لَكَ يا جَمِيلُ ، مَرَاقِدُ النُّورِ البهِيِّ !

يا الكحلتَ عيون الدنيا بلون الغنوة
ياالضفرت ضفاير إحساس الكلمة الحلوة
يالشتتَ نجوم الليل في وش النيل
عقداً فوق القمرا بيقدح فينا الضو
يالطقطقت أصابع السحب الشالن جو
دقق عسل المطرة ونقط ..كبت شو
نضمت غنت .. سكتت صنت
مرقت دخلت ..قامت قعدت
شن بتسو ..
واقفة تلملم فوق النجم اللمّ حداها
نسجت منو الضل الخته وباقي ضراها
فتقت منو الشجرة الشالت حت جناها
سوت بيهو الهدم الصُلحة وسترة غطاها
واقفة تحزم .. باقية تلزم
خيراً جاها
إيدها تسلم تدي تعلم .. ترفع جاها
تهدي تكلم .. صوتها يرنم
يزيدها وجاهة
وغنت ليك الغنوة السمحة الما بتم
وإتضارت عين القمرا
تتاوق من بينات براق الضو
تشاشق فوق الأتر الفاتنا وقبّل من عمنول
وزغرد ليك إيقاع المطر
إتلبب حضن الأرض ونام
ود سيد أحمد
دق المحلب فوق توب أحمد
وعطّر بيهو الكلمة الحنت
وهنت ورنت ..وطارت وركت
جوه القلب .. ركزت تب
وقالت شيتن ما بتوصف
ود سيد أحمد
دق المحلب جوه الفكرة وخت الذكرى
ذكرى الليلة وذكرة بكره
أبية وحرة .. مبدأ وعزة
دراية وخبرة
شموخ بيت عزة الما بتهزا برغم الصي
وليد ضكران .. هزّ ورزّ تب ما فزّ
إتقطر نزّ .. إدفق ضي
ود سيد أحمد
شال الريشة ورسم اللوحة
شتت لونها وتيرب بيهو سما السودان
نقّط ..يحضن ليلاً سوّد هجّ وهوّد
تمرق بين النيل الكسر .. إدفق وغرق
تمرق بين الوتر الصفق غنى وزغرد
تمرق بين صفقات الشجر الخدر وورق
قام إنشابا وعانق كتف الليل
إطّاول باس القمرا وقبل عين الشمس
كيف نبكيك يا راجل الليلة ..وبكرة وأمس
كيف نبكيك ونحنا بنسمع صوتك
سراً وجهراً وهمس
كيف نبكيك وإنت معانا
تشيل وتخت .. ترص وتقص
تفج السهلة وتحكي الغنوة
اللسه بصوتك
وشالت حسك ونفسك وروحك
وسمحك زي
إنت معانا .. بقيت جوانا وماك بتفوت
إنت معانا .. بقيت جوانا وماك بتفوت
يا الغيبت إحساسنا النمّ .. وغِبنا عديل
كتَلتَ الحيل ..هديتَ الروح بالحيل بالحيل
طفرتْ دمعة وبلتْ عين الشمس
سالتْ .. رسمتْ شلخاً فوق الأفق
ساحتْ .. سوتْ شرخاً بين النجم
خرّتْ .. كرّتْ شرّتْ حبل النار
اتعلق فينا ونقط طقْ .. طقْ
نور القمـــــرا وضي الشمس .. اتقلدن
وبين أحضانن داب النور والضي
انشغلن وبرقن
وجّ قَبَلّنا ومحا براق الشوق
سكبنْ شيتاً ما معروف .. هزنْ ود العين
اتضارى وآراهو الخوف
لهب وبقق
بقّ وبقيق
كبكب دمعو وأوقد جمرو
وردحنْ .. رتبنْ وسونْ هو
النيل الأبيض لاقى وعانق حضن الأزرق
باس الأبيض خد الزنجي
إتقلدو.. إتقادو
إتوحدو فاتو
مات العنصر وداب الفارق
من بيناتم
هجوا ودجوا وناحوا
ولجّوا وجن أماتو بنات الحور
إضّْجنْ أو جنْ متل النور
لمن ناس النيل بي جوه إتعصرتْ
قعدنْ فوق واطاتو وفرشنْ برشاً
على موجاتو إتقالد سَمَكو وعزى
ناح تمساحو إنهزّ
كَلّب شعرة جلدو وغزا
إتربط وصفّ .. شال الحفط
عقط ونزلتْ دمعتو تَََفْ
سَدر العين إتملا بالعَبرة
إتنهد نفس الكلمة المُرة
إتأوهتْ آهة القمرا
ونفختْ قلب الجمرة ..
وكبتْ فينا ضلام
يا إنسان يا فنان يا القاومتَ
الذاكرة والنسان
دخلتَ بي وين ؟
سكنتَ الدم الجاري على الشريان
لوليت جوانا أصالة الكلمة
الشرف العزة .. العايش فينا في كل زمان
جرجرتَ علينا حروف النغم
الطرب يهز .. يفرح في كل بَكان
ختيتْ الراي صريح
قولاً وفعلاً وفكر
سَجّل أكتب يا تاريخ
يا أستاذ .. ويا ممتاز
ختيتْ الدرِس ... مفيد وصريح
درساً ما دايرلو وسايلاً للتوضيح
ونحنا فِهمنا ، كتبنا دَِرسنا على الكُراس
انتهتْ الحصة وناحنْ ثكلبنْ الأجراس
مرقًًًَََََََََََََََََّتَ صحيح وماك بترجع لينا.. صحيح ؟
مشيت بي وين ؟
وكيف خليتنا بدون تصحيح !
نصحح وين ؟.. شلنا الهَم
نصحح وين ؟.. جينا الكم؟
نصحح وين ؟
وكل أقلامنا تقطر دم
كل الأحمر دفق لونها فحــم
ونحنا كبرنا وعِينا وزدنا فهم
عرفنا أهداف الدرس .... تمام
ختينا النقطة، الشولة ، الهمـــزة والإستفهام
خلصنا وخلاص جمعنا قلمنا كتابنا مع الكراس
يا الوحدت في سفرك كل الناس
ويا مقياس .. يا ميراث وأساس
المعنى الحب المبدأ والإحساس
نِعم الإرث الباقي وأعظم ساس
يا موجود بيناتنا وعايش ماك مفقود
جرب فوت
أغشى مدنا بيوت وبيوت
تسمع صوتك شق بلـــود
تشوف الصورة عيان وشهود
مُسجل إسمك ديمة وجود
وماك بتفوت
وكيف بتفوت؟
وأفتش ليك أنا .. جاي بي جاي
وأهلك وناسك مرقوا يكوسوا عليك معاي
وفجأة بتطلع من جواي
متل النور الضوا حداي
وموية النيل الرايح وجاي
وهج العين .. الفكر الراي
ومن الشمس بريق ضواي
وصدر الأم الليك غطاي
حديثاً يناغم ليك .. هداي
وصوتاً يهدهد فيك لولاي
(هوها يا هوها )
واحد اتنين تلاتة
إبرتي الخياطة
فيها (م) وفيها (ص)
وطاء وفاء .. وفيها كل المصطفى
.. ومصطفى يا عيال .. شن قال ؟
قال هذا السودان أمانة عليكم
في الأعناق .. تشيلو لي فوق
تفوتوا جبال .. تفتلوا حبال وتموتوا عليه
تكاتلوا كتال ، تشيلوا الشيل الما بنشال
ما هو باقي عليكم محال
أكربوا ضهركم ما هو تقيل
إنتو ما عيال الماظ وفضيل
عيال المهدي أُسود
وأوعوا وفتحوا المغموت
شيلوا بلدكم فوق لي فوق
وأنا من بينكم ماني بفوت
... تفوت لي وين ؟
تفوت بي وين ؟
تفوت من وين ؟
وكيف بتفوت ؟
سلكت الدرب الغايص فينا
ولي جوانا وماليك منو تاني مروق
ركزت الباب .. سندتو .. تكلتو
وألبد جوة الكبد
إتوسد فيهو عروق
أشرب من شريان الروح الما ممحــوق
هز نخلات الجوف
اتريق رطباً ندَ
وتمراً نزّ
وريق إتبل
إشْرف وأروى وماك مريوق
مد كرعينك فوق لحاف القلب إتمهل
أغمض عينيك أرقد فوق النبض السهل
وشال اللقمة طعّم وطمّع ريقو مقوت
إتسارق سكر وعسلاً..
نقط فوق في خشيمو شرقو وعشرق
كحّ إتنحنح
جَنو بنات الحور إتسبقن
تاكن حنكو .. إتردت روحو
وفجن ضحكة عليك شروق
وقف القلب بي توبو اتلفح
مرق إتلقى الضيف المن الروح مقطوع
فرحان بيك يرحب أهلاً .. أهلاً بيك يا مرحب
قشقش لي واطاتنا ورشرش
ضاير ليك السهلة
وفرش ليك بي مهلة
فراشاً يكفي .. ويكفي يحوق
خيرو الوافي .. وزادو الكافي
لحم غيرو عليهو مضوق
حضناً دافي ونبعاً صافي عليك مدلوق
أرقد روق
بنيت جوانا بيوت وبيوت
هزمت الموت غلبت تفـــوت .


( د. عفاف الصادق حمد النيل في رثاء مصطفى سيد أحمد المقبول )