المطر اتفق معك بحواسي السته .. والحاسه الاخيرة أدخلني فيها ..شافع بيجاوي صغير عمرو في حدود ثمانية سنوات في سوق بورتسودان الكبير ..قبل 7 سنوات لحظة قدم تابلوه جميل جدا بمصاحبة السيف علي أنغام محمد البدرى ..أندهشت يا جماعة ده منو البيغني ده ..اندهشت لعدة اسباب حرفنة الشافع المصلط ده وتعاملو مع الايقاع والتعبير الجسدي وايصال فكرة محمد البدري اللحنية والايقاعية ..اندهشت تاني لصوت محمد البدري الفريد جدا ونادرو وين في خارطة الغناء السوداني ..عقدته مقارنة بينو وبين نفس الفابريتو المتوفر بكثافة عالية عند الهادي حامد ود الجبل هناك مقارنة أخري بين صوت وديع الصافي ونجوي كرم وايضا بين أنغام الساكسفون بأنواعه التينور والالطو في اثيوبيا وتفرد النغمات الصادره واختلافه من مناطق اخري حول العالم " هل لطبيعة المنطقة الجبلية علاقة في تشكيل وتمييز الصوت ..؟؟ سؤال محيرني. اما مايخص اهلنا البجا ..واللهجه البيجاوية اتمنيت كتير جدا لو اعرف حتي مفردات محمد البدري واقدر اردد معاهو او سيدي دوشكا ..وبالمناسبة الكاسيت اهداء من صديق درب بيجاوي ومستعد ارسل ليك المواد الفيهو علي الايميل الخاص بيك اذا ما عندك مانع واكون ساهمت معاك سمعيا لي محمد البدري .. شكرا اكتر فرحا يا مطر
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة