|
|
 Re: ويتواصل مسلسل حريق النخيل في القري النوبية تجاوز عددها الثلاثين الف بعد حريق الأمس (Re: عبدالغفار محمد سعيد)
|
أنا بارجح الإهمال ..
اهلنا ديل بينضفوا الجنائن وبيحرقوا الوسخ فى اى مكان
ومرات كتيرة مابيتابعوا الحرق لحدما النار تموت
بيخلوها وبيمشوا يشوفوا اشغال تانية
ومعظم الحرائق دى حصلت نص النهار والعصريات
ودى أوقات عمل والناس بتكون لافة في الجنائن والمزارع وكدة
لو حصلت حريقة بالليل مثلا كان ممكن يثير علامات استفهام
وانا تابعت الحريقة القبل دى وخسائرها كانت كتيرة
ولاقيت الأعمام المتضررين ومن كلامهم عرفت بان السبب كان اهمال
هم ذاتهم اكدوا ( نضافة زريبة ولا جنينة ما متذكرها كويس )
قذافي ع المنطلب كان عمل معاهم شغل لو لميت فيهو بانزلو
والخسائر بتتفاقم لعدم وجود عربة مطافئ
والاهالى هم البطفوها بالجرادل والتراب
اتخيل الشمالية كلها مافيها عربية مطافئ الا فى دنقلا
لحدما تصل المحس النار بتكون قضت على الاخضر واليابس
واتذكر الاهل في الحادثة الاولى ناشدوا حكومة الولاية بتوفير عربات مطافئ في عبرى ودلقو والبرقيق
لكن لاحياة لمن تناشد.. ودى الحادثة التالتة وبرضوا ماحيفكرو يجيبوا عربة مطافئ
وبرضوا ماننسى طريقة زراعتنا للنخيل
معظما مامزروعة بالطريقة العلمية المفروض تراعى فتح مسارات وممرات واسعة تحسبا للحرائق
وضف لذلك عدم تنظيف النخيل من الشتول الصغيرة والحشائش البتقوم جنبها نحن بنسميها ( كوشي )
الكوشي ده بيزيد اشتعال النار وتوزيعابسرعة رهيبة خاصة لو فى هواء
غايتو الحوادث المتكررة دى محتاجة الناس تقعد مع المحليات والشياخات وتضع ليها كمية من الاحتياطات ( غربة مطافئ وغيرها )
وكذلك بث التحذيرات بان الواحد فيهم ينضف زريبتو ولا جنيتوا في الوقت المناسب ويلم الوسخ و يحرقوبعيد
ويراقب عملية النضافة ومايمشي بعيد قبل مايتأكد من ان النار ماتت
......
والله يعوض المتضررين خيرا
|
|
 
|
|
|
|
|
| |
الطاهر ساتي
فيس بوك
تويتر
انستقرام
يوتيوب
بنتيريست