المطلقة second hand والمطلق صاغ سليم ( عشان ليه) !!!!!!!

Quote: زوجة خالي : إنت بتهظر ولا شنو البت ماخلاص اطلقت وبقت عزبا داير بيها شنو تاني ؟. حمادة : والله لو طلقوها مية مرة حتظل في نظري سلوى ذاتها وأنا متأكد إنها ما زالت بتحبني عشان كدة ما قدرت تعيش مع زوجها اللي فرضوه عليها عشان تاجر وعنده قروش وعمارات . زوجة خالي : سجمي .. سجمي .. يا ولدي الناس تقول علينا شنو ؟ غايتو يايقولو إنت طلقتها من راجلها أو يقولو عيبو شنو عشان يتزوج واحدة عزبا! حمادة : يقولو اللي يقولوه أنا ما سائل وبعدين يأأمي إنت حتهتمي بكلام الناس لمتين وسلوى الناقصها شنو إنسانة متعلمة ومثقفة وبنت ناس بتحترم الكبير والصغير أها وين ألقى واحدة بالمواصفات دي ؟ زوجة خالي: والله كلامك كله صاح ما قلت إلا الحق لكن أنا بقول يعني ولو سمعت كلامي وعرست ليك بت فتاة يكون أفضل خصوصا إنه البنات على قفا من يشيل بس إنت أشر ويجوك بدل المية ألف. حمادة : شوفي يا أمي يا سلوى يا بلاش وإنت شنو الضمنك إنه البت المامتزوجة دي تكون زوجة صالحة ؟ زوجة خالي: جرب حظك ياولدي يمكن تطلع كويسة أخير من تتزوج واحدة كانت متزوجة قبال كدا. حمادة طيب يا أمي لو أنا كنت المطلق كان حتقولي كلامك دا؟ زوجة خالي: طبعا لا .. عشان إنت راجل والراجل بفضل صاغ سليم لو عرس عشرة نسوان.