أعتذر للجميع لنشري هذه الصور..

Quote: إحترت فى المساطب التى تمتد متترين ومسورة أو التشجير وعمل شبه حديقة خارجية تمتد مترين بعد حدود البيت ومسيجة ويقولوا ليك ناس الأراضى سامحين بذلك..تخيل بيتين متقابلين عاملين كده الشارع فضل فيهو شنو

أستاذي الجليل إسماعيل عباس،

شكرا على كلماتك في حقي ، كل حرف فيها Coversyl 5 mg (دا دوا دغت) الله لاجابو ليك ولا وراك الدغت..
لازم تبلع منو حبتين قبل ما تطلع بعربيه في صباح الخرطوم ولو بقيت ماشي ما يسمى بجهاز المغتربين
لا كوفرسيل ولا شرحبيل بينفعوك ، تمشي بإسعاف ومعاك أسطوانه أكسجين في ضهرك زي بتاعت ناس الغطس ديك
لأنو جهاز إحتمالات الخروج منو إلى الحياة تاني ما كبير، عموما أقترح أن يلحق به مستشفى أو عربية إسعاف
وبعدين صيدليه تحت إشراف اللمين العام الدكتور الصيدلاني عضو المنبر قدس الله سره وتحية خاصه
ليهو من هنا يمكن يعفيني من الضرائب ولو مره واحده ، طبعن ماممكن يعفيني من الزكاة لأنها عبادة..
الذكاة دي زمان كان بيدفعونا ليها قبل حلول موعدها .. ودا طبعا في مذهب الإمام إبن اللنغاز ..
قالوا ال عقيد بيدفع الزكاة مقدم..

والله يا إسماعيل مسألة مصادرة الشوارع لاستخدامها كما لو أنها تتبع قطعة الأرض واستعمالها كزرائب وتسويرها
وكل على هواه لدرجة إنك لازم تمسح عربيتك بزيت فرمله عشان تقدر تمر بالشوارع الضيقه ، دي حاجه ما شفتها في أي دولة.
يا سيدي ناس الإسكان والتخطيط ما أظن ليهم علاقة بالموضوع ، السالفه دي عند ناس (المُحَلِيات )، ديل عشان يشيلوا
قروش وإتاوات عملوا أي حاجه ما خطرت على بال، يعني ممكن يصرحوا بخيم وأكشاك في القصر الجمهوري زاتو طالما
في قروش بتندفع ، تتذكر الخيمه العملوا فيها مؤتمر الغمه العربي في الخرطوم؟ سمعت تحت تحت ناس المحليه قالوا عايزين
رسوم خيم و سخانه وعرق متصبب من وجه الرؤساء والملوك ، أما مسألة رحابة الشوارع ونظافتها وتنظيمها فتلك
رفاهيات لأنو ناسنا شغالين بمبدأ فقهي ( جلب الكَكَس أولى من درء الطحالب) لكن المحيرني إنو الكَكَس زاتو بيمشي وين
ونحن نخوض في الوحول لامن ركَّبنا صاجات وغرقانين في الطين بس ناقصنا المسطرين.




(أخى محمد المرتضى حامد يا عزيز...البلد تحتاج للكثير والكثير ولو ما تغيرت نظرتنا الضيقة وتعاونوا معنا المسؤولين بلدنا بتضيع مننا...)

شكرا يا إسماعيل You said it all