أيـن تـقـضـي شـهـر عـسـلـك هـذا الـمـسـاء

طيب ، حنقفل اضنيننا بطين وعجين وكركار و ودك ، للحيقولو شهر عسل شنو بعد سنة أولى ؟ خلليكم واقعيين ! طيب خللينا واقعيين من البنشوفو قدامنا

بنشوف في دول الخليج مثلا عوايل بما فيها سودانيه كمان ، بتكون العايله فيها دزعطاشر شافع والأم والأب قاعدين في الجنينه أو في شاطي البحر ياكلو يشربو يتونسو يكوركو يضحكو ومستمتعين
ومن عدد الأولاد وعدد الشيب في راس الأب والأم باين عليهم متزوجين قبل عشرين سنه ، ديل ما واقعيين ؟

بنشوف في بريطانيا مثلا راجل ومرتو ماشين بالعكاكيز ونص خطوه نص خطوه ، وظهرهم محني كأنهم راكعين ، ولون الشعر زي التلج وحلاوه قطن البيضا
وبعد دا بتلاقيهم ماسكين ايدين بعض ، وواضح جدا أعمارهم فاتت السبعين زمااااااان ، ديل ما واقعيين ؟

شفت قدام عيني راجل ببوس مرتو المتزوجه قبل تلاتين سنه قدام أولادهم وبناتهم ، وقام حضنها وهي ما عارفه تطير وين ، دنقرت راسا في الواطه مبتسمه وخجوله تقول عذراء يادوب ماشاء الله عليهم ، ديل ما واقعيين ؟


شفت حبوبتي قبل شهر بتمسح على راس جدي وشعرو وهو قاعد زي الكديسه مستمتع بالمسح وهي كمان ، مافي داعي أورريكم عمرهم

شفت يوم تاني الشهر دا زاااتو جدي بعلق لحبوبتي في موضوع أنو وين يلاقي زيها ، وهي بترد عليو تسلم يا حاج وانته في زيك منو
ديل ما سودانيين زينا ؟ والقبلهم برضو ، والقبل قبلهم


وبنشوف في زمان قديم برضو ، رسولنا أعظم البشر ببوس مرتو وبطلع للجامع للصلاه ، شفتو الشوق البحر ؟
بنشوف رسولنا الكريم بشرب من القربه وللا الكبايه من الحته الشربت منها مرتو ، بعد ما يتأكد أنو شفايفها للمست الحته ديك ، ديل ما كانوا واقعيين وللا شنو ؟
وشفنا الرسول بيأكد لمرتو لما تسألو عن حبو ليها قدر كيف أنو زي العقده الما بتنفك ، وشفناهن بغيرو عليو كيف ، كانو خياليين وللا مستمتعين وفاهمين معنى الحياة الزوجية شنو ؟


طيب ليه نحصر الكلام عن عسل حياتنا في شهر أو سنه ؟ وليه نطمم بطن الناس المتفائلين ، عشان فشلنا نحنا في مواصلة الحب وابرازه للحبيب والحبيبه الأديناهم ترقيه وبقى اسمهم زوج و زوجه

مش قال لينا هن لباس لكم وأنتم لباس لهن ؟
لباس كيف ممكن نفكر ؟
العلاقة بين اللباس والجسد ، وبين الطرف الآخر والنفس

ومش قال لينا : وخلقنا لكم من أنفسكم أزواجا لتسكنوا اليها ؟ كييييف يعني نسكن في حاجه غير بيت الطابوق ؟ ربنا قال السكن والراحة الى الزوج أو الزوجه ، وليس في البيت المفروش المكيف ، وأنا ما حأغالط ربي

مش نبينا قال : الدنيا متاع وخير متاع الدنيا المرأة الصالحة
اتخيلوا أن خير متاع الدنيا دي كلللها الزوجة الصالحه - بس تكون فاهمه معنى الصلاح في الزواج كمان شنو - يعني كلو ، وزي دي ما حتستمتع بيها الا تكون انت برضو زي أبو الدرداء


والنبي قال خيركم خيركم لأهله وأنا خيركم لأهلي
عليك الله المانعك شنو تبقى أخير ما تكون مع مرتك ؟ والأهل مقصود بيهم هنا المرا ، البحميك شنو ، كان في حاجه حامياك يبقى اتكلم معاها قول ليها تعالي يا فلانه أقول ليك حاجه ، والله عايز أبقى ليك أحسن وأخير ما يكون ، بس الحامين وواقف في طريقي أنك كذا و كذا ، فبالله عليك ساعديني عشان نستمتع بالباقي لينا في الدنيا سوا

والنبي قال لينا رفقا بالقوارير
رفقا ياخوي ، صحي هي قد تكون حكايه زفته جدا ولا قاروره ولا حاجه ، وتناقرك وتكسرك وتكسر ليك القوارير زاتها فوق راسك ، وتطير ليك الأحاديث من راسك
بس كدي نجرب وندعو الله أنو يعيننا أنو نعرف نتعامل مع بعض وأنو الأمور تمشي زي الحلاوه ، وتقدر تزبط فرسك وتقوم على أمرها بما يسعدكما


وانتي ما سمعتي النبي قال شنو ؟ قال : ما استفاد المؤمن بعد تقوى
الله خيرا له من زوجة صالحة إن أمرها أطاعته
هسع بيني بينك أكان طعتيهو ، دا معناو أنو شخصيتك اتمرغت في التراب ؟ وأنك حطمت كبرياء أهلك الجيتي منهم ؟ بالله فكينا كدا ولا كدا ، كبرياء شنو ؟ انتي ما عارفه أنك بتقعدي عريانه قدامو يعمل الدايرو وما بتقدري على دا قدام أهلك البتنضمي عنهم ؟ طيب ما تحترمي اللحظات البيناتكم دي ؟ القال عنها النبي : يفضي اليها وتفضي اليه
طيعيو عليك الله ، الله خلق النفسيات حسب الفطره السليمه بالطريقه دي ، أنك تطيعيو مادام ما أمرك بمنكر ، جربي وشوفي النتيجه
برضو أرفعي نخرتك ووريهو أنو انتي ما بتقبلي بالكلام دا وأنك انتي وانتي وانتي ، وشوفي النتيجه
بس بالرواقه ياخواننا

ونسأل الله لكم كل الخير العسل والقشطه


وأختم بعودة الى عنوان الموضوع ، كدي نفكر كيف نختزل شهر العسل في ليلة واحده أو حتى ساعتين تلاته آخر الأسبوع

أحسن من عدمها ، والحيقول نحنا خياليين ، نقول ليو أرجع أقرا الموضوع تاني
يا خيالي يا وهم يا عاجز انته نسمع صوتكم
ورايكم