|
اقول ارجع ..واقرأ البورد اتراجع
|
كل يوم اصحى وفي نيتي الرجوع للسودان لكن بعد ما اقرأ اخبار زي ست الشاي الماتت او بالاصح قتلت أغير رأي واقول يابت مالك على الوجع الصعب ده كل يوم انا بصطبح بوجع جديد سببه بورد بكري ابوبكر
وجع سببه حالة الشاب في بوست احراج بتاع المبارك ..وبرضو اقول ارجع عشان بلدنا فيها زي الحاجة والدة صاحب البوست وبرضوا احساسه الرهيف كمان
اقول ارجع عشان السودان فيه ناس زي ود النعيم ابو اطفال المايقوما ولد كل الاباء في الضو حجوج واتراجع لما اقرا احدهم (مامتذكرة اسع اسمه يقول اولاد الحرام واولاد الحلال)
اوقول ارجع لما اسمع الشاب ود السبح في بوستات ناجي واتراجع لما اعرف ان منفذي الشريعه ابوا الا ان ينتصروا للحق والفضيله وللدولة المقدسه بجلد محمود عبد العزيز
اقول ارجع عشان اقيف مع التومة مرة عثمان كرار في حلة المخازن في الباوقة اساعدها انشاء الله بس في لم عدة فضيتها لما يجيهم السيل من الخزان الما حايقدروا الرجال من الباوقة لللجزاير يقيفوا في وش الحكومة واتراجع عشان اللجنة بتاعت الخزان يمكن يكون فيها ولد اخت التومة الذي صار يمتلك بيتا وعربة في الخرطوم وهو ولد بلد وما انا الا كنت زائرة ذات ايام حزينة لتلك البلاد ..اتراجع عشان بكاي مع التومة على عدة الفضية المن زمن عرسها على ابو صلاح لن يجدي غير واتراجع برضو لما اقرأ لود الباوقة وتاييده لمكسري عدة خالتي التومة. اقول ارجع عشان في بنت زي عواطف صاحبة الجريدة الحائطية واتراجع لما اقرأ عن مؤتمر الاعلاميين وبيع الزمم والتهافت على الرمم
اقول ارجع عشان اساعد في التغيير العملي في بلادي لاني مليت من موضوع الامضاءات في مانشيتات بكري الفوق دي خاصة انها ما حا تغير حال مع الدبابين وتجار الدين.. واتراجع لما القى ان الحاجة البتفق عليها المثقفين وبتلمهم هي العزاء و مباركة الزيجات ونجاح الاولاد
اقول ارجع لما اشوف بوستات بت حيمورة ومبادراتها الجميلة ..واحن الى الوطن عندما ترسمه صديقتي شذى ويصوره الشفيف طلال عفيفي ولكن اتراجع لما القى انه في فهم معووج زي فهم الزول بتاع بوست الغجرية داك
اقول ارجع لما اقرأ خطاب منعم بوكاندي لصلاح قوش واتراجع لما القى الشكلة بعكاكيزها بين الناس المجتهدين في العمل العام ومراكز حقوق الانسان
اقول ارجع لما اقرأ مبادرات الحاج وراق واتراجع لما اشوف فعايل ود الزومة وخال الرئيس
اقول ارجع لما اقرأ عن كردفان ام الخير الباسط في بوستات شحتو واهم بشد الرحال الى الجبال حيث استطيع ان اساعد ناس حلال عرب الحمرة والعتمور ونوبة ابوهشيم واللبو وام دورين في بناء الدونكي في النص بين الحلال والقرى عشان يسقوا الهايم وما تدخل تكسر الزرع الفي المشاريع ولكن بوستات بريمة تصيبني بالاحباط وحالة كونة بقاري فقط ودائماً مؤلمة عندما تجيك من زول خاتين عليه الرك في تغيير الحاله الصعبة. وطبعا بتراجع جدا لما اقرا انه محمد هارون هو الان والي جنوب كردفان .. ووالله وتالله انه لصب الزيت على النار والعارفين ببواطن الصراع في جنوب كردفان يعرفون هذا جيدا لكنه الاجماع السكوتي..
اقول ارجع لما اشوف انجاز لجنة توتي ممثلاً في الكبري (بالمناسبة هذا الكبري انجازا لاهل توتي والريال البدفعوهو في المركب في الذهاب والاياب وبرضو لا اصحاب الرقشات لانهم ظلوا يدفعون طراده في كل مشوار) واتراجع لما اشوف بوستات محمد فرح والسد الرد
اقول ارجع لما اقرأ عن كسلا وبورتسودان واتراجع لما ناس جبهة الشرق بدأوا يجرحون بعضهم البعض ويصبون علىه الشاكوين الحار ويبعدون عن معاناة وقر وهداليا ومتاتيب في الحصول على الماء
اقول ارجع عشان اساعد مارجريت صديقتي في جوبا في قراءة مادة الحاسوب لانها لم ترى هذه الآلة من قبل ولسخف القدر انها احد مقررات الشهادة السودانية ولكني اتراجع لان مارجريت رحلت الى الخرطوم لتبحث عن عمل وتركت الدراسة
اقول ارجع لان اخبار ماو في النيل الازرق وايضاً بعض المناضلين من الاصدقاء مثل نسيبة وهاشم مازالوا يعملون و يحلمون بان الحكومة تردم الدرب عشان ناس يابوس والمابان وقرى النيل الازرق المطر ماتقطعها من زيارة المستشفي في الكرمك او في الدمازين اقول ارجع انشاء الله بس ارفع حجر حجرين للردمية ..لكن اتراجع لان
اقول ارجع لكن اتراجع اللاف الاميال وذلك فقط لقهر تلك التي اغتصبت في مدرسة طويلة في العام 2005 في درافور
اقول ارجع لكني اعترف اني اجبن من ان ارجع
منال
|
|
|
|
|
|
|
العنوان |
الكاتب |
Date |
اقول ارجع ..واقرأ البورد اتراجع | Manal Mohamed Ali | 05-13-09, 07:43 PM |
Re: اقول ارجع ..واقرأ البورد اتراجع | Amira Elsheikh | 05-13-09, 08:19 PM |
Re: اقول ارجع ..واقرأ البورد اتراجع | حنين للبلد | 05-13-09, 08:33 PM |
Re: اقول ارجع ..واقرأ البورد اتراجع | Yassir Bainwi | 05-13-09, 08:43 PM |
Re: اقول ارجع ..واقرأ البورد اتراجع | Nasr | 05-13-09, 08:49 PM |
Re: اقول ارجع ..واقرأ البورد اتراجع | بكري الصايغ | 05-13-09, 09:14 PM |
Re: اقول ارجع ..واقرأ البورد اتراجع | Manal Mohamed Ali | 05-14-09, 02:29 AM |
Re: اقول ارجع ..واقرأ البورد اتراجع | حيدر حسن ميرغني | 05-14-09, 03:34 AM |
Re: اقول ارجع ..واقرأ البورد اتراجع | معتصم مكاوي | 05-14-09, 09:09 AM |
Re: اقول ارجع ..واقرأ البورد اتراجع | عاطف عمر | 05-14-09, 09:28 AM |
Re: اقول ارجع ..واقرأ البورد اتراجع | صلاح ليون | 05-14-09, 09:34 AM |
|
|
|