تــساؤل

طيب يا ود الخاتم .. الشغل خارج السودان مالو؟ انا شايف انو عادي الواحد يشتغل ويندعك برة السودان ده لمن زيتو يطلع .. وبرضو بدون موانئ ولا مرافئ ولا بنفسج. ياخي هنا في جزر سليمان الأنا عايش فيها دي .. الصينيين بيمثلوا قريب تلاتين في المية من السكان الأصليين .. والهنود قريب عشرين في المية .. وفيهم ناس عايشين هنا من سنة صفر هجرية .. ومعظمهم أكيد هاجروا لأسباب اقتصادية زي ما كتير مننا سافر للاسباب دي زي ما انت قلت عن حالتك .. لكن والله ما سمعت لي زول في جزر سليمان دي بيتكلم عن البنفسج ولا الموانئ ولا الرحيل ولا الهلوسة بتاعة الافندية بتوعنا ديل. ياخي نحن مثقفاتيتنا ديل ببثّوا فينا ثقافة خانعة مهزومة مفصومة تافهة مثبّطة .. الواحد فيهم لا يبدع إلا في فن البكاء وغرائب المفردات اللغوية الممزّعة. أحسن أبقى صيني والله لأن الصينيين يجيدون فن الحياة .. في الغربة بيكونوا عارفين مفروض يعملوا شنو .. يشتغلوا ليل نهار عشان يعملوا العاوزينو. أها قول لي ناس البنفسج بتاعننا ديل في طريقة عندهم للشغل؟ والله ناس عواطلية جينياً وذهنياً. ياخواننا القادر يقول كلام يحمّس بيه الناس فمرحباً .. أما الكلام التهويمي .. الذي يشجع على الهروب .. فلا والف لا
يا سيدي .. أنا بعرف شباب مفتونين بالبنفسج .. هل تتخيل انهم بيتمنوا يتسلط عليهم اي سلطان يعذبهم عشان يعانوا عذابات تروتكسي؟
علي بالدين .. مثقفاتيتنا أكبر موهومين الله أوجدهم على ظهر هذه البسيطة. وعشان أثبت ليك وهمهم وانفصامهم وانكسارهم تجاه العالم الغربي: أسأل اي واحد قول ليه بتعرف كم واحد صيني وكم ياباني وكم فيتنامي وكم اندونيسي نال جائزة نوبل في الأدب أو في أي شيء حتى؟ ونوعية كتابة هؤلاء الادباء؟ وكم واحد نال جائزة نوبل في اي شيء؟ أسأل!!!!ه انت براك شايف هنا في البورد .. البنفسج .. ما في اي زول كتب عن اي ظاهرة أدبية في اي دولة . لا في افريقيا ولا في آسيا .. مع ان هناك كثيرين في هاتين القارتين نالوا جائزة نوبل في الأدب بالذات .. وبدون أي بنفسج

الأخوة البنفسجيون .. والله انتو ناس محبِطين ومحبَطين .. بالجد محبِطين .. ومفروض الواحد يبعد أطفالو عنكم .. حتى لا تصيبه العدوى. يجب على الانسان أن يكون متفائلاً .. لكن التفاؤل ليس من نصيب الخاملين أصلاً .. ونحن اشتهرنا بالخمول بين الشعوب بسبب خاملين محدودين بنفسجيين

أها يا ود الخاتم .. أنا لقيت البوست بتاعك ده مناسب جداً عشان اتنفس فيه .. فمعذرة .. وإن أردتني أن أتركه فقل لي .. وسوف أتركه للبنفسجيين
ولك الود .. وخالص التحايا