---{ راكوبة} للرجال الرومانسيين والنساء الحالمات----

Quote: يامنى ياخ اكرمى الناس ديل لحدى ما اجى اوعى تقولى لى لافحة توبك وماشة ووين؟ شوفى ناس نادية وعزاز البنات الحالمات ديل وناس جلال ومنوت وشهاب دايرين قهوة ولا كركدى ماتقصرى وشيلى هدوم الاحباط دى من هنا بسرررررررررعة يعيش الحب ابو رومانسية

والله يا شروقه نفسي أعمل زي ما قلتي وأونسهم..
لكن غلبني!
عارفه ليه؟؟
لاني كده زي حسيت اني فاضية من جوه..
وبعدين الفضا ده ما ممكن يتملي..لأنه هو اساسا كان مليان لكن الحاجات الفيهو ماتت..
وبعدين يا اشراقه الورده السمحه سمحه مش علشان جابها هو ولا اشتريتها براي..ولا شنو؟؟
كل شيء محكوم بالتجارب وموقفنا فيها..
يعني قبل سنين (بحكم العمر برضه) لو سألتيني من الرومانسيه كنت أنداح وابربش برموشي وصوتي يرد ليك في رقه عجيبه..
والله لا بكون مصطنعاها ولا حاجه..براها بتجي رقيقه..
يعني الوقت داك كل شيء ليه معني..حتي ولو معني ما بيعبر عن الحقيقه البتظهر بعد كده..
أها كم مره تغيري فساتينك علشان يشوفك احلي؟؟
وكم مره تمشي الأسواق تشتري فساتين جديده؟؟
والغريبه تفرحي بأي حاجه يقولها ليك..
لو أداك أمر تسمعيه..لا فيه أقنعني ولا اقنعك..
ولو قال ليك بغير تفرحي يالدايشه في لحظتها!
رومانسيه!
هي ذاتها الرومانسيه قالوا بتكره الزواج..
لأنه الزواج واقعيه والرومانسيه بالطريقه السودانيه كذابه في أصل وشها!
الورده قبل الزواج وريحتها العطره بتبقي بصله بعد الزواج!
حاجه تغيظ ..اشراقه تقول رومانسيه ومطره وراكوبه وبرسيم..
وأنا في كلامها ماشايفه غير البرسيم..ياربي الغلط فيني ولا فيكي ولا فينا كلنا ولا هو اساسا مافي غلط؟؟

الله يرحمها تلك الايام التي كنا نبكي فيها مع اقلام ابيض واسود.. وقصص احسان عب القدوس والرومانسي يوسف السباعي!
وكان منظر عماد حمدي ومديحه يسري وهو بيموت بعد قصة حب من النوع الرومانسي يقطع القلب ويكمل دموعنا..منظر قاسي..
معقوله يعني بعد كل الصعوبات والأقدار القاسيه وتعيهم في المشاكل يقوم يموت؟؟!
زي صاحبتك لما قالت لزوجها بحبك ولا حاحه زي دي..وقام قاليها بطلي مراهقه!
قهرها في بوكانا

........
........

لكن علي كل حال بكرمهم بأكتر حاجه بحبها..
بالقهوه ورومانسيتي معاها