رأي مجرًد..

Quote: الحركة ما عملت كده , لكن و على تواضع رصيدها في لعبة السياسة السودانية - و هي الحركة صاحبة الرصيد الكبير في الكفاح العسكري - قامت إتبعت سياسة " المناطق المقفولة " على نفسها , و على " غنيمتها " النيفاشية ( و اللي أصلا ما كانت القوى التانية شريك فيها .. بل أقصيت و بمباركة الحركة نفسها ) و ضربت حولها سياج حوطة حوطة العقرب المنقوطة دون بقية القوى السياسية التانية ( مع شوية حركات ترحيبية متوجسة للإلتقاء بالآخرين ترتد دائماً خاسئة ) , مع علم الحركة بأنها و بدون الآخرين - شركاءها الحقيقيين في الهم - ممكن تكون لقمة سايغة في خشم الغول المتمرس و ضليع و خبيث و خبير في تفانين التآمر و اللولوة , و ينفرد بآلة الدولة و إمكانياتها الإعلامية و الأمنية و مفاصل الإقتصاد فيها . و بعد ما إكتشفت و هي جوه الوكر موكرة .. كيف إنها مغلوبة على أمرها و , إنه الشغلة ما تكتيك عسكري لكسب موقوت , لكنه مصير مشروع كامل و حلم أمة بحالها , برضو ما بادرت و مدت يدها للآخرين , و إنشغلت دون ذلك بمعالجة مشاكلها الداخلية و صراعاتها الذاتية , و اللي كان الغول بيغذيها و يزيد من الشق في صفوفها , و يشغل أعداؤه بأنفسهم . الحركة ما فوق النقد , و الطبطبة عليها بالطريقة القديمة بتاعتنا ديك و التابو الجاهز عندنا للتبريرات ليها و هي الشريك الأصيل الإتغاضى و سكت و بلع بإرادته - ما يجي زول يقول لي ما بإرادته - .. بإرادته خلاهم يسلبو منو إرادتو و تم كل العبث و الخروقات دي , حكاية الحركة هي الضحية دي بتكون ضحك على الدقون ساكت في ظل إستقراء صادق و واقعي . أما قصة إنه الحصل ده خطوة في الإتجاه الصحيح دي فعارف إني لو قلت جات متأخرة ح يجيك زول ناطي يقول ليك : its never too late . لا ياخ توو ليت و نص كمان , توو ليت لأنه ما عاد في زمن لرتق كامل الخرم الكبير الحصل , و توو ليت لأنه صمت الحركة كل الفترة دي يعد تواطؤ - كان بقصد وللا بغيره - ضيع الكتير على البلد و زاد الخراب . دخلت الحركة شريك و عالم بوهن و ضعف شراكته دي , و عدم تكافؤها , و أهي " بس " جمدت .. و بنفس الطريقة الميلودرامية الإنفرادية .. و زادت الطين بله . يا رجاء .. مجرد رأي ..