|
|
 Re: سمير شيخ إدريس (Re: حامد محمد حامد)
|
العزيز أبو سمرة
مرحبابك يا جميل وبالكلام البي براحة، يا سيدي ما بختلف معاك كتير حول مسألة الاختلافات الخاصة المتأثرة بالبيئة المحيطة والمرجعية الذهنية (زي ما سمّيتها) والحاجات دي، وأساساً أنا الاختلافات دي ما قاعدة تهمني، عارف ليه؟ لأني لما أجي أكتب لي رواية فيها شخصيات تغريبية زي فيليوباوتش وماك دوفوين وليلاتيا (دي شخصيات رواية السيّدة الأولى) وغيرهم كتير من الشخصيات التغريبية ما قاعد أركز كتير على مسألة (وين ممكن تتقاطع الشخصيات دي مع الشخصية السودانية) بل بيكون تركيزي منصب في المقام الأول في محاولات إجادة تقمّص الشخصية داخل بيئتها (فاهمني!) والمسألة دي يا أبو سمرة بالمناسبة هي واحدة من المتع بتاعت الكتابة زي ما أنا بشوفا. كيف؟ يعني حسي لما زول سوداني يكتب ليهو رواية بتتكلم عن البيئة السودانية؟ في اعتقادك المستمتع الحقيقي منو؟ قبال ما تجاوب على السؤال ده قارنو عليك الله بالسؤال ده (لما زول سوداني يكتب عن واقع إسباني كإسباني، تعتقد منو الحيكون مستمتع؟) وبغض النظر عن دقة الإجابة عن (منو) ركز لي في إجابة عن أوجه الاستمتاع في كل من السؤالين.
الكتابة عن عوالم تانية، وتقمّص شخصية الآخر في حدّ زاتا متعة مختلفة، مضافة إلى متعة الكتابة ومتعة السرد المتاحة لكل كاتب بشكل عام ومجاني. لكن لمن تضيف للعناصر الكلاسيكية بتاعت الكتابة عنصر جديد هو عنصر التحدي يبقى المتعة ليها ثمن .. في نقطة تانية يا صاحبي بالنسبة للكتابة عن الآخر دي، تعتقد إني ممكن أنجح في الكتابة عن بيئة زي بيئة الجنوب السوداني؟ الإجابة (حسب كلامي الفوق ده) إنو أيوة .. ليه لأ، ما في النهاية الشخصية الجنوبية ليها محدداتها المرتبطة ببيئة ومرجعية ذهنية ومكونات مختلفة تماماً عن مكونات سوداني الوسط، مش؟ يبقى محاولات تقمص الشخصية الجنوبية بيدي نفس المتعة اللي اتكلمتَ عنها قبل شوية. لكن لو خليتني أنا أجاوب ليك على السؤال ده ح أقول ليك: لا .. أكيد ما ح أنجح في الكتابة عن شخصية الجنوبي.
لأنو قيمة نجاح الكاتب مش في قيمة قدرته على التقمص وتلبّس الشخصيات ومحكاتا في ظروفا المعيشية والحياتية وبس، ولكن في قدرته على مجابهة خطورة تبعات هذا التقمّص، أو بعبارة تانية (المصداقية) مش بالضرورة المصداقية المتأتية من التقمّص وعكس الواقع البيئي وخلاص، وإنما المصداقية التاريخية لهذا التقمّص والمصداقية الفنية. كيف؟ يعني لما أنا (هشام آدم) أكتب أيّ كلام عن الشخصية الجنوبية، الآخر الغير سوداني حيصدق الكلام البقولو، لأنو في الأساس ما بيعرف عن عادات وتقاليد الجنوب أيّ حاجة، وبالتالي فإن أيّ كلام حيقولو هشام آدم، هو بالضرورة حقيقي بالنسبة ليهم. هل في كاتب سوداني واحد قادر إنو يتحمّل مسئولية زي دي؟
طبعاً الكتابة هنا أنا بعتبرا كتابة عن الآخر برضو، لأنو في اختلاف في المرجعيات الذهنية والظروف الاجتماعية، اللي ما بتوفرها لي الملاحظات والمشاهدات الشخصية، لأن المشاهدات دي غير عميقة كفاية. بينما الإخفاق في الكتابة عن الآخر (غير السوداني) أقل مجازفة، والأخطاء التاريخية القاتلة في الكتابة عن الجنوبي سوف تكون مبررة وسهلة المعالجة في الكتابة عن غير السوداني.
ياخ أقول ليك كلام؟ سميّهو هروب من جهلي بنفسي. أنا موافق! لأنو ببساطة شديدة يا أبو سمرة، هشام آدم الما شاف السودان ولا عاش فيها غير خمس سنوات (هي مدة دراسته في الجامعة) ما متملّك أدوات الثقافة السوداني بشكل عميق ممكن تتيح ليهو الكتابة عن الواقع السوداني كتابة معالجة أو كتابة نقدية مدروسة، مش مجرّد حكي وحجي بتاع حبوبات بس. (فاهمني!) يبقى لمّا المتلقي يلقاني بغلط في الكتابة عن الآخر أرحم لي مما يلقاني بغلط في الكتابة عن نفسي. الغلط هنا غير مبرر، وبيختك في مساءلة إنتا أساساً في غنى عنها.
تبقى المسألة يا أبو سمرة محنة حقيقية لكاتب يمتلك بعض من أدوات الكتابة، وبعض من أدوات السرد، ولكنه لا يعرف ما يقول!! (زي ما قال كولون ولسون في كتابو "فن الرواية") ومش لا يعرف ما يقول وبس، وإنما لا يعرف عمّا أو عمّن يجب أن يكتب. التعبير عن بيئات مختلفة هو اغتراب وجداني وليس ترف كما تتصوّر يا عزيزي، وأنا هنا أعترف بأن هذا الاغتراب يُشكّل هاجساً بالنسبة إليّ، وعندما أصبحت في مواجهة حقيقية معه لم يكن أمامي إلا أحد أمرين: إما أن أذوب في المحنة أو أن أتحايل عليها.وزي ما عاطف خيري (ياكنّا نبيعك يا نسرق ... اخترنا النار الظلها بحرق)
الكلام عن الأسماء يا أبو سمرة ده كلام أعتبرو غير ضروري على الإطلاق، مش بس لأنو الأسماء دي عبارة عن مجرّد رموز تعريفية للشخصيات، ولكن لأننا ما نقدر نجزم بأرومة الأسماء دي وعلاقتا بالبيئة والثقافة وخاصة في زمن زي زمنا المعلون ده .. زمن الناس فيهو ابتدت تتقاطع مع بعض حتى من غير ما تتحرك إنش واحد من مكانا .. لما تلقى ليك واحد اسمو هشام آدم وتجي تفتش لأرومتو تلقاهو محسي ورطاني كمان، يعني لا غرابي ولا نوباوي ولا فلاتي. دي حاجة ما بتحيّر؟ ولما تجي تفتش لواحد إسمو سمير وتلقاهو سوداني ما مصري ولا أردني، دي حاجة ما بتحيّر؟ يعني مايكل وميشيل ديل أرومات بائدة يا حبيب، لا يمكنك الاعتماد عليها في زمن منفتح ومسعور زي زمنا ده.
بكتب عن السودان عبر الآخر وما عارف ح أنجح ولا ما أنجح بالطريقة دي، لكن على الأقل بحس إني بالطريقة دي بحافظ على نفسي قبال ما أحافظ على تاريخ السودان وجغرافيتو وخصوصيتو الثقافية. بكتب عن واقع السودان اللي في يوم من الأيام ما كنتَ جزء أصيل منو، رغم كل الكلام القلتو عن فقرنا ومعاناتنا في البركس، وليالي كوبر والمرخيات والمظاهرات، وسلم شعبة اللغة الإنجليزية. كل الكلام ده أنا ما كنتَ جزء أصيل منو، وعلشان تصدّق كلامي ده اسأل نفسك عن المعنى الحقيقي والفلسفي للأصالة يا أبو سمرة يعني شنو تكون مجرّد شبح بني آدم جاري حفيان في شارع النيل بتحاول تزوغ من كومر العساكر وفي نفس اللحظة اسمك في سجلات الجامعة مختوت في خانة "المغتربين" وبتدفع رسومك الدراسية بالدولار؟
يعني شنو تبقى عايش حياتين، وكل حياة بتلعن الحياة التانية، بتكورك في شارع المين (لا تعليم في وضع أليم) وانت بعد سنتين ما حيهمك لو كان التعليم حيبقى في وضع أليم ولا في الجحيم!، يعني شنو إنك بتكورك في شارع الجمهورية ضد سياسة التعليم الخاص والقبول الخاص، وانت أساساً في وم من الأيام ح تضطر تدخل ابنك أو أخوك في جامعة الخرطوم بالدولار تبع القبول الخاص. أنا ما قاعد أتكلّم عن قناعات يا أبو سمرة، لأني فعلاً مقتنع بكل حاجة عملتها، وزي ما انتا قلت (ده تاريخ لا يمكن إنو ننساه بمجرّد إننا نلعنو وخلاص) ولكن أنا بتكلم عن التناقض (فاهمني!) ياها المحنة الخلت واحد زي خالد عبد الله ده ما يفهم الاغتراب إلا بمعنى "غواصة" سياسية محتملة بعيدة من كل عواطف تاريخنا القريب جداً، في واحدة من ليالي وأمسيات كوبر واشتراكية "الجدعة"
مازلت مُصر إني بكتب عن السودان عبر الآخر، ده دوري أنا هشام آدم بالتفاصيل البتعرفا والما بتعرفا، وحريص إني أقوم بالدور ده حسب أدواتي المتاحة لي، ويبقى الرك بعد داك على المثقف السوداني البيمتلك الأدوات الما قاعد أمتلكها أنا، عمل شنو؟ ودورو بالضبط شنو؟ هو ده السؤال الحقيقي يا أبو سمرة.
أما بالنسبة لموضوع ضرورة ارتباط الكاتب بإنتاجه الفني، فالكلام يطول عن الموضوع ده، والمسألة ما بس مجرّد إني أؤمن أو ما أؤمن .. الموضوع أعوص من كده بكتييير وبجيك راجع تاني للنقطة دي بي رواقة أكتر.
الأخ حامد محمد حامد
شكراً ليك يا حبيب على المتابعة وأريت كان تمد
صاعك مع صواع "الملك" وتغترف غرفة من هذا النبع
حبابك 1000
|
|
 
|
|
|
|
|
| العنوان |
الكاتب |
Date |
 سمير شيخ إدريس | هشام آدم | 02-11-09, 07:38 AM |
| Re: سمير شيخ إدريس | هشام آدم | 02-11-09, 07:39 AM |
| Re: سمير شيخ إدريس | هشام آدم | 02-11-09, 08:00 AM |
| Re: سمير شيخ إدريس | هشام آدم | 02-11-09, 08:48 AM |
| Re: سمير شيخ إدريس | سمير شيخ ادريس | 02-11-09, 11:10 AM |
| Re: سمير شيخ إدريس | هشام آدم | 02-11-09, 11:11 AM |
| Re: سمير شيخ إدريس | هشام آدم | 02-11-09, 11:28 AM |
| Re: سمير شيخ إدريس | سمير شيخ ادريس | 02-11-09, 08:06 PM |
| Re: سمير شيخ إدريس | هشام آدم | 02-12-09, 06:57 AM |
| Re: سمير شيخ إدريس | عادل فقاد | 02-12-09, 08:16 AM |
| Re: سمير شيخ إدريس | Amany Elamin | 02-12-09, 08:28 AM |
| Re: سمير شيخ إدريس | هشام آدم | 02-12-09, 08:50 AM |
| Re: سمير شيخ إدريس | هشام آدم | 02-12-09, 08:47 AM |
| Re: سمير شيخ إدريس | فيصل عباس | 02-12-09, 08:55 AM |
| Re: سمير شيخ إدريس | هشام آدم | 02-12-09, 09:33 AM |
| Re: سمير شيخ إدريس | هشام آدم | 02-13-09, 10:01 AM |
| Re: سمير شيخ إدريس | سمير شيخ ادريس | 02-13-09, 12:28 PM |
| Re: سمير شيخ إدريس | سمير شيخ ادريس | 02-13-09, 01:22 PM |
 Re: سمير شيخ إدريس | حامد محمد حامد | 02-13-09, 02:37 PM |
| Re: سمير شيخ إدريس | هشام آدم | 02-14-09, 06:48 AM |
| Re: سمير شيخ إدريس | فيصل عباس | 02-14-09, 11:46 AM |
| Re: سمير شيخ إدريس | هشام آدم | 02-14-09, 02:47 PM |
| Re: سمير شيخ إدريس | سمير شيخ ادريس | 02-14-09, 07:04 PM |
| Re: سمير شيخ إدريس | فدياس نجم الدين | 02-14-09, 07:25 PM |
| Re: سمير شيخ إدريس | Elmoiz Abunura | 02-14-09, 09:27 PM |
| Re: سمير شيخ إدريس | سمير شيخ ادريس | 02-14-09, 09:54 PM |
| Re: سمير شيخ إدريس | emadblake | 02-15-09, 00:07 AM |
| Re: سمير شيخ إدريس | emadblake | 02-15-09, 01:00 AM |
| Re: سمير شيخ إدريس | هشام آدم | 02-15-09, 07:15 AM |
| Re: سمير شيخ إدريس | هشام آدم | 02-15-09, 06:43 AM |
| Re: سمير شيخ إدريس | هشام آدم | 02-15-09, 07:11 AM |
| Re: سمير شيخ إدريس | هشام آدم | 02-15-09, 07:46 AM |
| Re: سمير شيخ إدريس | emadblake | 02-15-09, 08:34 AM |
| Re: سمير شيخ إدريس | هشام آدم | 02-15-09, 09:22 AM |
| Re: سمير شيخ إدريس | سمير شيخ ادريس | 02-15-09, 01:27 PM |
| Re: سمير شيخ إدريس | عبدالأله زمراوي | 02-15-09, 01:57 PM |
| Re: سمير شيخ إدريس | سمير شيخ ادريس | 02-15-09, 02:32 PM |
| Re: سمير شيخ إدريس | عادل فقاد | 02-15-09, 06:16 PM |
| Re: سمير شيخ إدريس | هشام آدم | 02-16-09, 10:24 AM |
| Re: سمير شيخ إدريس | هشام آدم | 02-16-09, 10:03 AM |
| Re: سمير شيخ إدريس | هشام آدم | 02-16-09, 10:20 AM |
| Re: سمير شيخ إدريس | عادل فقاد | 02-16-09, 06:37 PM |
| Re: سمير شيخ إدريس | هشام آدم | 02-17-09, 07:55 AM |
| Re: سمير شيخ إدريس | سمير شيخ ادريس | 02-17-09, 11:21 PM |
| Re: سمير شيخ إدريس | هشام آدم | 02-19-09, 09:03 AM |
|
| |
هشام آدم
فيس بوك
تويتر
انستقرام
يوتيوب
بنتيريست