فرض الأرض .... (نص شعري)
أنا والغيمة .. وشوف النسمة .. ضل النيمة.. المطر القيمة.. وبعض سحاب الروح العاق. من تاريخ الصمت مرقنا .. شان واجبنا كان الفرض .. وزي طول بالنا .. كان العرض قلنا نفرتِك حزن الأرض .. لما نباصِر ها التاواق.. كنا رفاقه .. ومانا فياقه إلا الواسعة انسدت طاقه.. وايه الباقي ؟؟ دلو غنانا .. وحلم زقاق؟ وايه غير سكه .. طريق وحريق .. وهمّ في الجِتَّه .. مواسم ضيق .. ومطراً شاق.؟ حراً كافر وما بنطاق .. ديمه يلاوي الجو الفيك.. وديمه يصابحك بالنقناق.. لما يجيلك .. بهزم نيلك وقُدرة حيلك وما بتفكر في الأسباب ببقي دليلك.. حافر خيلك .. وسطوة سيلك … وشرع الغاب.. .... ... جانا الريح لافح توبو.. لابس فرده من مركوبو.. وهو المِن يومو قافل الباب !! ونَّس .. حنَّس .. كان يبرانا.. قال في الكتمة ببقي ضرانا .. ونحن لُصاصاً ما بِغبانا .. قلنا ومالو؟ .. يلا معانا إلا النسمه. المارضيانه.. شاله الشك مما جانا.. وجوفه يطنطِن .. فوت اختانا ..... ..... جاي لا جاي .. قِبلت غايتو .. إلا بتدعو .. سُترة حالو تبقي نهايتو.. لما يفارق ها التاواق. وكبّ طفّرنا .. وزاد الفينا .. إنو الفينا هو مكفينا.. ومهما يصعب ما بِكسِرنا كنا عطاشه ومريوقين.. إلا هدفنا كان كافينا قلنا نتمِّر شوف الأرض .. لما نغسِّل حزن الطين .. لما يدفِّق دمع العينه لما نقوِّم كم راكوبه .. حتماً تكبر وتبقي مدينه لما الضُل الكان أُلعوبه .. فيهُ نقيِّل .. حُب وسكينه لما مروقاً فيك مصبوبه.. ترحم شِعَباً كم مسكينه ندِّي النيل أشواق وخصوبه .. وتبقي النجمه فوقو رتينه .. غيمه وخيمة حن منصوبه.. سُتره وصُلحه .. وضروه متينه قلنا نرد الروح السمحه .. لي جوف أحمد .. وشوف حبوبه كنا بنقرا ونكتب .. وتمحي.. إيد الليل القامت دوبه كل ما نفتح نفاج فرحه.. تطلق ناره وعاتي هبوبه تقلع حلماً قالد قمحه .. وتجري تفتِّش باب التوبة! حقي وحقك .. وضاع في لمحه.. صبحاً عِزتو ما سِمعوبه ؟ وين الطِيبه .. عمَار الخُوّه ؟ وين الناس التقسِم توبه ؟ كيف جُودِيه بتصبح قوه لما تصالح ناس مغلوبة !؟ سيف الفُرقه الطاعِن جوّه .. حال الأرض الكم مقلوبه آه ياغيمه .. الكسحك هُـوَ .. يوم مازاد الهم .. الهُوَّه .. ويوم ماعَكَّم في اللالوبه .. ما بالدغري .. فنكهه ساي .. كانت نيتو.. بشاتِن راي .. وفكَّة بيعتك يا مجلوبه يوم ما مطرِك فارق بيتو.. ضرعِك عتّم يا محلوبه جارِك .. دارِك .. وانتي وصيتو .. نارِك .. طارِك .. وحُمّي النوبه ساسِك.. فاسِك .. حَدّو مناسِك .. يلحق ذمماً كم معطوبه يا ربيان من جوع أخوانو .. كيف تبقالك ها التبروقه ؟! يا متحلوِّن وميّه الوانو .. تِلَح البال الكم مسبوبه يا متلوِّن زيف شيطانو .. وفاكر نفسو فارس الحوبه ،،،،،،،، قُمنا .. مشينا .. تالا الشمس السوت بق .. كانت عتمه قُصاد الحق بانت كتمة صيف وخريف .. مطراً كاضِم .. وسيل اتمحَّق فاطنه السمحه.. فاقده جناحاً نام .. ما حلَّق غيم الروح البات مجروح.. في مِرق الوجع الشرَّ .. اتعلق ساساق النجمه .. بيوت الحِله شليل والشُلّه الباله .. مفلَّق القمر الشوف .. الساتر الخوف من حزن الأرض الشوفه .. مشلَّق كرب الضُلمات الكان متضاري فارق جحرو وجانا .. مطلَّق شاشاي الطفله .. وقوق الحفله في الحَلاّل .. إتعشي .. وحلَّق تربال العافيه أبزرعاً .. بلّق من نيل البلد الخيرو .. مغلّق الزاد الراكز ويوم ما .. جلّق دلوكة وجرتق جنب المُشرع زاد تحميسه وجوفه .. اتخنّق شبال النخل الفدع تمرو الشفع تلفح كم شُكاناً جاها.. مزلّق ............. دغري مرقنا .. واتقاودنا.. وهاك يا أرضاً سمحه وجيهه ما بوقفنا همّ ونجيهه لما نفوته .. ولما نجيها أُمنا كلنا .. باهيه نبيهه ما صرّت لنا مره وشيها وهي المِن يومه غيمنا وصيها تقطع طاري الحال الفيها لو في بالو كان طاريها يا كنتور النور باريها وتاتي مشيها.. لو كان ضلّت .. إنت اهديها. صنّت .. حنّت .. تاكت باب الوجع الفيها كرست .. حرست .. حاكت طاب في ليل واطيها فاتت .. باتت .. عند جيران مجبوره تجيها نامت .. قامت .. حامت .. زي درفونةً مافي وليها وجَّت حنّينا .. إلا الضل والغيمه حزينه كانوا وراها .. ونحن نعاين من قِدّامه ترفس ترفس كل اقدامه فِك يا طين .. ياماسك حيل كرعينا وين الريح القال بسترنا .. لما الكتمه .الحَرّه تجينا؟ كانت طيبه .. مالا الأرض للقومه تعافر ؟ كانت هيبه .. وأيه الجاب الدمع الطافر ؟ شيتاً يأسِّر .. وحالاً يحنِّن قلب الكافر كان بتأشِر تالا حشاها .. وكان الريح.. والسيف .. والخاصِر : ... - نحن زمان شِن قلنا ؟.. ما قلنا غباءكم بكتلنا ؟.. : أُس يا غيمه .. وشيلي معانا .. هاك يا ضل . وهاك يا مطره خلو النسمه التبقي قبلنا.. وين مرواد العافيه . أملنا ؟ لسه مساهر جوه تُكلنا وكيف الكيه .ونحن قفلنا ؟ كوكوناها .. وسنّدناها.. ناس قِدامه .. وشُله وراها نحن ضراها .. وشوفنا قفاها وهاك يا مشيه .. قالت: - قبل الجيه . ما كُت حيّه ! سته عويناً ما مختشيه .. ولعوا نارُن فوق القيفه .. وكان منتشيه ،، زادوا عويشُن .. ساقوا كشيشُن .. تالا أبوكُن .. ......... ؟ أيوه النيل .. ناساً زايعه وكم مُرتشيه عاموا . وحاموا خمجوا . وقاموا حول في حول والنيل هدامو.. صابر يرقِّع في هِندامو كمّلوا صبرو.. وحفـُّوا اقدامو ويومو القرر يشيل عوامو.. تحت الطين الغاضب ناموا. - ما قصرتوا .. أبقوا قُبالي تعال آ ضل . وهوي يا غيمه تعالي وإت يا نيمه.. شدِّي ضراعك فوق العالي غور ياريح . مسيخ ولديح وإت يا نسمه . أعدلي نعالي.. تعال آ باكر. بُن وسكاكر مافي عساكر. تبقي جواكر ومافي مسلّط يكشف حالي ،،،، واتلمينا.. إتحجينا.. وإتدفينا منها زين.. يكفي عذابِك . والبشتين يكفي صباحِك . يا بعدين وزي ما قلتي .. مافي شُراداً بِستُر دين.. ومافي نفاقاً بصبح دِين.. مافي دموعاً تغشي الطين ومافي ضلاماً بمنع باكر.. ...... نامت .. ونمنا وكان حارسنا ود العين .. وقبلو المولي.. وهو أمين. (عدل بواسطة فاروق أبوحوه on 02-08-2009, 09:15 PM)

العنوان	الكاتب	Date
فرض الأرض .... (نص شعري)	فاروق أبوحوه	02-05-09, 08:51 PM
Re: فرض الأرض .... (نص شعري)	فاروق أبوحوه	02-06-09, 10:29 AM
Re: فرض الأرض .... (نص شعري)	فاروق أبوحوه	02-07-09, 06:31 PM
Re: فرض الأرض .... (نص شعري)	مدثر محمد ادم	02-07-09, 06:39 PM
Re: فرض الأرض .... (نص شعري)	فاروق أبوحوه	02-07-09, 07:53 PM
Re: فرض الأرض .... (نص شعري)	Elmosley	02-07-09, 06:55 PM
Re: فرض الأرض .... (نص شعري)	Yassir Bainwi	02-07-09, 07:03 PM
Re: فرض الأرض .... (نص شعري)	سلمى الشيخ سلامة	02-07-09, 11:21 PM
Re: فرض الأرض .... (نص شعري)	فاروق أبوحوه	02-09-09, 05:58 PM
Re: فرض الأرض .... (نص شعري)	فاروق أبوحوه	02-15-09, 05:40 PM
Re: فرض الأرض .... (نص شعري)	فاروق أبوحوه	02-09-09, 06:03 PM
Re: فرض الأرض .... (نص شعري)	فاروق أبوحوه	02-08-09, 09:02 PM
Re: فرض الأرض .... (نص شعري)	فاروق أبوحوه	02-08-09, 07:19 PM
Re: فرض الأرض .... (نص شعري)	أبوذر بابكر	02-08-09, 06:14 AM
Re: فرض الأرض .... (نص شعري)	فاروق أبوحوه	02-10-09, 04:59 PM
Re: فرض الأرض .... (نص شعري)	هاشم أحمد خلف الله	02-08-09, 06:45 AM
Re: فرض الأرض .... (نص شعري)	خضر حسين خليل	02-08-09, 09:56 PM
Re: فرض الأرض .... (نص شعري)	rosemen osman	02-08-09, 10:14 PM
Re: فرض الأرض .... (نص شعري)	HAMZA SULIMAN	02-10-09, 08:17 PM
Re: فرض الأرض .... (نص شعري)	فاروق أبوحوه	02-13-09, 06:44 PM
Re: فرض الأرض .... (نص شعري)	فاروق أبوحوه	02-13-09, 05:06 PM
Re: فرض الأرض .... (نص شعري)	فاروق أبوحوه	02-12-09, 05:27 PM
Re: فرض الأرض .... (نص شعري)	فاروق أبوحوه	02-11-09, 08:48 PM
Re: فرض الأرض .... (نص شعري)	ماجدة عوض خوجلى	02-12-09, 11:19 PM
Re: فرض الأرض .... (نص شعري)	فاروق أبوحوه	02-13-09, 09:30 PM
Re: فرض الأرض .... (نص شعري)	khatab	02-13-09, 10:44 PM
Re: فرض الأرض .... (نص شعري)	فاروق أبوحوه	02-14-09, 07:42 PM
Re: فرض الأرض .... (نص شعري)	فاروق أبوحوه	02-15-09, 04:37 PM
Re: فرض الأرض .... (نص شعري)	فاروق أبوحوه	02-16-09, 07:13 PM

[رد على الموضوع]

صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]