|
|
 Re: باطلون بمحض إرادتنا (Re: DKEEN)
|
قريتك جيت أكتب , خشيت بوست تاني , لقيتو شكلة مدورة , طار الكلام , شربت شاي تركي من زمان العثامين , ما نفع , فتحت الأيميل
بوست ناعي لي بابكر , الدفعة أربعة وأربعين فضل فيها منو ؟ حصلت واحد وأربعين , ودي حصلت خمسة وتلاتين , المحرقة , المحرقة يا دكين ..
إفادة
الباب العالي لحّقوهوا تماثيل بوذا , وبنوها الترك دولة إسلامية ديمقراطية ..
ونحنا في زيارة صديق تركي , عرضت قناة الشوو الإخبارية خبر لي مواطن مات من الجوع والبرد , بكى مضيفنا كما تبكي تلك التي طال إنتظارها لك في حلة حمد , لكن ما أقسى دموع الرجال , مضيفنا الباكي شال نفس وقال دي أول مرة تحصل في تركيا إنو زول يموت من الجوع .. قال دي ما حصلت من زمن العثمانلي .
في دارفور ..
خليها ,
في كردفان ..
برضو خليها تعال تحت شوية ..
في الجبلين ..
ودي برضو بعيدة وخارج مدى إرسال القصر الجمهوري وإستقبالو ..
في القطينة مات في معسكر الدفاع الشعبي ..
أهلو دفعوا لي كمساري الباص حق تلاتة سنة ذهاب وإياب بين الفتيحاب وبانت ( يعني بي نص القيمة تطلع معاك قيمة رحلة واحدة )
أضرب الناتج في إتنين وعشرين يوم متوسط القراية في الشهر ..
ملحوظة في المتوسط والإبتدائي كان بقطع مشوار التلاتة كيلو كداري تتخللو ونسة وشوت أكياس مهترية ممحوقة منها كلمة كيس جيلاني أدت الحق لي بائعي الأكياس في الإستعاضة عنها بي كيس نايلون فأسقطوا حق الدعاية لي صاحب المصنع ساكن دياركم بطحاء نجد , كان يشوت الكيس أو حتى حجر لحدي ما يوصل الحلة, ما كان قهر من بكرة بي قدر ما انها تسلاية على بال ما يصل البيت
أضرب حق قراية التلاتة سنين في سبعة شهور في اتنين وعشرين يوم ذهاب وإياب بي نص القيمة _ أو قيمة رحلة واحدة _ مع ملاحظة إنو الناتج قابل للتعديل علي حسب الزيادة في سعر البنزين المرتبط بي حركة الدولار في صرافات ( حسن , صلاح , محمد , وامحمد احمد ) دولار ,
القيمة الناتج دفعوها أهلو ونجح ودخل كلية الطب .
قالت وزارة التعليم العالي حينا إلا يمشي الدفاع الشعبي .
شدّيت بنطلون ومشينا حفل نجاحو , وما أخبرتنا الأقدار إنها حتكون حفل وداعو .
أكلنا صحن المرطبات وما كفانا , تميناها موية فول ورجعنا في ظلامات الحفل نبحث عن شريكة تقبل على مضض عنوسي بطالب مفلس ح يبقى مع وقف التنفيذ رب أسرة أو حتى رب ضار نافع يهديها أمل في بكرة فيهو حب حقيقي فيهو نتاج .
بعد إسبوعين جانا الناعي إنو مات بي سكتة قلبيه , رقيب المعسكر إعتبرها حركات ملكية , خلاهو مجدوع وهو لابس ميري الدفاع الشعبي القطني الكفني الباهت , زي كيس نايلون ما لقى زول يشوتو , ما لقى زول يشوفو .
أفاد تقرير الطبيب الشرعي عن الحالة إنها أزمة قلبية ..
كل الأسرة ما خبرت الأزمة القلبية إلا يوما داك .
وسكّان القصر ما علموا أن الأزمة قد تصيب حتى من تحصّنوا من دعوات المظاليم بي رب المظاليم جهراً رغم ما يعملون سرّا وجهراً .
شربنا شاي العزاء وأثبتنا ما أفدت هنا إننا شعب باطل , لكن بلا إرادة .
خارج نصّك :
تبلدينا بقى عبّاس
وقصّة عباس ما ممكن تنحكي هنا , إلا لو أدرجتها في بوست ثقافي ..
كتلوا الحفلة بتاعة وداع تبلدينا ناس ابوجهينة وخلوك تكابد أمر الكفيل ومشقة فرز ألوان إيصالات السفارة , وإنتظارا في كهفك لا تأمّلاً بل عشم يا اب عشماً مسروق .
أبنوسي
|
|
 
|
|
|
|
|
| العنوان |
الكاتب |
Date |
| باطلون بمحض إرادتنا | DKEEN | 07-11-04, 07:41 AM |
 Re: باطلون بمحض إرادتنا | الجندرية | 07-11-04, 08:26 AM |
 Re: باطلون بمحض إرادتنا | ahmed haneen | 07-11-04, 09:48 AM |
| Re: باطلون بمحض إرادتنا | DKEEN | 07-11-04, 02:35 PM |
| Re: باطلون بمحض إرادتنا | tabaldy | 07-11-04, 07:53 PM |
| Re: باطلون بمحض إرادتنا | المسافر | 07-11-04, 08:58 PM |
| Re: باطلون بمحض إرادتنا | اساسي | 07-11-04, 10:00 PM |
| Re: باطلون بمحض إرادتنا | ابو جهينة | 07-11-04, 11:17 PM |
| Re: باطلون بمحض إرادتنا | صديق الموج | 07-11-04, 11:42 PM |
| Re: باطلون بمحض إرادتنا | حسن الملك | 07-12-04, 00:54 AM |
| Re: باطلون بمحض إرادتنا | Ahlalawad | 07-12-04, 02:08 AM |
| Re: باطلون بمحض إرادتنا | Abdel Aati | 07-12-04, 01:14 PM |
| Re: باطلون بمحض إرادتنا | DKEEN | 07-12-04, 01:00 PM |
| Re: باطلون بمحض إرادتنا | DKEEN | 07-14-04, 08:44 AM |
| Re: باطلون بمحض إرادتنا | Rawia | 07-17-04, 01:30 PM |
 Re: باطلون بمحض إرادتنا | بلدى يا حبوب | 07-20-04, 01:50 AM |
| Re: باطلون بمحض إرادتنا | نادر | 07-20-04, 02:14 AM |
| Re: باطلون بمحض إرادتنا | democracy | 07-20-04, 03:47 AM |
| Re: باطلون بمحض إرادتنا | zola123 | 07-20-04, 09:42 AM |
| Re: باطلون بمحض إرادتنا | ود حماد | 07-20-04, 03:38 PM |
| Re: باطلون بمحض إرادتنا | DKEEN | 07-29-04, 03:02 PM |
| Re: باطلون بمحض إرادتنا | المسافر | 07-30-04, 10:07 AM |
| Re: باطلون بمحض إرادتنا | المسافر | 07-31-04, 02:10 AM |
|
| |
فيس بوك
تويتر
انستقرام
يوتيوب
بنتيريست