|
الرجل الذي......اشتريت بكا ابوهو
|
دائما لما تكون ضارباني فلسة.....اقعد افكر في طرق انحرافية لجلب المال....انا اصلا عندي عادة زي الزفت....كل ما اشوف زول يعد ويحسب في قروش كتيرة..... يتخيل لي بعد ما ينتهي من الحساب يجدعهن لي....يعني بالواضح كدا يتخيل لي كدا انو القروش دي حقتي.....والراجل بارك الله فيهو داير يحسبن لي بس..وانا ظنايتني عندي رغبة دفينة في العقل الباطن بتاعي للتسول..الحالة دي قاعدة تجيني في البنوك بالذات.... اكون واقف قدام الكاشير وافتح خشمي واقعد احسب معاهو.... ولاّ....امد رقبتي..واعاين للمكنة المشلهتة ديك وتعد القروش... فكرت مرة...... انو اكون طفيلي من الدرجة الاولى.....امشي أي بيت عرس.... واقعد باللوال....اوزع العشاء مع الجماعة....وانظم الناس.... لحدي ما اقنع اهل العروس اني من اهل العريس واقنع اهل العريس اني من اهل العروس.....وبعد شوية.... اقعد في خشم الخيمة....واجيب لي دفتر وقلم وامسك الكشف....واي زول يغسل ايديهو...ويجي ماشي بي عندي ادفر التربيزة..وتقع وهو يتلف وانا الم الدفتر من الواطة....واكون خاتي لي فيهو شوية قريشات...طُعُم.....وبشتتن والقطن....زولي هنا يكون خلاص عرف دا الكشف...ويروح يدفع.... وبعدين البي يدفع شوية..... احاول اقنعو... انو القروش الدفعها دي ما بتجيب حق صحن الكوكتيل الاكلو....وحقو يصلحها شوية...والله يا ابن العم ماك طالبني حليفة....البيض الفي الكوكتيل دا حاجزنو....وهو دابو في بطن جدادو... قبال شهر.... وكلفنا والله... وبعدين انت قريشاتك دي ما بتجيب لها بيضة واحدة...وبعدين انت ماكلك صحنين...شوف عيني....زولي هنا يخجل شوية ويدفع..... اها الناس البعدو وسمعو النضم دا ما بيحوجوني في نضم تاني..... القط قريشاتي واتوكل على الله وارجع اهلي......... معانا عصابة هنا....... كل اول شهر فيهم واحد يا ميت لو ابوهو يا اخوهو يا عمو....والله بسعالني... الواحد فيهم يشيل معاك الفاتحة...وطابي دفتر الكشف في اباطو....ويزح لك عشان تقعد جنبو....ويفتح الدفتر ويقعد يعد في الناس وفي القروش..يمسخ عليك كباية الشاي......... قبل فترة..... جاني تلفون....قالو لي كلم فلان انو ابوهو مات..... وفلان دا عضو كبير في العصابة... الحقيقة انا ما هميت كيف اكلمو..... لكن فكرت استثمر البكا حق ابوهو دا.....لفيت عمتي..ومشيت ليهو..... قلت لو يا فلان..... ابوك مات....والفاتحة....وبعد الفاتحة...قلت لو ما نكتر كلامنا يا زول...... رايك شنو اشتري منك البكا دا؟..... يعني انا بديك تلاتة الف ريال كاش داون....وانت تبعد بعيد من الكشف....انا امسك الدفتر..والبي يجيبها يجيبها...... الراجل وافق...... لكن .....البقت عليّ تبقى علي كلاب الحله..... البكا الاشتريتو خسرت فيهو النص بالضبط......وزولي بعد تلاتة يوم جاني قال لي اسمع....الوالدة قالو حالتها خترة وفي الاستيببالية....اها تشتري بكم؟
|
|
![URL](https://sudaneseonline.com/db/blank.gif) ![Edit](https://sudaneseonline.com/db/blank.gif)
|
|
|
|
|
العنوان |
الكاتب |
Date |
الرجل الذي......اشتريت بكا ابوهو | سجيمان | 09-02-03, 08:26 AM |
Re: الرجل الذي......اشتريت بكا ابوهو | خالد | 09-02-03, 08:58 AM |
Re: الرجل الذي......اشتريت بكا ابوهو | سجيمان | 09-02-03, 08:21 PM |
Re: الرجل الذي......اشتريت بكا ابوهو | alfatih | 09-02-03, 10:26 AM |
Re: الرجل الذي......اشتريت بكا ابوهو | سجيمان | 09-03-03, 10:45 AM |
Re: الرجل الذي......اشتريت بكا ابوهو | ود عقاب | 09-03-03, 07:22 AM |
Re: الرجل الذي......اشتريت بكا ابوهو | سجيمان | 09-03-03, 10:17 PM |
Re: الرجل الذي......اشتريت بكا ابوهو | maia | 09-03-03, 11:20 AM |
Re: الرجل الذي......اشتريت بكا ابوهو | ابو جهينة | 09-03-03, 11:39 AM |
Re: الرجل الذي......اشتريت بكا ابوهو | abuguta | 09-04-03, 00:16 AM |
Re: الرجل الذي......اشتريت بكا ابوهو | سجيمان | 09-05-03, 00:24 AM |
Re: الرجل الذي......اشتريت بكا ابوهو | سجيمان | 09-04-03, 01:35 PM |
Re: الرجل الذي......اشتريت بكا ابوهو | سجيمان | 09-04-03, 08:13 AM |
Re: الرجل الذي......اشتريت بكا ابوهو | KANDAKE | 09-05-03, 06:48 PM |
|
|
|