|
|
 Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي (Re: نادر الفضلى)
|
تحية وسلام للحضور .....
وده رأي ود عبد الماجد
Quote: ناس المريخ ..قالوا عاوزين يطلعوا من ازمة سيكافا ..البطولة التي كان بطفوا فيها الانوار وبولعوها.
* سيكافا يا جماعة .. ..البطولة التي اصيب فيها طمبل والعجب وامير دامر ..وظهر فيها وارغو بمستوي اقل من الخمسة دولارات ...ناهيك عن الخمسة مليون دولار.
* سيكافا يا عالم ...البطولة التي اكدت ان (رادان)...علي رأي الزميل عمر مكابرابي ...ممثل سيما ..جاء ليجلس في كنبة احتياطي المريخ.
* سيكافا يا ناس ..التي قدمت لنا لاعب اسمو (الدافي)...ما عندو اي علاقة بي اسمو.
* دافي شنو؟...انتوا بتلعبوا في الاسكيمو.
* السبت قرب ...والحالة بقت عليهم صعبة شديد.
* ناس الوصيف سيكافا دخلت عليهم ..بقوا ما عارفين يعملوا شنو؟.. يتصرفوا كيف؟.
* السبت قرب شديد.. وعاوزين ينسوا سيكافا.
* قاموا عملوا شنو؟.
* قاموا مشوا ليهم لي واحد كدا ..قالوا ليهو ...غشنا عليك الله.
* غشنا زي ما بتغشنا كل مرة.
* نحن ما بنقصر معاك.
* قول اي حاجة ...انت موش قلت لينا قبل كدا ...(والي قطر شكاوي مطر) ..وما شفنا اي شكوي.
* مع ذلك صدقانك.
* وانت موش قلت لينا قابيتو تسجيلو ما قانوني ..وصدقناك رغم ان قاببيتو لعب ضد الاهلي المصري..وما حصلت اي حاجة.
* قال (قاصر) قال ...نحن عاوزين نعرس ليهو.
* وانت موش مشيت اليمن ..وشفت ام الصلوي والقابلة التي ولدت امه..وقلت ما ممكن الزول دا يلعب في الهلال ..ومع هذا لعب الصلوي.
* ولا تأخذ علي بالك.
* وانت موش جبت وكيل كلتشي ومحاميه الفرنسي ..الذين اكدوا انهم سيوصلوا الموضوع حتي الفيفا.
* الموضوع ما طلع من الكلاكلة اللفة.
* لا شفنا فيفا ولا يحزنون ..كمل كلتشي فترته في الهلال ثم انتقل للعب للمريخ.
* مع هذا صدقناك ..انت غشنا بس ..نحن ما بنقصر معاك ..محتاجين لي زول يغشنا.
* قول اي حاجة.
* تذكر داريوكان ..الطلع هو ذاتو قاصر.
* وريتشارد الذي اكدتم انه سوف يتسجل في المريخ.
* اتكلم قول ...طلعنا من جو سيكافا (البارد) دا.
* قول اي حاجة ...نحن حالتنا صعبة شديد.
* غشنا يا ابوالشباب... انت مالك بس ..نحن بنصدقك.
* قول لائحة سيكافا التي اخترعوها بعد انتهاء الزمن الرسمي للمباراة ..لائحة صحيحة وقانونية...بنصدقك نحن.
* اي حاجة يعملها جمال الوالي قانونية ..وما فيها اي مشكلة.
* البصمة ..ما تجيب سيرتها ...حاجة عادية بتحصل ..يعني شنو لو زوروا في (بصمة).
* الروس عندهم تزوير (البصمة) زي شراب الموية.
* لكن ما بالغت ...نحن روس.
* اتكلم ..قول.
* قول ان فلقة حكم الراية ونزيف دمو ..امر بسيط وما فيه اي مشكلة ..وما بلغي المباراة ...عشان حكم الرأية دا في الدوري الهندي ..تصوروا ممكن يكفنوه في المباراة ويدفنوه بين الشوطين ..والمباراة تستمر عادي وما تتوقف.
* في الدوري الافغاني ...حكم الراية ممكن يقطعوا قطيع ..ويحسب مسؤول امريكي كبير في قناة الجزيرة ..ان هذا التقطيع يرجع لتنظيم القاعدة.
* والمباراة تستمر ..اكتر من عادي.
* حكم الراية شنو العاوزين تعلموا ليهو توم وشمار.
* يعني شنو لو جمهور المريخ فلق حكم الرأية.
* بعدين تعالوا هنا ..انتوا القال ليكم منو ..الفلق دا جمهور المريخ ...دا جمهور سيكافا.
* الطوبة الفلقوا بيها حكم الرأية قالوا طلع فيها شعار مازمبي.
* كمان انتوا ما عارفين جمهور سيكافا.
* قول حاجة ...قلنا ليك غشنا ..نحن بنصدقك.
* انت مالك بس ...غشنا.
* عاوزين نطلع من الحتة دي.
* قول لينا ..المريخ لو قدم شكوي .. في حكم مباراة الموردة سنار والرابطة كوستي..بكسب نتيجة المباراة.
* قول لينا ..خريف هذا الموسم ..الواحد ممكن يطعن فيها ..ويكسب المريخ.
* قول اي حاجة... غشنا...نحن بنصدقك.
* قول لينا بيتر جيمس دا عندو عشرين اسم ..وما ممكن يلعب في الهلال بالاسم الواحد عشرين.
* لاعب هو والا شهر ..العندو 30 اسم.
* انت قول بس.
* قول لينا ..شارع العرضة فيه خلل هندسي ..ممكن يكون ذلك سبب كافي كافي لاعادة مباراة المريخ واتراكو.
* غشنا بس يا ابو الشباب ..والله بنصدقك.
* قول لينا ...كوبري المك نمر ..بنزل في تقاطع ..ودي حاجة غلط ..عليها الموضوع دا لو اترفع للفيفا ..ممكن يعتبروا تسجيل كابوندي في الهلال غير قانوني.
* قول انت بس.
* وانتوا يا ناس الهلال ..برضو اتحركوا ..قولوا اي حاجة ..نحن برضو بنصدقكم.
* اصلو نحن بنصدق اي زول.
* لو في زول قال لينا برج الفاتح ..رحلوه من شارع النيل ونقلوه لي الكلاكلة ...عشان الكهرباء هناك ما بتقطع ..بنصدق.
* اي حاجة نحن بنصدقها.
* لو في صحفي قال لينا (كرومة) عندو حفلة في المسرح القومي ..ما بنقول ليهو حاجة.. بنصدقو ونمشي نقطع تذاكر الحفلة ونقعد في الكراسي القدام وننتظر (كرومة).
* وقت يظهر لينا الفنان (احمد الصادق)..بنقول اكيد في غلط في تذاكر الحفلة ..ما بنقول اكتر من كدا.
* قول بس ...غشنا يا ابو الشباب.
* قول لينا نجيلة الهلال تموها من شارع عبيد ختم.
* عبيد ختم ذاتو نجيلتو جابوها من وين؟.
* انت قول ..ونحن بنصدقك.
* قول لينا سيكافا دي احسن بطولة في العالم ...وبطولة الاندية الاوروبية للابطال ..بتجي بعد بطولة سيكافا.
* ليك علي ..نصدق.
* قول لينا ..(المطرة) الصبت دي وشفناها بي عيونا ..دي ما مطرة.
* دي شنو طيب؟.
* دي نجيلة استاد المريخ ..بسقوا فيها.
* اصلو نحن طيبين ..و(صفوة) ...اي حاجة بقولوها لينا بنصدقها.
* انت غشنا بس.
* نحن حالتنا متأخرة ...محتاجين لينا لي (غشة).
* عاوزين لينا غشة كبيرة كدا ..تتطلعنا من صدمة سيكافا دي.
* غشة تخلينا ندخل مباراة القمة بي شوية معنويات.
* ريحنا يا ود الناس ..بي (غشة).
* قول لينا حاجة (افيانية) كدا.
* قول لينا مثلا ..اعارة دي سوزا ما صحيحة.
* بنصدقك ... كابوندي دا ناس امير دامر وسفاري ..ما بقدروا عليه ..ساعدنا بالغشة.
* قول لينا اعارة امولادي غلط ..قول اي حاجة ..اقطع لينا اي حاجة من رأسك ..جيب لينا اي مستند ..ان شاءالله (فاتورة نفايات)...وخلي الباقي علينا.
* نحن بنتم الناقصة ..وبنصدقك.
* سادومبا دا ناس موسي الزومة ما بقدروا عليه ..الشيء دا ما بمرقنا منو شيء غير عدم وصول (الكرت).
* غير كدا ..ما في حاجة بتثبتو.
* ريح لينا اعصابنا ...غشنا بس.
* سيكافا دي دخلت فينا (شفقة) ...الواحد بقي يشوف الباب المن خمسة ضلف زي (الملاحة).
* ماسكانا (رجفيبة) ...الواحد بقي يوقف (الركشة)...تطلع ليه (تاكسي).
* امبيلي دا شتت افكارنا ..بقينا اي تلفون نضربو ..نكتشف اننا ضربنا تلاتة تسعات.
* الواحد لو عاوز يضرب البيت ..بلقي نفسو ضرب تلاتة تسعات.
* نحن نعمل شنو؟..نحن نتصرف كيف؟.
* اقول ليكم حاجة.
* تسجيل كابوندي ما صاح.
* طق ...طق ..طرق طق.
* وتسجيل سادومبا ذاتو ما قانوني.
* طق ..طق ..طق ..طرققققققق طقققققققققققققققق.
* يلا ..ان شاءالله حد ما حوش ...تسجيل امبيلي ذاتو غلط.
* طق..طق...طق..طق...طرقققققققق طققققققققققققققققققققققققققق.
* وعشان ترتاحوا في عضمكم ...تسجيل هيثم مصطفي برضو ما صحيح.
* لا..لا..لا...دي بالغت فيها.
* خلاص الهلال ح يلاقي المريخ بتشكيلة تتكون من ايجا في حراسة المرمي ..جعفر بركية وغسان فتح الله ..ومنير امبدة وصدام الدروشاب وصدام كسلا وصالح عبدالله وسولي شريف.
* بس لو غلبناكم بالتشكيلة الناقصة دي ..ما تقولوا لينا (غسان فتح الله)..ما مسجل.
* غايتو عندكم جنس طبع.
* بعد مسرحية اعارة دي سوزا ومسرحية اعارة امولادي.
* وبعد مباراة القمة القادمة ..اتوقع ان يقدم مجلس المريخ شكوي في نجيلة الهلال.
* يقولوا شنو في الشكوي.
* يقولوا ناس الهلال بسقوا نجيلتهم (موية صحة).
* ولو الهزيمة كبيرة ..يمكن يقدموا شكوا في (السياج).
* يقولوا شنو في السياج؟.
* يقولوا اي حاجة ..يقولوا سياج الهلال البلجيكي فلق حكم الراية في مباراة المريخ ومازمبي.
* تصدقوا ..لو قالوا كلامهم دا ..برضو بنصدقهم.
* نحن التصديق دا اصلو ما بنقصر فيه.
* انتوا تعالوا هنا ...انتوا ما ملاحظين حاجة.
* الايامات دي في (برد).
* كمان جابت ليها برد.
* خلاص الموضوع بالنسبة لينا منتهي.
هوامش
* اللاعب الوحيد في المريخ ..الذي يمكن ان يصرح ومعنوياته في السما ..هو اللاعب بلة جابر.
* غايتو يا بلة جابر الله مرقك ...كابوندي دا ناوي يطلع ليك اعارة الي (النسور) جبل اولياء.
* عرفتها.
* موسي الزومة ..قالوا بفتش ليهو في مخارجة.
* رأيكم شنو يا الزومة ..نعيرك وتمشي تلعب في نيجيريا.
* احسن ليك من (السكوفة) البتعملوا فيها دي.
* يا اكرم الهادي سليم ..يا ريت كان بقت علي (البرد).
* الشيء مع البرد ..جابت ليها (مطرة).
* فاضل (السبعة).
* سبعة في عينك.
* بطولة سيكافا ..ضيف الشرف الحقيقي فيها كان (وارغو).
* كانت هناك مزاحمة من كريم الدافي حول الفوز بجائزة (ضيف الشرف) ..لكن وارغو استطاع الفوز بالجائزة في الجولة الاخيرة.
* ما وجده لاعبو الهلال من مساندة جماهيرية في مباراة الهلال والمقاولون ..وما وجده اللاعبون من مساندة في مباراة الهلال امس امام الخرطوم ..يكفي بالنسبة للاعبين ..للدخول لمباراة القمة بمعنويات قوية وبدافع جماهيري كبير.
* لذا فلا تهتموا كثيرا بما يردده البعض عن سيطرة مجلس المريخ علي تذاكر المباراة.
* علي مجلس المريخ وجماهيره ان يتذكروا ان مباراة الرد سوف تكون في (المقبرة).
* ولا عذر لمن انذر.
* بعدين ناس اتراكو ديل ..هل كان معهم جماهير عندما فازوا علي المريخ في نهائي سيكافا ..البطفي وبولع.
* خوض فريق الهلال مباراة ودية في كل اسبوع ... سوف تجعل بدلاء الهلال في كامل جاهزيتهم ..وبرواية كامبوس سوف يصبح في الهلال فريقين.
* ايفوسا ..اثبت نجاح صفقته.
* ايفوسا ورقة ضرورية ورابحة للهلال في مباراة القمة ..نتمني ان يبدأ به كامبوس.
* الكمبسة ما بوصوه.
* الزول عارف شغلو.
* يوم السبت ان شاءالله سوف تتجدد احزان سيكافا.
* الجميل ان الحزن سوف يكون في نفس المكان.
* الرد كاسل من كي لي كي.
* تجربة المقاولون العرب افادت الهلال كثيرا.
* نتمني ان تكون تجربة الهلال امام الخرطوم امس هي الاخري مفيدة.
* الرائع في تلك التجارب انها جعلت جماهير الهلال يتدافعون بقوة لمساندة فريقهم وتشجيعه وفي ذلك سند قوي للهلال.
* عليه فان الهلال لو افترضنا انه لم يستفد من التجارب فنيا فان استفادته معنويا كانت كبيرة.
* جماهير الهلال اذا حرمت من الدخول لاستاد المريخ ..فان جماهير المريخ سوف تكون عامل سلبي علي فريق المريخ..اذ ينتظر ان يحدث شغب في الملعب منذ الهدف الثالث.
* اكرم دا ما في زول تاني بستناه ليكم..عشان تصل المباراة للرقم سبعة.
* خبر عاجل: كرت (البرد) وصل. |
http://goansport.net/article/id/20910
|
|
 
|
|
|
|
|
| العنوان |
الكاتب |
Date |
| اضبط : الاتحاد النيجيري يؤكد وجود تزوير في طلبي إعارة كواريزما وامولادي | mohanad haimoura | 07-15-09, 10:11 AM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | حمزاوي | 07-15-09, 10:19 AM |
 Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | tmbis | 07-15-09, 10:28 AM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | حمزاوي | 07-15-09, 10:40 AM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | Maawya Hussein | 07-15-09, 10:53 AM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | mohanad haimoura | 07-15-09, 10:56 AM |
 Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | Maawya Hussein | 07-15-09, 11:00 AM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | mohanad haimoura | 07-15-09, 11:50 AM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | mohanad haimoura | 07-15-09, 11:39 AM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | الصافي بشير الصافي | 07-15-09, 11:05 AM |
 Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | رغيم عثمان رغيم الحسن | 07-15-09, 11:12 AM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | Maawya Hussein | 07-15-09, 11:19 AM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | 7abib_alkul | 07-15-09, 11:27 AM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | mohanad haimoura | 07-15-09, 11:35 AM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | Maawya Hussein | 07-15-09, 11:55 AM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | mohanad haimoura | 07-15-09, 12:03 PM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | حمزاوي | 07-15-09, 12:10 PM |
 Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | abas | 07-15-09, 12:19 PM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | mohanad haimoura | 07-15-09, 12:32 PM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | Maawya Hussein | 07-15-09, 12:54 PM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | abuguta | 07-15-09, 01:11 PM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | ALGARADABI | 07-15-09, 01:35 PM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | عبد الرازق سعيد | 07-15-09, 01:32 PM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | عبد الرازق سعيد | 07-15-09, 01:57 PM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | humida | 07-15-09, 02:33 PM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | haroon diyab | 07-16-09, 06:56 AM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | mohanad haimoura | 07-16-09, 09:09 AM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | mohanad haimoura | 07-16-09, 09:12 AM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | محمد مصطفى | 07-16-09, 11:25 AM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | نادر الفضلى | 07-16-09, 08:23 PM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | بشري الطيب | 07-16-09, 08:47 PM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | Abd Alla Elhabib | 07-16-09, 11:25 PM |
| Re: اضبط : الاتحاد النيجيري يؤكد وجود تزوير في طلبي إعارة كواريزما وامولادي | mohanad haimoura | 07-18-09, 10:22 AM |
|
| |
بشري الطيب
فيس بوك
تويتر
انستقرام
يوتيوب
بنتيريست