Quote: الغرب كله ( ولا اقول امريكا فقط ) وضع يده على العراق بالقوة وألقى القبض على صدام
يا استاذ سبيل متأكد من الكلام دا ؟ ياخ نحنا حضرنا الزمن دا . . . و فضلة خير المستشار " مصطفى عثمان " كان عندنا تلفزيون كمان . . .اربعتاشر بوصة ملون . . .نانو شنو ؟ الا يكون تلفزيونا دا مضروب كان كدا نمشي نرجعوا للوكالة . . . و نقطع الخرائط البتقول انو فرنسا و المانيا ( نموذجاً غير حصري ) في الغرب ، لانو مواقفها كان احسن من مواقف الولعوها او الوقفوا فراجة من عربان عرباسلامستان الديمقراطية . . . هو غرب جغرافي و لا وجداني بالمناسبة ؟ يا استاذي انا اشاركك الريبة و التوجس من الغرب المرتبط وجدانياً= على الاقل بالنسبة لي = بالراسمالية و الطغمة المالية العالمية العمرها ما ح تعمل حاجة لوجه الانسانية بل هي وجدت و قائمة على تناقض اساسي يستهدف الانسان في طبيعته الانسانية و بيئته الطبيعية ورد في الاثر في «رسالة الاسباب والعواقب» للجاحظ : «الصدق يوجب الثقة، والكذب يورث التهمة، والعدل يوجب اجتماع القلوب، والجور يورث الفرقة. . . » فهذا فراق بيني و بين الاثنين . . . في محك " العدالة الاجتماعية " اقدم التهمة على الثقة ( المعدومة اصلاً و للطرفين هنا ) لكن في محك " العدالة الجنائية " التهمة مادة لسانا لبشيرنا دا ذات نفسوا . . . و عدم صلاة الفرد ما ببرها كفر الاخر و لا شنو يا الركاب ؟
Quote: لماذا سمحوا بأن تجري محاكمتهم داخل وطنهم رغم ان امريكا كانت الدولة المحتلة والأمرة كانت بيدها وبالتالي فان القانون الذي كان يجب ان يسود ويطبق هو قانون المحتل
علاقة امريكا بقانون الجنائية الدولية شنو ؟ ان وجدت علاقة من الاساس او مجرد اعتراف ذاتو حكاية الغرب المطاط البتقلص لامريكا في السطر التاني طوالي دي دا خلط غير حذق للاوراق يا عمك
Quote: لماذا احترم الغرب صداماً والعراق والعراقيين ولم يحترموا بلادنا وشعبنا والبشير؟؟ بالله جاوبو
يا استاذنا العزيز بس كلموا لينا البشير دا يرفع جزمتوا شوية عشان نجاوب و ما ح نطلع من كلام د. منصور خالد في " عجبي ممن يؤثر العوراء على العيناء " مع اني ما عارف العيناء يعني شنوا بالضبط لكن برضو اخير من عور انو نتمنى لشعبنا ما حصل في العراق مهما كان بؤس الخيارات . . . يعني اسي الشفناه في العراق دا احترام ؟؟ و لا حكاية الجزمة و الشحادة دي الاحترام و لا اللعب على وتر السيادة و استهداف الغرب الكافر و لا شنو بالضبط فهم الاحترام ؟ كدي نشوف كلام الدكتور دا :
Quote: الهيكل المنطقي لأطروحة الكاتب قد يقود إلى النتيجة التي توصل لها، إلا أن ترويضه للمعطيات الموضوعية للوصول إلى حكم مسبق يجعل ذلك الحكم فاسداً، بل باطلاً. فالفاسد، كما يقـول الأصوليون (علماء أصول الدين)، يقع صحيحاً في جملته، ولكن تنقصه بعض الشروط ليكون صحيحاً، أما الباطل فغير صحيح من أصله. ما هي عوامل البطلان؟ توسل الكاتب للوصول إلى حكمه بأسباب لا تُحتسب إن أخضعت لتحليل عابر
اها دا تحليل على الماشي كدا :
Quote: الاختصاص الزمني 1- ليس للمحكمة اختصاص إلا فيما يتعلق بالجرائم التي ترتكب بعد بدء نفاذ هذا النظام الأساسي.
المادة 11 نظام روما الاساسي للمحكمة الجنائية الدولية http://www.aihr.org.tn/arabic/convinter/Conventions/HTML/Rome.htm اتكلمت عن حلبجة . . . و الدجيل و ما ادراك . . . و دي جرائم حصلت في التمانينات رغم ما خلف الاكمة و ما بالرماد . . . و الجدل الثار حول لماذا " قضية الدجيل " تحديداً رغم مجهرية حجمها مقارنة بحلبجة و حرب الخليج الاولى و الثانية . . . اعتقد انو دا موضوع كبير و براه مش ؟ و مرتبط بامريكا و حلفاءها الغربيين و الشرقيين لكن في قضية " المحكمة الجنائية الدولية " ما ملاحظ انو كل التهم متعلقة بدارفور ؟ يعني جرائم بعد العام 2003 م ؟ تفتكر ليه ؟ الانقاذ قبل كدا ما كان عندها جرائم ضد الانسانية ؟ . . . شفيق يا رااااااقل !؟؟ اعتقد انو الربط بين الاتنين و محاولة ترويض المعطيات بدل " ترييضها" اي جعلها في صورة رياضية في سبيل مقاربتها غير جائز منطقياً و حرام سخت قانونياً و بما اني لست قانونياً افضل ترك باب الاختصاص لاهل الاختصاص
فيا عزيزي لم استبين " الاحترام " المقصود هنا و لا اظن ضحى الغد يكفي لاني اشوف احترام في الحصل في العراق دا . . و ليه الاستسلام الغريب دا لارادة ( الغرب كله ) ؟ و فات علي برضو المقارنة بين " الجنائية الدولية " و " الغرب كله ( ولا اقول امريكا فقط )" على قولتك و التسليم بها مجاناً كدا بس او اخذها كثابت طالما انو حسب كلامك : ( البشير < صدام ) عشان نقدر نصيغ معادلة نحلها و نطلع بنتيجة منطقية ! و بما انو الخط المستقيم اقرب طريق بين نقطتين عشان نفهم خلينا نعملها معادلة خط مستقيم ( س + ص + ثابت = 0 ) بس ارسم لنا صراطاً مستقيماً نحو افقك كي نجئك . . . بس القدمته حتى الآن ما تجاوز الزعم الصاعق الزاعق
Quote: هذا هو فحوى اجراء صدور امر قبض لقائد جيش وطننا ورئيسنا ورمز سيادتنا فاي هوان واحتقار طال الجميع اقول طال الجميع فمن لم يفهم هذه الرسالة اما انه مكابر او قليل عقل
يا عمك ديل شحادين ليس في وجههم مزعة لحم منتظر منهم شنو ؟ سيبك منهم ياخ امانة عليك في احتقار و امتهان لكرامة الانسان اكتر من ظلم ذوي القربى ؟ ياخ مالهم الشحادين ياخ . . . ؟ دي ما بلادة حس انساني ساي اسي من مستشار الرئيس دا ، لما يفتكر انو بيوجه اهانة لشعبه و بيحتقر فئه انسانية كاملة ذنبها انو عاوزة تستمر في الحياة دي بشرف من غير انها تسرق او تستثدى نساؤها . . . يعني يبيعوا شاي حرام يشحدوا ووبين . . . عشان يأكدوا ليك انهم ما خابريلنا شي . . . حاكمننا فوق شنو طيب ؟ الفقر ما عيب . . . لكن السرقة عيب و حرام . . . القتل و الحرق جريمة . . . الاغتصاب جريمة . . . محاربة الناس في رزقها جريمة . . . السكوت على الجريمة ابداً ما ببقى غنيمة في الختام اكرر معاك : فاي هوان واحتقار طال الجميع
لك شكري و احترامي لرأيك و اعتذاري و اتمنى انو يكون انشرح صدرك لحدي ما وصلت هنا
------------ "رب اشرح لي صدري ويسر لي أمري. وأحلل عقدة من لساني يفقهوا قولي" صدق الله العظيم
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
قيقراوي
فيس بوك
تويتر
انستقرام
يوتيوب
بنتيريست