Quote: كلامك دا بكون خلى ليه الاف من المغتربين الامدرمانيين ربطوا شنطهم للعودة القهرية لي ام در ... طبعا بعد ما دموعهم سالت و المنام ابى ليهم ... و رفقا بالأمدرمانيين يا ود حامد ....
أبوحسين، عساك مرتاح وسعيد، عمر الفاروق دا قصتو زي الحاردلو يوم قال ملعون أبوكي بلد وكلامو دا أنا عارفو قاصد بيهو شنو، أمدرماني صميم، وهو يدرك جيدا أن الوطنية لاتعني ما يقدمه لك الوطن بل ما الذي تقدمه أنت للوطن.. عندما يمرض عزيز لدينا كالأم والأب فهو في ذلك الحال أكثر ما يكون حاجة لأن نكون بقربه وكذلك الوطن، في ناس يا سيدي حتى يحبوا الوطن يشترطوا عليه أن يكون لائق طبيا صريح اجتماعيا ومرتاح ذهنيا زي ما قالت الحكَّامه بت الباتيل في رقصة الكاتم، لكن ما أن يمتحنه الدهر بالأدواء و الأرزاء وتظهر بعض الجراثيم في نتائج المختبر حتى تبتلعهم المنافي..ديل مفروض يتعلموا كيف يعشقوا الوطن ويناهضوا الحكومات الرديئة ، وكما قال مارك توين : "Loyalty to country ALWAYS. Loyalty to government, when it deserves it." هسه يا عادل كم مره قررت جديا تلملم شظايا روحك وتستِّف الخاطر المبعثر وترجع لحواشه وقطيه وعنقريب كراب لتفوز بكأس صدق مع الذات ولو مرة في العمر مُنهيا هذا الماراثون الهتك دواخلنا وكشف حالنا وخلانا ( نناجي أشباحنا والظلال).... كم مره يا عزيز؟
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة