|
|
 Re: طلعت القمرة - مسلسل أون لاين (Re: Bushra Elfadil)
|
الحلقة الحادية والعشرون
الخيط الرئيسي (داليا وأورب )، المشهد 70
(داليا تذهب للسلام على جدها رجل الأعمال الحاج محمد خليل وزوجته جدتها شامة. تجد في البيت عمها العقيد صلاح وآخرين)
الجدة شامة: إزيك يا داليا يا بنيتي طولتي في مصر ما خلاص قربتو تنتهو من قرايتكم الكتيرة دي؟
الحاج محمد خليل: بنتك دايرة تبقى دكتورة تجي تعالج كبرنا دا كان في ليهو دوا.
داليا: إزيكم والله أول ما اخلص أجي اسكن معاكم على طول.
الجد: دا كان لقيتينا حيين.
داليا: تسلموا يا جدي .انتو لسة شباب.
العقيد صلاح عم داليا: الشاب الكان في بيتكم يوم داك الجنوبي صحي بقرا معاك في نفس الكلية؟
داليا: أيوة بدرس معاي.
الجد: منو؟ شنو؟
العقيد صلاح: مافي حاجة سالتها من واحد جا في بيتم يومداك جنوبي.
داليا: زميل دراسة إسمو أروب.
حاجة شامة: أروب؟أروب؟ الشي اسامي المسلمين كملت؟
العقيد صلاح: دا مسيحي يا والدة.
داليا: أروب ما مسيحي.
العقيد صلاح: أمال لاديني زي أهلو ديك؟
داليا:أروب مسلم.
العقيد صلاح: خلينا من اسلام المنفعة دا البدا من زمن مايو ومنظمات الإغاثة .
داليا: لكن أروب ابوه كان مسلم.
العقيد صلاح : إنتي بتدافعي عنو ليه كدا؟
داليا: لا ابداً ما في حاجة ما بدافع عنو .بس هو زول كويس جداً
العقيد صلاح: كويس ؟ خلينا من النوع دا نحن فاهمنهم كويس مافي قلوبم إلا الحقد.
(داليا لم يعجبها الحوار مع عمها تستاذن وتخرج يلحق بها الجد عند الباب ويناولها مظروفاً يربك داليا وتحاول رده)
الجد: يا بت امسكي بلا كلام فارغ معاك.
داليا: (تستلم المظروف وهي تقول) : شكراً يا جدي .ما عارفة لوما ودعتك حار على ولو جيت أودعك تحرجني.
العقيد صلاح(معاتباً): يا داليا!
جدتها شامة: مع السلامة يا بتي ما تتقطعي مننا.
(قطع)
الخيط الرئيسي( أروب وداليا)، المشهد 71
داخلي-خارجي/ليل
مع غروب الشمس
(داليا تذهب لبدور في داخلية بجامعة الخرطوم الجامعة)
(بدور ترحب بداليا وتذهبان سوياً من الداخلية للجامعة المين .هناك تلتقى بدور بياسر وتعرفه بداليا. تكتشف داليا أن بدور وياسر أصحاب هناء وعاصم)
داليا : والله الدنيا دي ضيقا. نمشي ونجي نلقى دا بيعرف دا ودا قريب دا.
بدور : سالت عاصم أول ما اتعرفت عليه عنك .الزمن طال الحقيقة. يا حليل الثانوي أيام الدورة المدرسية . نحن أصحاب أنا وعاصم وياسر وهناء. هناء عاصم قاليك عليها .
داليا: هناء ماما عرفتني عليها مع عاصم.
بدور : مع عاصم؟ مع عاصم؟
هناء : أيوة.
بدور : غريبة هناء ما كلمتني إنها قابلتك.
داليا: قابلتها السنة الفاتت في بيتنا مرة جات تساعد امي وكمان أول امس وأنا سألتها عنك وطلعت بتعرفك ووصفت لي أوضتك. الليلة جيت الجامعة ولما قالوا لي في الداخلية قلت والله إلا اصلك ونعيد صلتنا القديمة.
ياسر: لداليا إنتي بتعرفي بدور من بدري ؟
بدور : بدور بدري حلوة السجعة دي.
داليا : بدور بعرفا من الدورة المدرسية هي كانت مشتركة فيها من مدارس الخرطوم وأنا من مدارس أم درمان والتقينا هنا كنا سوا مهتمات بالمسرح. (تلتفت لبدور ) خليتي النشاط دا يا بدور؟
بدور: وين إنتي من زمن الدورة المدرسية؟ كلية القانون ما ادتنا فرصة معاها لي نشاطات زي دي خصوصاً في سنة رابعة ، ومن ناحية تانية جو الجامعة بقى مشحون بالصراعات السياسية وناس الفنون كلهم بشكو من حالة عدم الاستقرار دي.
داليا: حقيقة يا بدور كنت دار أعرفك بي ماما أنصاف عبدالحميد بتشتغل هنا في آداب.
(بدور وياسر يبتسمان)
بدور : مامتك دكتورة إنصاف صاحبتنا أنا وهناء وبالمرة بقت صاحبة ياسر و(مامة )وصاحبة عاصم.
داليا: الله .. الله .. إنتو بقيتو قبيلة هنا. تعرفي يابدور الواحدة فينا لما تسافر برة تبقى ما ناقشة .مسطحة جد.
ياسر : أنا كنت عارفك من كلام أمك عنك وكلام عاصم.إنتو عندكم أم عظيمة يا هناء والواحد سعيد إنو اتعرف عليك اليوم عشان يقول ليهو كلمة كلمتين في حق دكتورة انصاف المرأة العظيمة دي.
داليا: متشكرة يا ياسر.
بدور : نحن وهناء عضوين مؤسسين لجمعية حقوق المرأة ودا الخلانا نتعرف على والدتك وهناء من ناحية تانية طالبتها في نفس قسم اللغة الإنجليزية.
داليا: الغريبة ماما ما جابت لي سيرتك في السنين الفاتت السنة دي بالصدفة عرفت من هناء علاقتكم.وللأسف انا بقيت مسافرة كان ما كدا كنت جيت اتلميت مع قبيلتكم الرائعة دي.
بدور: الجايات أكتر من الرايحات .تسافري وتجي بالسلامة وتلقينا نحن يانا نحن.
(داليا وياسر وبدور يتحركان تجاه الكافتيريا وهم في حالة سير هادئة ).
(قطع)
الخيط الرئيسي للمسلسل -داليا واورب -المشهد 72
(داليا وأروب في الطائرة)
أروب: وداعاً يا سودان يا رائع. إجازة السنة دي كانت أجمل إجازة اقضيها في الخرطوم وتعرفي أجمل شخص قابلتوا في الخرطوم كان منو؟
داليا: عارفا .داير تقول لي أمك.قبل كدا قلت لي الكلام دا. إنت كدا بتربكني.
أروب : أربكك ليه. الدكتورة إنصاف فعلاً إنسانة مريحة ومثقفة والتعامل معها سهل .تحس بأنها بتعرفك من زمان .الزول الزي دا بيديك إحساس إنو خالي من العقد. ياسلام!(يغير الحديث ) وبعدين تعالي يا داليا إنتي أصريت على التذكرة وأنا الاسبوع الفات ما لقيت فرصة ألم فيك عشان أقنعك تخلي المسألة دي. انا لازم أدفع ليك تمن التذكرة دي عارفا ليه؟
داليا: عارفا عشان إتكال واحد على التاني مالياً بنقص من علاقة الصداقة دا رايك الدايماً بتقولو لي ونحن في المطاعم والكافتيريات والسينمات والرحلات.لو حسبنا القروش الإنت دفعتها إكراماً لي في اولى وتانية وتالتة بتجيب تمن تذكرتين .يا أروب بالله أنسى.
أروب : ما بنسى
داليا: خلاص بقبل منك هدية في أي مناسبة جاية .أتفقنا؟
أورب : بي تمن التذكرة.
داليا: والله إنت يا اروب عنيد بشكل؟
(تنظر إليه وهي تبتسم . يبتسم أروب )وهو يقول: على كلي حال كتر خيرك كتير.
( نصورهما وهما يتآنسان دون صوت وبعدها يغطان في نوم والطائرة تسبح في الجو)
(قطع)
البحث عن طه، مشهد 32
خارجي/نهار
(بدور تلتقي في موقف بصات الشمالية في أبو حمامة مع ياسر عوض الجيد .تجيء بدور من بيتهم بالصحافة مع حبوبتها عاشة.تودع حبوتها عاشة بعد ان يشتري ياسر لعاشة تذكرة وتنفحها بدور قروشا)
حاجة عاشة : امك والله ما قصرت معاي وانا ذاتي القروش عندي .(تحاول فتح محفطتها المدروعة في رقبتها).
بدور : كدي قروشك ديك خليها وديل صريهن في توبك دا عشان كان درتي حاجة في الطريق والله حاجة.
حاجة عاشة : كتر خيرك يا بتي .(تاخذ منها القروش وتصرها . يأتي ياسر لها ببعض السندوتشات والمياه الغازية)
بدور : الحاجة لا بتاكل دا يا ياسر ولا بتشرب ديل (تشير لما احضره ياسر ديل خليهن لينا نفطر بيهن أنا وانت. انا بمشي الدكان داك اجيب ليها نواشف علبة طحنية وبسكويت تتحرك)
(ياسر يساعد حاجة عاشة لتركب البص )
حاجة عاشة : إنت بتقرا صحي مع بت ولدي دي؟
ياسر : ايوة .
حاجة عاشة : سمح . ربنا يديكن العافية.
ياسر: ادعي لينا يا حاجة.دايرين نبني بيت.
حاجة عاشة: بيت وين؟ تبنوه سوا؟ كيفن؟ ياسر: أيوة سوا. بيت زوجية.
(تجيء بدور )
بدور: اها مع السلامة يا حاجة سلمي عليهم كلهم.
ياسر : مع السلامة يا حاجة
حاجة عاشة : ودعتكم الله يا الزينين. إلا قول لي يا ولد قلت لي زوجية زوجية كيف؟ إن شا الله ربنا يعدلا عليكم إنت وبدور .ودعتكم الله. يا بتي قولي لي رقية انا عافي منك.
(قطع)
البحث عن طه ، مشهد 33
خارجي/نهار
( ياسر وبدور لا زالا في الموقف والبص يتحرك )
ياسر : قالت يا الزينين.
بدور : قاصداني أنا وامي واخواتي
ياسر : إنت وامك واخواتك؟ وانا؟
بدور: إنت زين؟
يا سر : خلاص انا ما زين لكن إنت زينة الشباب يا السمحة وأنا جاييك
بدور : جاييني كديس؟ وتعال إنتا قلتا ليها شنو؟الزوجية الزوجية؟
(يبتسمان)
ياسر : خطبتك منها. بتكلم جد . بس كانت خطوبة مشفرة . قلت ليها أنا وبدور دار نبني بيت.
بدور: ياسر غنتا جنيت؟ حاجة عاشة دي بتفهم. أسة تقوم تطلق الخبر دا في البلد.
ياسرك ما تطلقه. وبعدين هي عارفا انا اسمي منو؟ ومن ناحية تالتة أنا يا بدور أهو اتخرجت وإنتي الباقي ليك سنة وتتخرجي أنا ناوي أتقدم.
بدور: تتقدم وين؟ ياسر: لي أهل بت برلومة جديدة اتعرفت عليها في الجامعة.
بدور: وين دي؟ دي منو دي؟
ياسر : تكافوا؟ (يقصد تخافوا)(يضحكان) (ياسر يستطرد)حاجة عاشة مسكينة والله. والواحد ما عارف يساعدا كيف؟
بدور : تعرف يا ياسر انا في الاجازة الكبيرة لو أصرت على حوامتا دي من بلد لي بلد حاسافر معاها.
ياسر : خلاص انا اجي معاكم.
بدور : تجي وين تجي . الناس يقولوا انا بت ولد اختها وإنت بصفتك شنو؟
ياسر : بصفتي عريس.
بدور : (بفرح داخلي حقيقي) : يا ريت يا ياسر
ياسر : والله.
بدور : والله.
ياسر :إنتي عارفا أنا بحبك قدر كيف يا بدور
بدور : وأنا بحبك بالاكتر
ياسر ك خلاص أفتكر نقوم نعمل خطوة ونكلم أمك وأهلك ايه رأيك في الشهور الجاية دي نحدد يوم بعد امتحاناتك . (الفرحة ألجمت بدور).
(تعود بدور مع ياسر للجامعة في حافلة واحدة يتكلمان بصوت خافت في مقعدين متجاورين تصورهما الكاميرا وهما في سعادة غامرة يتبادلان النظرات )
ينزلان من الحافلة ويركبان أخرى بنفس الطريقة وياسر يغني بين الحافلتين: (يا حبيبي انا فرحان..... فرحان بيك.) اما بدور فتسير صامتة وهي فرحة.
(قطع)
البحث عن طه، مشهد 34
خارجي / نهار
بعد الظهيرة
(الحاجة عاشة تصل إلى تمري. القرية على الضفة الاخرى للنهر. ابناء القرية البلد يمطرونها في البنطون بالسلام والأسئلة )
أصوت متداخلة : حاجة عاشة إزيك ...إزيك إزيك.
احد الاصوات :- حمدللا على السلامة .الناس الجيتي منهم؟
راكبة اخرى في البنطون: إن شا الله وليدك لقيتو منو خبر؟
راكب آخر جارهم في فريق التنضبة : حاج حومد خير بقى بي وراك متبشتن. ناس التنضبة نبشوهو ما خلولو حاجة .قالولو بعد ماراح ولدك دحين حاجة عاشة كمان ودرتها. قدر ما تعرض لهم وقال لهم حاجة عاشة مع مرة ولد أختها سيد احمد في الخرطوم ما ريحوهو
حاجة عاشة : كيفنك يا عثمان ؟ كيفنكم؟ كيف حالكم ؟
(مخاطبة الجميع): كيفنكم. كيف حالكم؟
آخر في البنطون: حاجة عاشة ولدك طه ما جمع؟
حاجة عاشة : (في حالة سهو تام.تردد التحية لمن قالها لها ولمن لم يقلها ولمن حاول محاورتها وتزويدها بالأخبار ): كيفنكم ؟ كيف حالكم؟
(ما أن تخرج حاجة عاشة من البنطون حتى تجد كل أهلها في فريق التنضبة في المشرع يتقدمهم زوجها محمد خير) .
محمد خير : الحاجة كيفنك؟
حاجة عاشة : حبابك
(تتداخل أصوات المرحبين بها من أهلها)
أصوات متباينة من الجموع نساء ورجال وشباب وشابات: - (الحاجة كيفنك؟ كيفنكم.إزيكم. اريت حلكم زين .ان شا الله كويسة. ما مبسوطة.اريت حالك زين. كيفك يا حاجة . السلام عليكم. مرحب حباب الحاجة خالتي عاشة ازيك امي عاشة ازيك ازيك اريت حالك زين ... طه ما جمع؟ . طه.ما لقيتي منو خبر؟ . ما قالوا لك كدي ولا كدي في الخرطوم في خبارية طه ؟)
وفجأة وسط هذا الحشد تنفجر حاجة عاشة في بكاء بالصوت العالي وهي تقول : وا حرقة حشاي فيك يا طه.طه ...طه وينك يا طه . تعال شوف حبانك ديل يا طه(تبكي وتنشنج بينما تحولت الجموع إلى جماعات مهدئة لها كل بطريقته.أما زوجها محمد خير فقد صاح في الجميع:
محمد خير : سوقوها على البيت تنجما بعدين تعالوا انشدوها .الولية راسها ما فيها ؛ دا أول ولد واللا آخر ولد يروح في البلد؟ شوف البكا والمسخرة ؟
يعلو صياح محمد خير وتنقسم الجموع بعضهم لتهديئه وبعضهم لإسكات حاجة عاشة ويتحركون من المشرع صورة من بعيد وهم واجمون بينما يعلو صوت المغني بالطمبور : (يا محمد دا بلودو وين) في ختام للمشهد.
(قطع
القريتان – قرية أم جداول ، لمشهد 33
خارجي/نهار
(هناء تقابل عاصم بمبنى كلية المعمار ويتحركان بينما عاصم يقول )
عاصم : وين يا أمورة ؟افتش ليك الجامعة شرق غرب ما لا قيك؟ ضربت في بيتكم جاني صوت الحاجة أمك ما حبيت اكشف نفسي ليها لكن عرفت إنك سافرتي
هناء : عرفتا من منو؟
عاصم : من صاحبتك واحدة هنا في الآداب .
هناء : حقيقة يا عاصم سافرت أم جداول .ما قلت ليك مسافرة نسيت الموضوع؟
عاصم : موضوع وليد ود عمتك؟ ما نسيتو.وما قايلك بتمشي كدا بالسرعة دي.
هناء : مشيت وقفتو عند حدو قبل ما يطور موضوعو لي حاجة تانية كمان.
عاصم : حسمتي الموضوع؟
هناء : واجهت وليد في بيتم بيهو .خليتو ليك زعلان دار يطق .حكاية ناس أهلى دي فضل فيها زول واحد مغترب.
عاصم : دا منو كمان؟
هناء : دا واحد ود خالتي اسمو طارق شغال في السعودية .ما شفتو ليستة سنة . شافني وقتي الفي اولى ثانوي قالوا شنو؟ رسل يخطبوني ليهو وأسافر ليهو طرد.
عاصم: واهلو جوكم؟
هناء: لسة.
عاصم : شوفي يا هناء هلا هلا على الجد. الأسبوع الجايي بجيب ابوي ونجي بيتكم بالدرب العديل نخطبك
هناء : دا شنو كمان دا عشان انا حكيت ليك بصراحة؟ قايل دا ضغط واللا شنو؟
عاصم: لا لا .عارف إنك صادقة وبتحكي بي الحاصل بالضبط لكن القرار دا فكرت فيه عشان شايف إنك الظاهر نجمة مش في حلتكم وبس لكن في الحلال المجاورة والجامعة كمان. ما سامعة باللقب الاطلقو ناس كليات الوسط عليك لما يشوفوك بالمسا؟
هناء : لقب ؟ لقب شنو كمان؟
عاصم: الملالة
هناء : دا شنو الاسم دا كمان والبقولو منو؟
عاصم :بقولو الاولاد لكن البنات بكونن سمعنو يعني صاحباتك ما عرفنو وقالن ليك عليهو ؟
هناء : ابداً ه .إلا اكان قاطعوا إنت من راسك . وبعدين دا شنو الاسم دا الكلو إيحاءات..
عاصم : قصدك ايحاءات جنسية؟ على كل حال هو اسم والسلام . عارفا الطلاب الوسط دايماً بيكون عندهم الحاجات بتجي عفو الخاطر وبكل سهولة. ما دايرا تحليل كتير. لكن الاسم دا ضربة لي اتجاهاتكم في جمعية المرأة وهي طبعاً في رايي اتجاهات أنثوية.
دالياك : تاني جينا لي نقدك غير المؤسس لي جمعيتنا؟ أنت ما عارف السنة دي اختاروني رئيستها؟
عاصم : امتى الكلام دا؟
هناء: إنت عارف ومتغابي العرفة. قلت ليك بي الخبر مية مرة.
عاصم : (يضحك) ايوة عارف والله عارف لكن غنتي كمان كرهتينا بالكلاخبر دا زي التقول مرشحة رئاسية امريكية.
هناء:بايخ!
عاصم (يضحك) : نرجع لي موضوعنا.أجيب أهلي واجيك تخلي ابوك وأمك يستقبلونا متين؟
هناء : والله ما عارفا اقول ليك شنو .فاجأتني بالخبر السعيد دا ونحن واقفين كدا (كدي أرح نقعد هناك تشير لكنبة قريبة ) عاصم؟ ما قلت مشروع زواجنا نخليهو بعد أنا اتخرج؟
عاصم : داك الزواج لكن دي خطوبة تبقى ترس قوي تحمينا من أهلك المالقو غيرك واحدة تانية ديل .تعالي قولي لي يا هناء إنتي الناس ديل العاجبم فيك شنو بالله سلاطة لسانك دي؟
هناء : وانت العاجبك شنو؟
عاصم: انا خليني غرقت في العسل (يضحكان) قلتي شنو؟
هناء :كدي خليني أفكر . بالأول طيب حأمشي بيتنا الأسبوع دا كلو أزلل العقبة بتاعة وليد دي. انا كلمتو بالواضح إني ما عايزاهو لكن ابوي بيكون متمسك بكلمتو مع عم عوض .بخلي امي وابوي يقتنعوا بي كلامي القلتو لي وليد وبعد داك بديك الضوء الاخضر .
(قطع)
القريتان - قرية ودنفير ، المشهد 11
خارجي /نهار
صباح باكر
(عوض يسافر للطيب والد هناء في الخرطوم رغم اعتراض وليد .توافق آسيا على السفر )
آسيا (لزوجها وهو يهم بالسفر قبل ان يخرج من البيت) : الكلام دا بمش ويجي لي تلقاهو طالع من زهراء .أصلها أنا عارفاها ما بتدورني .
عوض : يا ولية سيبي كلام النسوان الفارغ دا أديني العمة خليني ألحق الحافلة .
( الطيب في طريقة لباص مدني في طريقه للخرطوم وهو يلف عمامته ويسرع)
(قطع)
القريتان – ودنفير ، المشهد 12
خارجي /نهار
( عوض يطرق باب بيت الطيب في أم درمان وقت الغداء .يخرج الطيب لملاقاته ويسلمان على بعضهما بحرارة . ويدخلان. تجي ء زهراء زوجة الطيب وتسلم على عوض وتسأله عن الأحوال وتخرج لاعداد شيء تستضيفه به )
الطيب: جيت الخرطوم لعلو ما في عوجة؟
عوض : لا خير . جيت أغير حجر الطاحونة .الطاحونة دي عذبتنا شديد وكمان قلت اغشاك اسلم عليكم و بالمرة سمعت لي كلام قلت اجي أحددوا معاك.
الطيب: كلام؟
عوض : كدي حار حار النقولو ليك بتكم هناء جات عندنا يوم الجمعة الفاتت وقالت لي عوض اعتبر الكلام القالو ابوك لي أبوي كأنه ما حصل وقالت ليهو هي ما عايزاهو.
الطيب: كيفن الكلام دا؟ ما عيزاهو ليه؟ هي ما قالت لي كدا لما فاتحتها في الموضوع. قالت لي الموضوع نخليهو لما تكمل قرايتا. هناء دي مالها دار تجننا كمان؟( يصمت لبرهة ويواصل الكلام ) . خلاص أسة بتصل عليها في تلفون زميلاتها في الغرفة تجي ونشوف الحاصل شنو.( يرفع السماعة ويتصل )
الطيب: ألو أنا والد هناء الطيب. هي موجودة؟ طيب يا بنتي لما تجي من الكلية قولي ليها والدك عايزك تجي البيت.
صوت الطالبة : حاضر يا عمو .
الطيب : شكراً يا بنتي .
(قطع)
القريتان – قرية ودنفير، المشهد 13
خارجي /نهار
( العصر يذهب الطيب لمتجره في ام درمان .متجر كبير في السوق الشعبي لبيع الاقمشة .ويصطحب معه عوض)
عوض: والله يا الطيب ما شا الله تجارتك مشت لي قدام .
الطيب : الحمد لله لكن ناس الضرايب ما مريحننا .كل يوم جاييننا بي فن جديد.
الطيب ( بعد أن يجلس في الكرسي بالدكان يطلب قهوة لعوض ) : جرب قهوة السوق قبيل شربت شاي تلقاك مرمي قهوة نسيت ما كلمت الحاجة تعملا ليك بعد الغدا)
عوض : كدي خلينا في الأهم القهوة ملحوقة . اسة البت دي لو جات وقالت ما دايرا وليد ولدي فكرك دايرين نغصبها عليهو ؟ والله لا أنا لا إنت ما بنقدر على بنات وأولاد الزمن دا. انا ظنيتو أخير نسمع الكلام منها عديل إن بقى ما دايرا الولد أنا بقتنع . وبرجع لكن إن بقى لخبطة نسوان ساكت وجهجهة كلام من وليد ولدي ننجض كلامنا أنا وانت من هنا وأنا برجع مقتنع ونكن ناس خطوبة من هنا ورايح والعرس لمن تكمل دراستها.
الطيب: انا قلت ليك كلمة تاني ما بتراجع منها.
عوض : زي ما قلت ليك يا الطيب آخوي بنات الزمن دا لازم يمشو معاهن بالسياسة والهداوة. كدي خلي الكلام لي بعدين لما تجي بتك ونسالها.
الطيب : حاضر يا عوض بتسمع منها إن شا الله الموافقة .لا انا لا أمها ما دايرين ليها أخير من وليد ولدك والله.
عوض: كلامك دا زين يا الطيب آخوي .كلام رجال. دحين بعد دا خلاص ببيت معاكم ونسمع كلام البت وبقبل باكر علي حجر الطاحونة وأطّلب أهلي.
الطيب: إنت حجر الطاحونة بتشتريهو من وين؟
عوض : من نمرة تلاتة عندي زبون هناك. بشتريهو وبختر بي دربي لي الحلة.
الطيب: قولة تمشي باكر دي كدي خليها.انا برسل الولد الشغال معاي اسة رسلتو بالبوكس يجيب بضاعة من الخرطوم .لما يجي أكلمو بكرة يمشي معاك لي حجر الطاحونة تجيبوهو لي الدكان هني .وبعدين نروح انا وانت البيت تكون في ضيافاتنا يوم بكرة وبعد بكرة إن شا الله من الصباح الولد السواق يوصلك لي السوق الشعبي .
عوض : لا كدي خليني النسافر بكرة .
الطيب: لا حرم بكرة ما بتسافر.
عوض : يا الطيب يا خوي الكلام دا كيفن ؟ إنت بتحلف ساكت ؟ ما تقدر ظروفي انا كمان.
الطيبك : ولدك وليد هناك ما بقصر ليك في شغلك .
عوض: ولدي كمان إن عرفو بالجزارة .قاعد زي اولاد الزمن دا يباري لي الكوشتينة من ضل دكان لي ضل دكان. وكت أطلب منو المساعدة يقوم يسافر يفتش شغل. الشغل الزمن دا وين يلقاهو؟
الطيب: خليهو يدور زي الأولاد المتلو ولما يشتغل وولدك دا خريج زراعة أن شا الله حتشوفو .
عوض : خريجين الزراعة الزمن دا بقو أكتر من المزارعين ذاتم.
(قطع)
القريتان – قرية ودنفير ، المشهد 14
ليل/داخلي
( تجيء هناء من الجامعة مع المغرب بعد أن استدعاها والدها بالتلفون- في منتصف التسعينات لا توجد موبايلات- تجيء لتجد عوض زوج عمتها آسيا، والد وليد بالمنزل ومعه والدها يشربان القهوة تدخل على والدتها وتسلم على ناس البيت .بعد مدة يستدعيها والدها)
الطيب والد هناء : يا هناء أنا حصل اتكلمت معاك في موضوع خطوبة وليد ليك .إنت قلتي لي كلام فهمت منو إنو إنتي اسة ما مفكرة في العرس والباقي ليك سنة في الجامعة . حكاية الانتظار دي ما مشكلة كلنا بنوافقك عليها لكن عمك عوض دا جاء قال سامع ليهو كلام من وليد ولدوا .وليد قال إنتي لما مشيتي تسلمي عليهم في ودنفير قلتي ليهو إنك ما دايراهو.صحي الكلام دا يا بتي؟
هناء: ايوه صاح .
الطيب: يعني انتي ما مشيتي الحلة عشان تشوفي حبوبتك زي ما قلتي؟
هنا: أنا فعلا مشيت أنهي الموضوع ده واشوف حبوبتي. الاتنين مهمات وانا وليد دا يا عم عوض ويا أبوي والله بشوفو زي أخوي وما عندي فيه أي رأي كعب . الطيب: كدي خليهو رأيك إن كان كعب إن زين؟ إنتي بالأول ما قلتي لي دايرة اكمل قرايتي؟
هناء: عشان إنت قلت لي أديت أهل وليد ناس عم عوض كلمة.أنا وليد ما جاني وكلمني بي رغبتو في الزواج مني كان جا بالأول كان اقعنته بدل ما يدخل أهلي في الموقف دا. الوقت الإنت سألتني لي يابوي قلت بيني وبين نفسي مافي إلا أمشي لي وليد أقنعوا.وفعلاً قابلتوا وكلمتو بكل صراحة.
عوض: الطيب يا خوي الكلام دا بقى واضح وليد قال كلام و بتك أكدتو تاني شنو؟
الطيب : مافي كلام زي دا.يا بت نحن بنخليك لما تكملي قرايتك والكلام دا ما انتهى وما بنتهي بي كلمة منك .وليد دا ودعمتك وهو أولى بيك من الغريب.
عوض : الطيب أقول ليك كلام رجال ووالله ما بقبل فيه مراجعة بتك دي شيتا ما دايراهو ما بنغصبنا عليهو . لا أنا لا إنت بنقدرعلى بنات الزمن دا. علي كدا. دحين اعتبر الكلام دا منتهي.يا بتي الله يوفقك في قرايتك وتلقي ودالحلال اليسعدك.
الطيب: كيف الك...
عوض: على بالحرام ما تكمل كلامك.(هناء أدخلي لي جوة على امك يواصل كلامه مع الطيب) الكلام دا ما يدخل على علاقتنا هناء بتي ووليد ولدي ونقول مافي قسمة وأنا في قلبي والله مافي أي حاجة ولا زعلان ولاشي.كان زعلان بقعد لي بكرة زي ما طلبت مني؟ما كان مشيت بي ليلي دا للحلة.
(قطع)
باسبار يبحث عن عمل ، مشهد 49
نهار
باسبار يركب في الشاحنة بنفس الطريقة القديمة.
المساعد (مساعد السائق في الشاحنة): اركب اركب النفر بي جنيه
باسبار: ليه جنيه انا ماش أتبرا ما مسمار دي نمش ؟
المساعد : اركب خلاص اركب ادفع خمسين يلا ارح :
باسبار : خمسين ما ندفع
السائق يتدخل : عايز تدفع كم؟ (يعبر عن ضيقه) معلم الله؟)
باسبار:لا أنا ما معلم الله.
السائق : طيب شنو؟ أدفع الخمسين
باسبار : خمسين ماعندي
السائق للمساعد : ركبوا خلاص ركبو البدفها يدفها.دا عربي مقطع ساكت. يدوس على البزنزين بحرقة ويركب باسبار بصعوبة
باسبار : ما كنت عايز ترمينا تكسرنا والله ياخ ! ينظر تجاه المساعد من الخلف بغضب.
المساعد : انت ما تسرع . رميتك أنا؟ ما دا السواق سايقا انا؟ ينظر المساعد إلى عصا وسكين باسبار وفي كل مرة يقول : كنت دار ارميك انا؟ ما تسال السواق دست البنزين أنا؟ ما تسال السواق؟ وأنا بايدي شنو؟ انشا الله يركبك مجان. (باسبار ينظر بغضب مدة طويلة ثم يعود لهدوئه ويدخل في ذكرياته ومشاهداته وينقطع عن مساعد السائق) .
(قطع)
إبراهيم بطيخ ، المشهد 30
خارجي/ليل
(ينام إبراهيم قرب أحد الجوامع بالحصاحيصا ويجدون جثته في الصباح وقد مات اثناء اليوم .لا يتعرف عليه احد . صاحب أحد المتاجر شاهد جثمانه قبل الذهاب به للمستشفى يقول إنه شاهد صاحب بوكس من ناحية ودنفير يتكلم معه ويناديه يا إبراهيم . في المستشفى يتعرف عليه أحد الممرضين من أم جداول.
ينتهي المشهد بانتشار الخبر في أم جداول .
شاب : يا حاج عبدالكريم قالوا ابراهيم بطيخ مات في الحصاحيصا لقوه جنب الجامع.
شاب آخر لحاج عبدالجبار: يا حاج قالوا ابراهيم بطيخ مات.
عبدالجبار: دا كلام شنو دا يا زول ها؟
الشاب : والله قالوا مات .ناس البكاسي قالوا مات. بابكر الممرض في الحصاحيصا ضرب اكد الخبر بالتلفون.
عبدالجبار : الله يرحمو.
رجال ونساء في أم جداول يتناولون الخبر عبر الحوائط وقرب الدكاكين وقرب الجزارة وفي الخلاء
- قالوا إبراهيم بطيخ مات
- أي سمعتا بيه كلمني اللمين ود حاج عبدالكريم .
(قطع)
ابراهيم بطيخ :المشهد 31
بعض سكان أم جداول يستأجرون بصاً (كان لوري وانقلب بصاً من بصات القرى)للذهاب للحصاحيصا واحضار جثمان ابراهيم بطيخ يتقدمهم حاج عبدالكريم
بعض المزارعين والشباب من أبنائهم يقتربون من دواود وحاج عبدالكريم ويرفعون الفاتحة : الفاتحة الفاتحة الفاتحة يتدافعون ويقرأونها.
داود وبعض عمال اللقيط من شباب دارفور في كنابي الجزيرة وحاج الطيب يرفعون معهم:: الفاتحة... الفاتحة...
يتحرك بهم البص تجاه الحصاحيصا وفي لقطة أخرى يصلون على المستشفى ويستلمون الجثمان)
(قطع )
نهاية الحلقة الحادية والعشرين
|
|
 
|
|
|
|
|
| العنوان |
الكاتب |
Date |
| طلعت القمرة - مسلسل أون لاين | Bushra Elfadil | 08-12-10, 03:13 PM |
| Re: طلعت القمرة - مسلسل أون لاين | محمد المرتضى حامد | 08-12-10, 03:21 PM |
| Re: طلعت القمرة - مسلسل أون لاين | Bushra Elfadil | 08-12-10, 03:30 PM |
| Re: طلعت القمرة - مسلسل أون لاين | سلمى الشيخ سلامة | 08-12-10, 09:24 PM |
| Re: طلعت القمرة - مسلسل أون لاين | هشام كمال | 08-12-10, 09:53 PM |
| Re: طلعت القمرة - مسلسل أون لاين | Bushra Elfadil | 08-13-10, 00:37 AM |
| Re: طلعت القمرة - مسلسل أون لاين | Bushra Elfadil | 08-13-10, 00:23 AM |
| Re: طلعت القمرة - مسلسل أون لاين | سلمى الشيخ سلامة | 08-13-10, 00:42 AM |
| Re: طلعت القمرة - مسلسل أون لاين | Bushra Elfadil | 08-13-10, 05:44 AM |
| Re: طلعت القمرة - مسلسل أون لاين | سلمى الشيخ سلامة | 08-13-10, 05:58 AM |
| Re: طلعت القمرة - مسلسل أون لاين | هشام كمال | 08-13-10, 07:45 AM |
| Re: طلعت القمرة - مسلسل أون لاين | فيصل محمد خليل | 08-13-10, 08:15 AM |
| Re: طلعت القمرة - مسلسل أون لاين | Bushra Elfadil | 08-13-10, 09:13 AM |
| Re: طلعت القمرة - مسلسل أون لاين | Bushra Elfadil | 08-13-10, 09:19 AM |
| Re: طلعت القمرة - مسلسل أون لاين | Abdlaziz Eisa | 08-13-10, 11:04 AM |
| Re: طلعت القمرة - مسلسل أون لاين | Bushra Elfadil | 08-13-10, 12:50 PM |
| Re: طلعت القمرة - مسلسل أون لاين | Bushra Elfadil | 08-13-10, 01:05 PM |
| Re: طلعت القمرة - مسلسل أون لاين | Bushra Elfadil | 08-13-10, 01:27 PM |
| Re: طلعت القمرة - مسلسل أون لاين | Bushra Elfadil | 08-13-10, 01:53 PM |
| Re: طلعت القمرة - مسلسل أون لاين | Bushra Elfadil | 08-13-10, 02:27 PM |
| Re: طلعت القمرة - مسلسل أون لاين | Bushra Elfadil | 08-13-10, 02:27 PM |
| Re: طلعت القمرة - مسلسل أون لاين | Abdlaziz Eisa | 08-13-10, 03:29 PM |
| Re: طلعت القمرة - مسلسل أون لاين | خدر | 08-13-10, 05:00 PM |
| Re: طلعت القمرة - مسلسل أون لاين | Bushra Elfadil | 08-13-10, 07:47 PM |
| Re: طلعت القمرة - مسلسل أون لاين | Bushra Elfadil | 08-13-10, 07:50 PM |
| Re: طلعت القمرة - مسلسل أون لاين | Bushra Elfadil | 08-13-10, 07:55 PM |
| Re: طلعت القمرة - مسلسل أون لاين | Bushra Elfadil | 08-14-10, 09:53 AM |
| Re: طلعت القمرة - مسلسل أون لاين | Bushra Elfadil | 08-14-10, 10:12 AM |
| Re: طلعت القمرة - مسلسل أون لاين | محمد المرتضى حامد | 08-14-10, 11:16 AM |
| Re: طلعت القمرة - مسلسل أون لاين | Bushra Elfadil | 08-14-10, 11:54 AM |
| Re: طلعت القمرة - مسلسل أون لاين | محمد المرتضى حامد | 08-14-10, 12:06 PM |
| Re: طلعت القمرة - مسلسل أون لاين | Bushra Elfadil | 08-14-10, 08:32 PM |
| Re: طلعت القمرة - مسلسل أون لاين | محمد المرتضى حامد | 08-14-10, 11:11 PM |
| Re: طلعت القمرة - مسلسل أون لاين | Bushra Elfadil | 08-15-10, 08:10 AM |
| Re: طلعت القمرة - مسلسل أون لاين | Bushra Elfadil | 08-15-10, 02:39 PM |
| Re: طلعت القمرة - مسلسل أون لاين | Bushra Elfadil | 08-15-10, 02:42 PM |
| Re: طلعت القمرة - مسلسل أون لاين | Bushra Elfadil | 08-15-10, 02:51 PM |
| Re: طلعت القمرة - مسلسل أون لاين | Bushra Elfadil | 08-16-10, 08:16 AM |
| Re: طلعت القمرة - مسلسل أون لاين | Bushra Elfadil | 08-16-10, 08:18 AM |
| Re: طلعت القمرة - مسلسل أون لاين | Bushra Elfadil | 08-16-10, 04:48 PM |
| Re: طلعت القمرة - مسلسل أون لاين | Safa Fagiri | 08-16-10, 05:53 PM |
| Re: طلعت القمرة - مسلسل أون لاين | Bushra Elfadil | 08-16-10, 11:37 PM |
| Re: طلعت القمرة - مسلسل أون لاين | Bushra Elfadil | 08-17-10, 11:35 AM |
| Re: طلعت القمرة - مسلسل أون لاين | Bushra Elfadil | 08-17-10, 12:07 PM |
| Re: طلعت القمرة - مسلسل أون لاين | Bushra Elfadil | 08-17-10, 12:09 PM |
| Re: طلعت القمرة - مسلسل أون لاين | Bushra Elfadil | 08-18-10, 11:53 AM |
| Re: طلعت القمرة - مسلسل أون لاين | Bushra Elfadil | 08-18-10, 11:59 AM |
| Re: طلعت القمرة - مسلسل أون لاين | Bushra Elfadil | 08-18-10, 12:04 PM |
| Re: طلعت القمرة - مسلسل أون لاين | Bushra Elfadil | 08-19-10, 09:44 PM |
| Re: طلعت القمرة - مسلسل أون لاين | Bushra Elfadil | 08-20-10, 12:27 PM |
| Re: طلعت القمرة - مسلسل أون لاين | Sidgi Kaballo | 08-20-10, 02:34 PM |
| Re: طلعت القمرة - مسلسل أون لاين | Bushra Elfadil | 08-20-10, 03:00 PM |
| Re: طلعت القمرة - مسلسل أون لاين | Bushra Elfadil | 08-21-10, 08:24 PM |
| Re: طلعت القمرة - مسلسل أون لاين | Bushra Elfadil | 08-22-10, 02:06 PM |
| Re: طلعت القمرة - مسلسل أون لاين | Bushra Elfadil | 08-22-10, 02:13 PM |
| Re: طلعت القمرة - مسلسل أون لاين | Bushra Elfadil | 08-22-10, 02:22 PM |
| Re: طلعت القمرة - مسلسل أون لاين | Bushra Elfadil | 08-22-10, 09:52 PM |
| Re: طلعت القمرة - مسلسل أون لاين | Bushra Elfadil | 08-23-10, 07:52 AM |
| Re: طلعت القمرة - مسلسل أون لاين | dardiri satti | 08-23-10, 10:24 AM |
| Re: طلعت القمرة - مسلسل أون لاين | Bushra Elfadil | 08-23-10, 01:00 PM |
| Re: طلعت القمرة - مسلسل أون لاين | Bushra Elfadil | 08-24-10, 01:15 AM |
| Re: طلعت القمرة - مسلسل أون لاين | طيفور | 08-26-10, 11:16 PM |
| Re: طلعت القمرة - مسلسل أون لاين | محمد الكامل عبد الحليم | 08-24-10, 01:02 PM |
| Re: طلعت القمرة - مسلسل أون لاين | Bushra Elfadil | 08-24-10, 02:06 PM |
| Re: طلعت القمرة - مسلسل أون لاين | Bushra Elfadil | 08-24-10, 11:35 PM |
| Re: طلعت القمرة - مسلسل أون لاين | Abdlaziz Eisa | 08-24-10, 11:47 PM |
| Re: طلعت القمرة - مسلسل أون لاين | Bushra Elfadil | 08-26-10, 01:07 AM |
| Re: طلعت القمرة - مسلسل أون لاين | Bushra Elfadil | 08-27-10, 04:35 AM |
| Re: طلعت القمرة - مسلسل أون لاين | عصام دهب | 08-27-10, 03:20 PM |
| Re: طلعت القمرة - مسلسل أون لاين | Bushra Elfadil | 08-27-10, 04:20 PM |
| Re: طلعت القمرة - مسلسل أون لاين | عصام دهب | 08-27-10, 04:33 PM |
| Re: طلعت القمرة - مسلسل أون لاين | Abdlaziz Eisa | 08-27-10, 05:47 PM |
| Re: طلعت القمرة - مسلسل أون لاين | Bushra Elfadil | 08-27-10, 07:32 PM |
| Re: طلعت القمرة - مسلسل أون لاين | Bushra Elfadil | 08-28-10, 09:20 PM |
| Re: طلعت القمرة - مسلسل أون لاين | Bushra Elfadil | 08-29-10, 09:31 AM |
| Re: طلعت القمرة - مسلسل أون لاين | Bushra Elfadil | 08-29-10, 07:50 PM |
| Re: طلعت القمرة - مسلسل أون لاين | Bushra Elfadil | 08-29-10, 08:01 PM |
| Re: طلعت القمرة - مسلسل أون لاين | Bushra Elfadil | 08-30-10, 01:57 PM |
| Re: طلعت القمرة - مسلسل أون لاين | Bushra Elfadil | 08-31-10, 08:21 AM |
| Re: طلعت القمرة - مسلسل أون لاين | Bushra Elfadil | 08-31-10, 10:23 AM |
| Re: طلعت القمرة - مسلسل أون لاين | Bushra Elfadil | 08-31-10, 08:01 PM |
| Re: طلعت القمرة - مسلسل أون لاين | Bushra Elfadil | 09-01-10, 11:19 AM |
| Re: طلعت القمرة - مسلسل أون لاين | Bushra Elfadil | 09-01-10, 11:26 AM |
| Re: طلعت القمرة - مسلسل أون لاين | Bushra Elfadil | 09-01-10, 02:46 PM |
| Re: طلعت القمرة - مسلسل أون لاين | Bushra Elfadil | 09-02-10, 01:33 AM |
| Re: طلعت القمرة - مسلسل أون لاين | Bushra Elfadil | 09-02-10, 01:48 AM |
| Re: طلعت القمرة - مسلسل أون لاين | Mohamed Abdelgaleel | 09-02-10, 12:50 PM |
| Re: طلعت القمرة - مسلسل أون لاين | Bushra Elfadil | 09-02-10, 02:22 PM |
| Re: طلعت القمرة - مسلسل أون لاين | Bushra Elfadil | 09-03-10, 01:06 PM |
| Re: طلعت القمرة - مسلسل أون لاين | Bushra Elfadil | 09-05-10, 02:45 PM |
|
احدث المقالات بسودانيزاونلاين اليوم
| |
Bushra Elfadil
فيس بوك
تويتر
انستقرام
يوتيوب
بنتيريست