنا شيكات كتيييييره مكتوبة .. شئ أقساط عربية وشئ أقساط LCD وشئ أقساط أثاثات !! العجب ده يسلفك انت وكل العاملين في النيابة وحلتكم كلها ! ياخ بيتو في المهندسين براهو بمليار تقول لي شيك بستة ألف جنيه ! 6 ألف جنيه دي أخدا حافز كورة مازيمبي وهو قاعد في المستشفي ! أشتل أرح لسه ! كلكم ذي بعض .. معتصم محمود وما شاكل ذلك ! ستة ألف جنيه دي بدفعا ليهو أقل مشجع .. خليك من الوالي والا الدقير والا ود الياس !! ياخ أقسم بالله لو أنا حاضر الموقف ده كان دفعتها ليهو .. كان أتسلفا بدفعا .. الموضوع ده عاااادي أنا شخصيا" لي صديق كان عندو شيكات أقساط سيارة مع البنك الأهلي .. الشيك رقم 12 ما قدموهو ناس البنك وبعد انتهاء الأقساط أكتشفو الكلام ده ورجعو لحسابو عشان يسحبو القيمه لقوهو ما مغطي فقام قدموهو لنيابة المصارف عشان تعمل (أمر تكليف بالحضور) لأنو البقبض البوليس بعد التحقيقات يا عمك وليس النيابة فهي جهة تحقيقية وبتحدد المادة التي سوف يتخذ بها الأجراءات في مواجهة المتهم .. المهم ما علينا .. قام صاحبنا اكتشف انو الشيك ده رقم 12 بينما هو مسدد لغاية الشيك رقم 36 !! فقام سدد المبلغ العليهو .. وبس .. يعني الغلط كان من البنك يا أستاذنا !! ده كوم وافشائك أسرار عمل احدي الجهات العدلية وانت موظف فيها كوم تاني ! انت يا حبيبنا محضر والا وكيل نيابة والا كاتب عرائض والا محاسب والا مسئول اعلامي والا كان عندك أمر تكليف بالحضور وجيت النيابة والا شاكي والا شنو بالضبط ؟ وبعدين الشيك كاتبو العجب للبنك نظام مرابحة والا مشتري عربية بالأقساط والا بيت بالأقساط ؟ دي الحاجات الوحيدة البتكتب فيها شيكات للبنوك .. خلاف كده كلها شيكات تكتب للأفراد أو الشركات وفي حالة ارتدادها تصبح الحالة جنائية ولا دخل لنيابة المصارف بها !