أب كريق في اللجج .. سدّر حبس الفجج ..

Quote: أب كريق في اللجج نعم كلامكم صاح أب كريق هو التمساح الكبير أو تمساح العشاري (تمساح نيلي كبير) واسمو أب كريق لأنو قيل إنو بيعمل صوت زي كريييق كرييق كرييق وأيوة اللِّجج جمع لجة وهي الموية العميقة كما تقول الآية القرآنية:(أَوْ كَظُلُمَاتٍ فِي بَحْرٍ لُّجِّيٍّ يَغْشَاهُ مَوْجٌ) سدر حبس الفجج سدّر = قام بي سدرو أو قام سدّاري حبس الفجج = قفل الأماكن بما يمنع الناس إنهم يصلوها خوفاً وهيبة من وجودو .. عشميق حبل الوجج العشميق = أو (الآشميق) في اللغة النوبية هو خيوط لحاء النخيل البختوهو في خشم الجَبَنَة عشان يصفي القهوة يتميز الآشميق بمادتو المتينة لا بتتقطع ولا بتدوب في الموية نفس المادة بتستعمل لفتل الحبال وقيل حبل العشميق من أقوى الحبال وما بيتقطع أصلو (تنسج به العناقريب لنفس السبب) حبل الوَجج = حبل شديد القوة بربطو بيهو البهايم والمقصود إنو الممدوح مش شديد القوة بل هو المادة البتمنح القوة زاتا (شفتو الكلام دا كيف) أنا أخوي مقلام الحجج مقلام = أداة للقص والمساواة (ضفارة يعني) ومقلام الحجج هو الزول البقصر الحجة والنزاع بالقول الحاسم زي جهيزة القطعت قول كل خطيب ..