إمتداد الصحافة ... وكما نحبه

Quote: الاخ حيدر قاسم تحياتى واشواقى بلا حدود لو وقفت قدام بيتكم وختيت الخرتوش فى شدركم واتحركت شوية ومشيت جبتا الجريدة من الكشك بتاع الجامع القصاد بيت ناس حامد بريمة وانت مشمط يدين جلابيتك وعاينت كدا لمربع 25 خلف بقالة الحياة بتلقى ادم المكوجى يحت فى الهبوت وفى ناصية الشارع بيت ناس استاذ جمال لاعب المشترى زمان انحنا جيرانم بالحيطة بيت عمك سيداحمد والبعدنا ناس عمك الملك وقصادنا بتلقى بيت ناس غزلية وعمك عطا المنان خاتى كرسيهو تحت شدرة الروضة ومشغل شريط صديق احمد وفى الضهر بغيرو بشريط البعيو وكمان بلوبلو حسب رغبة نادية العويرة وفى اخر الشارع عيال تاور بلاقوك وخليك حريص عشان ناس خاطر والتجو ما يهجمو عليك وما يفكك منهم الا اولاد محجوب الخير ويزكوك فى ميدان الشبيبة اصلو هم وناس المشترى ذى الكديسة والفار والعجب كان لمو فيك اولاد البقارة فؤاد وعلى عمر والكان عاوز تستريح فى اللساتك الجم نادى الشبيبة بتسمع صوت العجايز جوة النادى ناس عمك خدر كودة والريح وخدر البوم وحسن عسل وعبدالوهاب الملك وعوض اب شرة يخرخرو فى الكشتينة وشوية عجايز تانين فى الضمنة قاعدين فى بنابر لزوم رطوبة الكرعين وبهناك حاجة ست الجيل وفاطنة الدنقلاوية شايلات جرادلن وجن الجمعية عاوزين ليهم تلاتة ترطال سكر ولوحين صابون ورطلين زيت وزينب تاور شايله حطبا وماشة فسرع تلحق البيت قبال الشمش تخش ووحدين جارين حديد الصيوان قالو حبوبة المناصير ماتت الله يرحمها والبكا خبر وعزالدين صغيرون اول الحضور فى بيت البكا ما اصلو هو بكاىىىى ؟ وعواطف حجر واقفة فى راس الشارع تسب وتسخط بنات الفلاتة الزمن دا اتقرضمن التقول ليها تعالى قشى الحوش واقرفى البلاعة تقول ليكى مرتبطة ؟ والتانية مستعجلة قادر الله ؟ وبعد العشاء قالو مافى اختشا تلقى ناس اب نورة ختو كراسيهم قدام الباب واتلمو ناس صنفرة وعمر سيداحمد وعوض موسى وصديق كراع الديك وعثمان ود الحرام ، وزاهر المسكين بجرى وبلف حول نفسو ويقول الليلة الحفلة بيه كجة فى بيت ناس صلاح النكهة واخوان جلال الصحافة تلقاهم اول! الحضور قاعدين جم المسرح وتقول الحفلة حقتم وبعد الحفلة تنتهى يقعد حفيظ يغنى ليك سهرانة ليه ياعيون وخالد ادريس يغنى يازهرة الروض الظليل واميرة بت حوا تغنى عشان الحب فى الصحافة وفى نص الليل يجو ناطين ليك محمد عوض وعلى حسين سايقين بوكسى الاسكان جاييين من مين ما بعرفو ولا هم عارفييين ، وبيت عمك جمعة الفى ضهر مدرسة 25 تلقى وحدين داخلين ووحدين مارقين بشويش وواحد بتاع كرسيدا طفى انوارو قبال ما يقيف قدام الباب اخد ليهو حاجة ومشى باقى لى ببيعو شيتا" ياكلو ؟؟ وناس اللجان الشعبية جننو خلانا ورحل الانقاذ وساعة المسلسة كان تلقى اتنين جمب العراضة واتنين جمب المزيرة لكييين ناس النظام العام حرمو الحب عشان كدا العرس بقى مسيخ ودا الخله السر كرارة يضرب عن العرس وثعلباتى اخو دبل مراتين والكان عاوز تستمع امشى معانا رحلة ويتلمو اولاد شارع الكلاب ومع شارع الوسخانين ويشتغلو فى اولاد شارع الكولات ويضحكو فيهم بنات شارع البايركس والغريبة عثمان سيداحمد جاء من 22 وعرس فى 25 والموصلى برضو جاء من 27 وعرس فى 25 واخذ وردة الربيع لاكييين لينا زمن ما شفناها وبسألو منها ناس حياة بت عز قديم واخوها جاد الله المكنيكى شايفو نازل من باص جبرة الظاهر كان فى الزرايب بفتش ليهو فى قطع غيار وكمال مريم يسمكر فى تكسى عثمان ككو وصوت الشاكوش حمانا النوم والشكلة مع النور بقارى الحداد ناس الحلة قالو مكنة اللحام خربت الثلاجات وبمناسبة المشاكل دى يا حيدر فى واحد من مربعكم دا مجننا جن شديد اسمو نادر حمى ، بالله شوفو ليهو فرصة معاكم فى امريكا وريحونا منو وما بخاف الا من واحد اسمو تاى تاى اخو قحة وسان فرانسيسكو والاسكان فيها ديسكو وصوت عمك عبداللطيف مؤذن مسجد 26 ياهو ذاتو كأنك سمعتو امبارح وحسن صالح ياها خطبتو الطويلة ديك ومامون وصلاح محجوب دايما خطبة الجمعة فايتاهم ومارقين من الحمام وجارين شعرم ينقط مويه لاحقين الصلاة وهسة عملو جامع جديد فى 22 جامع سمح سماحة ونضيف ناس عمك عبدالمجيد الفوطة والمقشاشة ما بتنزل من يدهم وسموهو جامع الدناقلة عشان حولو الدناقلة كتار اما حق 26 سموهو جامع الشوايقة عشان ناس عبداللطيف وسليمان بابكر وعبدالمنعم الباشا طول الله فى اعمارهم . والكان شفته هسه الشباب كلهم هاجرو والبنات عرسوهن وميدان المشترى بقى كلو عمارات والعيال كبرت وناس قميحة راسم ملا شيب وأيييييش بك يا حيدر وآيييييش فيه . عبدالدائم سيداحمد ، الصحافة مربع 25 و جدة السعودية .