رأيي حول الأحداث الأخيرة

Quote: أهلكَ ماتوا بالرصاص؟ أهلنا برضوا ماتوا بالرصاص! نساء وفتيات دارفور بيتم اغتصابهم؟ جوّا الخرطوم بيتم اغتصاب الفتيات وجلدهم وإهانتهم قدام العالم! أهلك اتشردوا من أراضيهم؟ ما أنحنا كمان أهلنا اتشردوا من حلفا القديمة واتشتتوا في حلفا الجديدة وخشم القربة، واضطرينا نسكن وسط ناس بيضحكوا في عربيتنا المكسَّرة وبيسموا لغتنا العمرها أكتر من 7000 سنة (رطانة)! أهلك بيعانوا من التهميش؟ ما أنحنا كمان أهلنا مهمشين ودينهم طالع، مش بس في أقاصي الشمال، بل في قلب العاصمة. أرضينا قاعدة تتباع بي أهلها وبهايمها ... إنت بتتكلم في شنو؟ وليه مُصر تحصر الموضوع في الاتجاهات الجغرافية؟ ليه مُصر إنك تعاين بعين العنصرية الجاباتا الإنقاذ دي؟ يا نعاين أنحنا بعيونك يا كمان نبقى عنصريين وجلابة وأنصاف مثقفين؟ ياخ الثقافة تطير كان بقت زي ثقافتك دي!! وكان بيجونا الزيكم لو طارت الإنقاذ ما دايرين الإنقاذ دي تطير زاتو!