كل مشاكل الصحفيين من تحت راس أجراس الكنائس لماذا؟ ..

Quote: الكلمة أجراس الكلمة مآذن الكلمة لهب بيضوى دروب ويصهر أسوار العتمة الفارضة حصارها على النخلات الكلمة شرف عند الناس الرغم عذاباتها شايلة هموم جيل بحالو ما قادر يخطو ولا يتقدم لقدام عند الناس الما بياكلوا ولا أولادهم لقمة حرام .......... يا عسكر .. أغتصب الهمة .. أغتصب الهدمة وأرفع سعر السكر أغتصب الضحكة وببوتك أسحق كل الشعب الما بستاهل النعمة لا بشكر لا بحمد أهل القمة ياكل ويشرب جوع ومذلة وبرضو ينوم ما جلدو تخن....... من ضرب وجوع وسجون ومشاهد موت ودموم من كثرة ما شافها وأتشبع بيها طلت جواه بقت زى لون أحمر أحمر أحمر لون مدلوق ما ليه قيمة ........... اجلد..اجلد...اصفع... بسوطك تجلد أمة ورب بكفك ..تصفع وجه الحق لكن لمن تهبش شرف الكلمة وتلوث قيمة وعقيدة ومعنى يبقى الفاضل ايه ؟؟ ما كفاكم دار المايقوما عاوزيننا نبنى كمان دار للكلمة الما شرعية؟؟ ...... يا عسكر .. شن فهمك أت بالكلمة فهمك حدو دبابة وقهر فهمك حدو أقامة الحد والحد عندك أقلاه قمع الفكرة وصلب الكلمة على أبواب تفتح على شارع بكرة خايف من ايه ؟ أنو النايمين وسباتهم طال يصحو على اجراس الكلمة ؟؟ يا رب بصحوا؟؟ ومتين يصحوا؟؟ ....... مين القال الكلمة بتحبس وراء قضبان؟ الكلمة نفس ..روح وهواء.. مين فيكم يملك أمر الروح ؟؟ ويقدر يمنع عن خلق الله هواءه؟ الكلمة وطن .. ومين البيقدروا وراء قضبانهم يحتجزوا وطن .. الكلمة ..أنا ..وأنت ..وهن ..وهم ..الكلمة ..أمل وأمبارح واللحظة وبكرة الكلمة وطن ..