محمد عادل ازيك ياخي القصة الجاية دي كان ما لفق مع موضوع البوست ما تشتغل بيهو ...... مرة جاني واحد لقاني بشرب في كوكاكولا عبوة القزازة وبمزاج شديد رافع رجليني في الكرسي القدامي صرخ ليك فيني "ياراجل اتق الله".. اتهجمت ونطيت واستعدلت بسرعة في قعدتي .. واتجاهلت صدري وقميصي المبلول بالكولا وسالتو .. في شنو؟ قال لي يعني ما عارف البتشرب فيهو دا شنو؟ طبعا للحظة شكيت في روحي وجاني احساس انو بتاع المحل اداني ويسكي بدل الكوكاكولا وبكل تردد قلت ليهو كـ وكـ ـاكولا فاردف بسرعة انت ما قريت المكتوب علي القزازة دى شنو؟ وبعدين ياخي ما صاح منك كمسلم انك تساهم في مساعدة اليهود لضرب الاسلام طبعا الجزء التاني من الجملة قرب لي الصورة شوية لمعرفتي بالجدل الدائر انو مالك شركة الكوكاكولا يهودي وبالتالي يجب مقاطعة اليهود وهذا بالضبط ما قام به (امام المسلمين) المشير جعفر نميري وقتذاك إلا ان الشق الاول من الجملة أدخلني مرة اخرى في ربكة التخمين.. ياربي المكتوب عليهو شنو؟ لم يتركني صديقي عرضة للتخمين ويبدو انه اخيرا وجدني متلبسا بجريمة محاربة الاسلام فخطف الزجاجة من يدي وقربه من وجهي بعد ان وقف خلفي لتسهيل عملية الشرح والمتابعة بل هناك عامل انني قمت بافراغ ثلاث اربع السائل قبل مجئ صديقي سهل عملية الشرح فاردف صديقي وهو يتحدث من خلفي ياخي القزازة اليهود كاتبين عليها (لا إله ولا محمد) جلست كالابله مركزا في الكتابة الدقيقة الخاصة بالمكونات دون ان أجد الجملة فصرخ بزهج واضح من بلاهتي يا بني ادم ركز علي الكتابة البتقول (كوكاكولا) بالاحرف الكبيرة.. ما شايف لا إله مكتوبة واضحة كيف وتابع القراية للنهاية حتلقاها لا محمد يا جماعة دي ورطة شنو دي يعني لو طلبت بيبسي مش كان بقيت من الذين يتقون الله؟
وهنا لا بد من ايراد ملاحظة مهمة لفهم ورطتي التاريخية: صديقي يقف خلفي وهو يمد يده بالزجاجة لتكون امامي وامامه والمطلوب مني الان ليس قراءة المكتوب امامي بل اختراق الزجاجة بنظري للجانب الاخر حيث جملة كوكاكولا والتي هي الان في وضع معكوس.. ثانيا علي تجاهل ان الكلمة مكتوبة باللغة الانجليزية وأفتراض ان الاحرف عربية وفي العربية يجب ان اكون ملما بكل انواع الخطوط .. وانا يا كافي البلا غير الخط البكتب بيهو دا ما بعرف التكتح ثالثا وبعد كل هذا الجهد والشرح لم استطع قراءة تلك الجملة بس عشان اريح صحبي لعنت ليك سلسبيل اليهود وابوخاشم ليس لكتابة الجملة التي قرأها صديقي ولكن لانهم اظهروني امام صديقي جاهلا لا أفقه الخط الكوفي من الاغريقي غير اني لم أترك صديقي يهنا كثيرا بهذا الانتصار حين باغته بسؤال يعني يا فلان نحن خلاص اليهود ديل نحن حاربناهم و قدرنا عليهم لامن بقينا نفتش عليهم جوى قزايز الصودا؟ تأكد صديقي حينها انني من سكان النار وابتعد سريعا وهو يهمهم
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Shams eldin Alsanosi
فيس بوك
تويتر
انستقرام
يوتيوب
بنتيريست