مداسٌ عند عتبات القـلب

Quote: ليه يا دكين؟ قناعة شنو ومقسوم شنو في الحب يا دكين ؟ ياخ كان جاتك رصاصة طايشه معليش بنآمن بالقدر، أو ضرب خيمتكم نيزك نقول قسمتك ولو وزّعوا ليك ورق مِدَبِّل نسميهو حظّك ، لكن زولتك كان ما عرستها دي ما تبقى قسمه ، ده إهمال وتقصير مع سبق الإنهيار والتخثر ، أوعا تسمع كلام القسمه والنصيب والروليت الروسي إذا ما كان الحديث في العشق ، يا دكين إسع في الأرض وابحث عن ليلاك زهرة الليلاك تلك وما تخليها لراجل زيَّك وخليني من سالفة القدر وقصة انت لوداير بكاي ألف أهلاً بي خشوع ، ياخ المولى قال لمريم هُزي إليك بجزع النخلة في الوقت اللي كان ممكن يردم القنديله والرُطَب جنبها من الأرض للسِماك الأعلى ، لكنه استحثها أن تبذل جهدا معقولا، جل جلاله أنبت ليونس شجرة اليقطين شفاءا وهو الذي لو أراد له الشفاء قبل أن يرتد إليه طرفه إنت براك عارف البسويهو، ما قال ليهو يا يونس عد لنينوى وانتظر مراهِم أسترا زينيكا و فايتزر ، لاترضى بأنصاف الحلول والتسويات في الحب ياالعزيز، ما تتنازل عن زولك سجيلك ، كدا بتخون البينك وبينو والبينك وبينك ، دي خيانة الخليل المابتشبهك وخلّت خدر يخلخلك بي هوى الخلخال . يا دكين أنا معاك تتنازل في المال لأنو قليلو رايح وكتيرو رايح لكن الكرامة والحب ما فيهم قصة تِلتو ولا كتِلتو، الحب يا كلُّو يا كتِلتو ، أوعا تعرس ( من طرف) ، قَسَماً عَظَماً تتنازل قيراط من زولك القيراط دا يزيد كل ليله حتى يتعملق ويتفرع كالهايدرا ويغدو قارة من الأسى ، ستُثقل بقية حياتك أطنان الفجيعة ياولدي وتنطوي في قلبك حسرة ألف ميجاواط . دور الكومبارس دا في السينما والمسرح بس ، أوعا تلعبو في القلب يا دكين ، كن رمزا للمصطفِّين خلفك ودعهم يهتفون بالطول بالعرض دكينا يؤدي الفرض ، فرض الجهاد وأي جهاد غيرهن تريد؟ مُش قلنا لنا الصدر دون العالمين أو القبر حتى كدنا نناديك دكين بني صدر؟ ألم تهتف معنا في سابق العهود : بالروح بالدم نفديك يا ... أحيييييا؟ ما تشمِّت الناس عليّا أم أنك صبأت يا هذا؟ كدي نرجع شويه ليومية التحري ، مش قلت ليها : يا حبيبي عشت لي وعشت ليك هاك عهدي يا ست الريد ولم تترك كونتراتو وإلا قمت بتوقيعه وبصمت عليه بقلبك خليه خليه فتمددت فيه من الأذين إلى البطين؟ أها بتودي وشّك وين من العهود دي؟ افتدي حبك بالصمود واستعن على مرارة الصبر بالوخز بالإبر واليوجا والصدقات وفي رواية أخرى بالإيروفيد وآخر العلاج الكي ، القال ليك الرضا بالمقسوم نعمه غشّاك والعلَّمك ظلمك ظلمك ، تقعد باقي عمرك كلو وفي قلبك حاجه زي السريحه في الجِلِد وشعور كدا زي بذرة جوافه بين ضروسك ، تحس حجابك الحاجز يلطِّش في قلبك طالع نازل ، يجيبو سيرتا يجيك إحساس زي لماالطياره تهبط ألف قدم فجأة ومن الوحيح ما تستريح ، صدقني باقي عمرك كلو تتنخَّج مباري القيف زي ما بقول العارف بالحب عماد عبدالله رضي العشق عنه . أنا طوَّلت عليك ودا ما لوم لكنه العشم وبذل النصح قبل الغد للحؤول دون احتمالات النكوص والإرتخاء لأني سمعتك بتقول تعرس من طرف، حذاري يا دكين فالعرس من طرف عمل ثلاثي الإبادة ، يميتك ويميت الرفيق ويفني المسكينه العرستها من طرف التي تظل بقية العمر تلعب دور الدوبلير وتترى زفراتها حرَّى كلما دندَنتَ في حضورها ككولونيل ماركيز في عزلته الأخيرة ( جدله مملوخه وفي معالق الجوف موسو مجلوخه( معليش ، عارفك موجوع ومتَّفِق معاك إنو الحب الحقيقي أن تحب الشخص الوحيد القادر على أن يجعلك تعيسا زي ما بقولوا ، وأهو إنت ماشاء الله تبارك الله مهرجان من التعاسة يحتشد بؤسا ويقطِّر فجيعة ، عسل يا دكين وشهد ، يشهد الله ،عيني عليك بارده، ربنا يغتِّيك ، حالتك لا يُلقَّاها إلا ذو حظ دكين ، بس رجائي يا دكين ما تخذل دكين.