|
Re: مفكر مصري يتوقع انفصال دارفور خلال خمس سنوات (Re: ادم الهلباوى)
|
الأخ فيصل .. الكلام الدلقتو فوق ده كلام كبير خلاص .. ما عارف إذا إنت مستحضره بكل أبعاده ، ام مجرد تداعيات لما قرأت .. خليك قريب مني واديني إنتباهك .. إن سألتك جسمك المادي ده البث فيه الحركة و الحياة شنو ؟ ح تقول دي روحي الأداني ليها ربي .. بنفس القدر الجسم المادي للكرة الأرضية بكل خارطته الجغرافية الموزعه في شكل دول وتجمعات بشرية .. برضو عنده طاقه محركاه .. واخد بالك .. الجهة المسيطرة علي الطاقة دي وفي إيدها كل خيوط اللعبة سبعة او ثمانية شركات عالمية .. ديل يافيصل هم الحاكمين العالم .. كيف ؟ بسيطرتهم التامة علي كل موارد النقد .. يعني مافي قرش حايم في العالم ما بمر بي تحت إيدهم .. ح تقول لي طيب وين الحكومات اللبرالية والشمولية والعسكرية الي أخر القائمة .. ح اقول ليك ياخي دي كلها وجوه تنكرية للوجه الحقيقي الحكام العالم .. هم بوزعوها بين الشعوب ويعطوا كل شعب الوجه الذي يناسبه .. المهم الوجوه دي كلها لازم في النهاية تستمد طاقة وجودها من الأصل .. بعباره بسيطة لا زم تأخد وتدي مع الأصل برضاها او بغير رضاها ، بعلمها او بدون علمها .. وعشان الحكومات دي ما تمرق من تحت يدهم بتحكموا عليها بتحكمهم في النقد من جهة والأجهزة الأمنية المنتشرة في كل الدول والمرتبطة بعلمها او بدون علمها بإستراجيات أمن هذه الشركات ومصالحها الإقتصاية .. للأسف الشركات دي كلها صهيونية .. ما تقول لي تاني رجعت بينا لنظرية المؤامرة .. أيوه تاني وتالت .. لانه النظرية دي القالوها ما قالوها ساكت او جابوها من فراغ .. لكن للأسف لحقوهم سريع وحاربوهم بتسفيه نظريتهم من جهة .. وتكميم أفواهم من جهة أخري .. راجع ردود إخوانا الفوق .. أغلبهم عنده إحساس بإن المسأله دي شائكة .. صدقني أسع حيطلع لي واحد في البوست ده .. ويطلعني ببساطة زول مهترش ساكت وبتاع تخريجات .. المهم .. نرجع لموضوعك .. صدقني نحن شعب وحكومه تايهة .. أصدق وصف لحالنا هو حال ( الكوكو ) المهموز العرضه أخونا شكوكو.. ما فاهمين كوعنا من بوعنا في السياسات الدايره في العالم من حولنا .. يستوي في ذلك عمر البشير والنفر ود خليفة .. منصور خالد وأنا وإنت و محمد احمد( التربال ).. شيخ حسن وسيد صادق والمرغني و ومناوي وزعيم الجنجويد .. حتي لو إفترضنا إنو في حد من المذكورين عارف الحاصل حولنا .. ده معناه إما مركب لينا وش تاني ، او مكمم .. مع إحترامي وتقديري لهم .. أما بقية الشعب لا عارف لا عايز يعرف .. ما تقول لي ياخوي ما لو كلامك بقي تخزيلي وجارح .. عارف الجراحه لو ما حصلت ما أظن نعالج مرضنا الماشي كل يوم مستفحل .. بس اوعك تقول لي الخمج بتاع الحركات المسلحة .. او الإتفاقات المهزومة البتعملها الحكومة دي نوع من الجراحه .. كل البيحصل ده بأكد قولي الفوق ده بأننا شعب وحكومه تايهه .. طيب يا فتك إنت.. ( الكلام موجه لنفسي ).. بعد اللجغ ده كله راجنك وإنت ( لسع بتقرا في جريده ) ما فاهمين عايز تقول شنو ؟ عايز أقول .. الحاكمين العالم صنفوا بلدنا ولصقوا ليها طابعة مكتوب عليها ( بلد خلاء ).. بالمناسبة دي المرة التانية العالم يلصف فينا الطابعه دي .. المره الأولي أخر القرن التاسع عشر ، وكانت النتيجة الغزو الثنائي ( المصري الإنجليزي ).. ما تستعجل وتفهمني غلط .. الناس المؤيدين التدخل الخارجي او العقوبات والمعارضنها الإتنين شايتين لمصلحة النظام العالمي الجديد .. أكثر مثال واقعي حي قدامك العراق .. طبعا سمعت بالنظام العالمي الجديد .. ده البرنامج النازلين بيه الثمانية الكبار الممثلين للشركات العالمية الحاكمة .. وعايزين يعيدوا بيه حكم العالم للمية سنه القادمة .. كيف يصنفوا بلد مسكونه بأنها خلاء ؟ بصنفوها خلاء لما البلد تكون واسعه وكبيره وخام والناس الفيها برضو خام .. زمان كان العالم الجديد ، ثم أستراليا .. الأن ما في بلد ما مكتشفه .. لكن في بلاد خاماتها واسعة ومواردها ممتازه وناسها شوية ومتخلفين .. فوق كده رباطهم الوطني ما قوي ونزاعاتهم الداخليه كتيره .. ناس ذي ديل حرام نخليهم يحرموا العالم من موارد هامه ويعطلوا مكتسباته الحضارية .. تبقي الخطوه الأولي نمكن فيهم حكومة تزيد الفرقه بينهم وتولع نيرانه .. لكن البلاد دي فيها أقليات متعلمه ديل لازم نشوف ليهم حل .. كيف ؟ نسلط عليهم حكوماتهم تضيق عليهم وتكرهم العيشه .. في نفس الوقت نفتح ليهم منافذ للهروب من البلد .. كده بنكون كسرنا إحتمالات وجود تجمع من المتعلمين يعملوا علي إفشال الخطه .. عشان تتأكد من الحته دي كدي أعمل إحصائية .. وشوف المتعلمين من سن 35 الي سن 60 - كم النسبة الموجوده منهم في البلد وكم النسبة خارج البلد..
ح تسألني .. شنو دليلك بأن بلدنا مصنفه خلاء .؟ 1- التركيز علي إشاعة سلبياتنا وإظار تخلفنا وفشلنا السياسي ، الإنساني ، الصحي بكل وسائل الإعلام . 2- تحجيم دورنا العالمي والإقليمي وإظهارنا أمام كافة المنتديات العالمية بمظهر المدافع عن الباطل .. 3- تقييد صوتنا الإعلامي بحيث لا يصل الي العالم .. 4- تجاهل أخبار الدوله المركزية واعطاء اولوية للأخبار المتعلقة بالمشكلات الطرفية وإبرازها بإسم منطقتها لا بسم السودان .. 5 - تجفيف كافة وسائل الإعلام من ذكر أحوالنا الإقتصادية والسياسية حتي أحوالنا المناخية لا تذكر ضمن أحوال دول العالم .. ( لاحظ المسأله دي مشاركه فيها حتي القنوات العربية ).. 6 – لاحظ عندما تعرض خارطة العالم في أي أخبار او نشرة جوية تجد أن البلاد الوحيده المابكتبوا إسمها ولا إسم عاصمتها هي السودان والصومال .. 7 – عرقلة أي خطط تنمية ومحاربتها بكل الوسائل .. 8 - قفل أبواب التمويل العالمي لأي مشوع حتي وإن تعلق بخطط السلام .. 9 - الحيلوله بكافة الطرق لإضعاف الإراده الشعبية وكسر مقاومتها وعدم تمكينها لتغير النظام بإرادتها الحره .. دي النقاط الظاهره للعيان وما خفي أعظم ..
عارف يا فيصل .. زمان أنا قايل ناس الجبهة الإسلامية ديل أذكي مجموعة سياسية في السودان .. لكن إكتشفت إنهم برضوا مخمومين زيهم زي عامة الشعب السوداني .. وإنه تنظيمهم بما تميز بيه من تماسك استغلوه رأس رمح لتحقيق أهداف العالميين الكبار .. طبعا كبار العالم ديل عارفين طبيعة الشعوب ودارسين الوسائل البسكتوهم بيها .. يعني مثلا في شعوب بحجموها بلقمة العيش ، وفي شعوب بغروها وبلخموها بمظاهر التكنلوجيا الإستهلاكية ، وفي شعوب بسكتوها بالمال .. بالنسبه للشعب السوداني التكتيكات دي كلها ما بتمشي عليه.. عشان كده فكروا في الجانب الروحي .. عرفوا أنه المدخل ليه ما بتم الا من هذا الجانب .. عشان كده سلطوا علينا ناس الجبهة .. بشرط إنهم يجوا للسلطة بإنقلاب وليس بالإنتخاب لانه إنتخابهم بديهم قدر من الحرية والملاواة .. لكن الإنقلاب بخليهم تحت قبضتهم ويمكن الإستغناء عنهم بمجرد ما يكملوا الدور بتاعهم .. طيب شنوا الدور المفروض يلعبوه ناس الجبهة عشان الشركات العالمية تضمن إنها وضعت يدها علي عروق الإقتصاد السوداني .. شعار أسلمة الإقتصاد .. الشعار ده بمكنهم من إقامة البنوك والشركات والمؤسسات المالية بإسم الإسلام .. ولإنها بإسم الإسلام لزوا ليها المؤسسات وبيوت المال الكبيره الإسلامية في العالم العربي والإسلامي .. لإنه البيوت دي أصلا تحت قبضتهم .. علي كده تكون المؤسسات المالية السودانية خاضعه مباشرة لرأس المال الإسلامي وبطريقة غير مباشرة لبيوت المال العالمية العامله تحت إدارة الشركات الكبري .. بعد ما يكملوا أداء هذا الدور يمشوا الشارع .. ويفقد العساكر القاموا بالإنقلاب نصيرهم المضمون ومن ثم يخبطوا شمال ويمين بحثا عن حليف سياسي جديد .. المرحله دي إستثمروها في إثارة المزيد من المشكلات والنزاعات وفرض عقوبات بإسمها والعمل علي تفكيك النسيج الإجتماعي الي أن تنهار الدوله .. طيب الشغله دي ربما تثير غضب جهات بعضها لها مصالح إقتصادية وأخرين أمنهم الإستراتيجي مرتبط بالسودان .. هؤلاء لا بد من تحيدهم .. كيف ؟ ده بجيبني راجع لكلام المصري الجبته فوق ده .. لكن قبل كده خليني أديك تصور للوجود المصري في السودان .. أشقائنا ديل موجودين بينا ، في أحزابنا السياسية ـ في منظماتنا - في حكومتنا - في كل مفاصل دولتنا ، الوزارات ، المصالح ، الخدمة المدنية ، التعليم ، الصحة ، الجيش ، الأمن ، الشرطة ، البنوك ، الشركات ، السوق ، الحقل القانوني ، الإتحادات والنقابات ، ومن الناحية الرسمية في السفاره والقنصلية وإدارات الري .. يعني بإختصار كده كل شيئ عننا مرصود عندهم .. من الشمال لأقصي الجنوب لأقصي الشرق .. يمكن الجزء الوحيد الماكانوا مهتمين به الجزء الغربي .. ده لتلاته أسباب : 1 - مافي فرع من فروع النيل ينبع او يمر بالغرب .. 2 - عامل نفسي ناتج عن خلفية تاريخية هي إندلاع الثورة المهدية من هذا الجزء .. 3 - الإعتقاد الراسخ والمدعوم بإعلامهم بأن مصر هي بوابة السودان للعالم .. بالمناسبة الإعتقاد الأخير ده هو الدفع العالم الغربي يفكر في تنفيذ خطته إنطلاقا من مصر ولهذه الغاية جمعت المعارضة السودانية .. لكن قراءات إستراتيجية دفعتهم يعدلوا عن ذلك منها الخوف من أطماع مصر نفسها .، فاتجهوا شرقا لإرتريا .. فجأة حصلت موافقه اوربية ( فرنسيه ) فتحت أمامهم بوابة الغرب .. لقت مصر نفسها في وضع حرج وشعرت بالبساط يسحب من تحت قدمها فسارعت لتجد منفذ في الغرب وما زالت .. والموضوع الكتبه أخونا المصري ده برضوا داخل ضمن المساعي ... كذلك تصريحات عالم ( ناسا ) المصري ( الباز ) عن البحيره المائية في دارفور وتسليط الضوء عليها علي الرغم من إنها معروفه من زمان بين علماء السودان ترمي في نفس الإتجاه .. زياده علي كده حكومتنا الميمونه من ضمن الضغوط العالمية المفروض تحققها قبل أن تغادر ، أن تساعد في تحقيق أمن مصر .. كيف ؟ أقول ليك .. إسرائيل ليس كما نظن هي المهدد الأول لأمن مصر .. المهدد للوجود المصري علي خارطة الكون هو هذا السد العالي .. واخد بالك .. وتهديد السد مش حال ومباشر لكن يمكن أن يكون كذلك حتي أواسط القرن الحالي لا بسبب عداءات دول ولكن بسبب طبيعي سواء كانت زلازل او إطماء .. إذا كان نسبة الإطماء في خزان مثل خزان القربة لا يساوي في سعته التخزينية 2% من سعة السد التخزينية ، أضعف موارده خلال اربعة عقود الي نسبة الثلث فكيف يكون حال السد حتي اواسط القرن الحالي .. يبقي الهدف الرئيسي هو السعي بكافة الوسائل لإغراق شمال السودان عن طريق عدد من الخزانات والسدود يمكن إستغلالها في تخفيف الضغط علي السد إذا حدث مكروه بحانب تقليل نسبة الإطماء في البجيرة .. الدلائل علي الكلام ده تلقاه في عدد من البوستات الإتكتبت في هذا المنبر إبتداء من تحليلات مشاريع السدود والإغراءات التي قدمها وزير الدفاع للمصريين بجانب الكثير عن تفاصيل مؤامرة محاولة إغتيال الرئيس المصري .. التي ما زالت تثير شكي ليس حول مشاركة جهات سودانية .. لكن اقول ليك حتي الشاركوا كانوا مخمومين ومفتكرين اللعبة حقتهم ..
مش قلت ليك نحن مهترشين .. أهو مليت ليك البوست عشان ما تحتجه تاني .. مودتي .
|
|
|
|
|
|
|
العنوان |
الكاتب |
Date |
مفكر مصري يتوقع انفصال دارفور خلال خمس سنوات | فيصل نوبي | 06-30-07, 08:30 AM |
Re: مفكر مصري يتوقع انفصال دارفور خلال خمس سنوات | فيصل نوبي | 06-30-07, 08:31 AM |
Re: مفكر مصري يتوقع انفصال دارفور خلال خمس سنوات | فيصل نوبي | 06-30-07, 08:35 AM |
Re: مفكر مصري يتوقع انفصال دارفور خلال خمس سنوات | فيصل نوبي | 07-01-07, 09:21 AM |
Re: مفكر مصري يتوقع انفصال دارفور خلال خمس سنوات | Faisal Al Zubeir | 07-01-07, 02:18 PM |
Re: مفكر مصري يتوقع انفصال دارفور خلال خمس سنوات | فيصل نوبي | 07-01-07, 06:05 PM |
Re: مفكر مصري يتوقع انفصال دارفور خلال خمس سنوات | تماضر الخنساء حمزه | 07-01-07, 06:10 PM |
Re: مفكر مصري يتوقع انفصال دارفور خلال خمس سنوات | عبده عبدا لحميد جاد الله | 07-01-07, 06:25 PM |
Re: مفكر مصري يتوقع انفصال دارفور خلال خمس سنوات | فيصل نوبي | 07-03-07, 06:40 AM |
Re: مفكر مصري يتوقع انفصال دارفور خلال خمس سنوات | فيصل نوبي | 07-03-07, 06:41 AM |
Re: مفكر مصري يتوقع انفصال دارفور خلال خمس سنوات | Tragie Mustafa | 07-01-07, 06:20 PM |
Re: مفكر مصري يتوقع انفصال دارفور خلال خمس سنوات | عبد الله عقيد | 07-01-07, 06:31 PM |
Re: مفكر مصري يتوقع انفصال دارفور خلال خمس سنوات | نيازي مصطفى | 07-01-07, 07:03 PM |
Re: مفكر مصري يتوقع انفصال دارفور خلال خمس سنوات | Tragie Mustafa | 07-01-07, 07:17 PM |
Re: مفكر مصري يتوقع انفصال دارفور خلال خمس سنوات | فيصل نوبي | 07-03-07, 06:46 AM |
Re: مفكر مصري يتوقع انفصال دارفور خلال خمس سنوات | Mahjob Abdalla | 07-01-07, 08:00 PM |
Re: مفكر مصري يتوقع انفصال دارفور خلال خمس سنوات | Mahjob Abdalla | 07-03-07, 03:04 AM |
Re: مفكر مصري يتوقع انفصال دارفور خلال خمس سنوات | ASAAD IBRAHIM | 07-03-07, 03:18 AM |
Re: مفكر مصري يتوقع انفصال دارفور خلال خمس سنوات | فيصل نوبي | 07-03-07, 06:49 AM |
Re: مفكر مصري يتوقع انفصال دارفور خلال خمس سنوات | Abubaker Ahmed | 07-01-07, 08:42 PM |
Re: مفكر مصري يتوقع انفصال دارفور خلال خمس سنوات | القلب النابض | 07-01-07, 10:47 PM |
Re: مفكر مصري يتوقع انفصال دارفور خلال خمس سنوات | فيصل نوبي | 07-01-07, 11:30 PM |
Re: مفكر مصري يتوقع انفصال دارفور خلال خمس سنوات | ادم الهلباوى | 07-02-07, 00:15 AM |
Re: مفكر مصري يتوقع انفصال دارفور خلال خمس سنوات | محمد على طه الملك | 07-03-07, 02:03 AM |
Re: مفكر مصري يتوقع انفصال دارفور خلال خمس سنوات | فيصل نوبي | 07-03-07, 07:10 AM |
Re: مفكر مصري يتوقع انفصال دارفور خلال خمس سنوات | قرشـــو | 08-06-07, 07:55 AM |
Re: مفكر مصري يتوقع انفصال دارفور خلال خمس سنوات | wd al geran | 08-06-07, 08:21 AM |
Re: مفكر مصري يتوقع انفصال دارفور خلال خمس سنوات | فيصل نوبي | 07-03-07, 06:54 AM |
Re: مفكر مصري يتوقع انفصال دارفور خلال خمس سنوات | فيصل نوبي | 07-03-07, 06:51 AM |
Re: مفكر مصري يتوقع انفصال دارفور خلال خمس سنوات | Ashraf El Bagir | 07-03-07, 07:02 AM |
Re: مفكر مصري يتوقع انفصال دارفور خلال خمس سنوات | عبده عبدا لحميد جاد الله | 07-03-07, 08:25 AM |
Re: مفكر مصري يتوقع انفصال دارفور خلال خمس سنوات | Asma Ali | 07-03-07, 10:58 AM |
Re: مفكر مصري يتوقع انفصال دارفور خلال خمس سنوات | Ahmed Mohamedain | 07-03-07, 11:05 AM |
Re: مفكر مصري يتوقع انفصال دارفور خلال خمس سنوات | Faisal Al Zubeir | 07-03-07, 11:07 AM |
Re: مفكر مصري يتوقع انفصال دارفور خلال خمس سنوات | ابوالقاسم ابراهيم الحاج | 08-06-07, 10:00 AM |
Re: مفكر مصري يتوقع انفصال دارفور خلال خمس سنوات | فيصل نوبي | 07-04-07, 07:13 AM |
Re: مفكر مصري يتوقع انفصال دارفور خلال خمس سنوات | فيصل نوبي | 07-04-07, 07:09 AM |
Re: مفكر مصري يتوقع انفصال دارفور خلال خمس سنوات | فيصل نوبي | 07-04-07, 09:12 AM |
Re: مفكر مصري يتوقع انفصال دارفور خلال خمس سنوات | Tragie Mustafa | 08-05-07, 04:15 PM |
Re: مفكر مصري يتوقع انفصال دارفور خلال خمس سنوات | Adil Osman | 08-05-07, 06:12 PM |
Re: مفكر مصري يتوقع انفصال دارفور خلال خمس سنوات | حيدر حسن ميرغني | 08-06-07, 02:12 AM |
Re: مفكر مصري يتوقع انفصال دارفور خلال خمس سنوات | Gazaloat | 08-06-07, 05:34 AM |
Re: مفكر مصري يتوقع انفصال دارفور خلال خمس سنوات | فيصل نوبي | 08-06-07, 07:16 AM |
Re: مفكر مصري يتوقع انفصال دارفور خلال خمس سنوات | jini | 08-06-07, 08:26 AM |
Re: مفكر مصري يتوقع انفصال دارفور خلال خمس سنوات | قرشـــو | 08-06-07, 08:09 AM |
Re: مفكر مصري يتوقع انفصال دارفور خلال خمس سنوات | ابوالقاسم ابراهيم الحاج | 08-06-07, 10:11 AM |
|
|
|