.......{الجميلات هن الجميلات.. نقش الكمنجات على الخاصرة).......

Quote: ولكن عندي أسئلة كثيرة وكمان ممكن أسميها جميلة وماح أجاوب عليها متروكة ليك وإنت أدري مني ما المقصود بالجمال بصفته العمومية ؟! وما هي طبيعة الجمال؟! وهل هنالك طبيعة او حقيقة وأحدة للجمال سواء وننعت بها الأشياء الطبيعية والصناعية ؟! وهل يكون الموقف واحد عندما نقول المرأة جميلة ولوحة الفنان عماد عبد الله للبرتقالة أو المرأة جميلة أيضاً؟! وما المقصود بالفن art؟! هل هو ما يقوم به الإنسان من صنع في مقابل ما هو طبيعي آي ما تصنعه الطبيعة ؟! ماذا نقصد بالرمز الفني؟! ثم هل هنالك حقائق تكتشف عنها الأعمال الفنية ؟! وتعرف الفن زاتو هو شنو؟!

اهو واحد من خبايا الجمال اننا مانلقى اجابات لاسئلة وجودية- اسئلة حياة وموت والرحلة التى نمشيها بين صرخة الحياة وهى داخلة فينا ومفرهدة وبين حشرجة الموت والحياة خارجة للترك للموت نصيبه- اسئلة الغياب والحضور- لكها اسئلة لاتثير الاّ الوحشة ومع ذلك ففيها جمال مدفون فى حتة ما بس كيف نحسو!!
كدى شوف معاى دى.. صورتها وكنت مليانة شجون زى الشجون الشايلاهو سماء فيينا يومها والدنيا غروب- نوع جميل من الاحزان اللى بتتدغدغ فينا الحياة

Quote: وصلت في مرحلة مبكرة أنو الزول البنقرش الطار فنان وجميل والبدق النوبة وبيضرب الكشكول والزول البنضم السبحة, والبكتب المدحة أو القصيدة جميل وفنان حسب الأداء لكن السؤال من خلال الصنعة هل البنت الجميلة التي تعمل في معامل أسلحة فتاكة وذات دمار شامل مهما كانت خُلقياً جميله فهل هي جميلة ؟!

قطعا لاّ ياعماد.. فهى بالنسبة لىّ غير جميلة البته
هى تدور فى نفس السؤال حول التضامن مع المرأة بمطلق انها امرأة.. يعنى المرأة اللى بتشارك فى صناعة سياسة تقوم باذلال نساء ورجال العالم النامى لايمكننى ان اتضامن معها لمجرد نوعها- مايحدد لى التضامن من عدمه هو رؤيتها ومواقفها فى الدنيا

معايير الجمال- ولىّ مخطوطة بحث فى الاتجاه ده وعندى فيهو كلام كتير شاغلنى- يعنى البت اللى قاعدة تجلط فى وشها الاربعة وعشرين ساعة عشان تبقى بيضاء ده ماجاء من فراغ
ده نتيجة للتسويق التجارى اللى قامت بيهو شركات العرض والطلب
وده نتيجة للسياسة المصنوعة فى عالمنا- منو القال انو الزول اللى بشرتو بيضاء جميل- رغم انو مافى زول لونه ابيض- ابيض كلون
ومنو الى حدد انو اصحاب البشرة السمراء غير جميلين؟؟
منو اللى حدد انو { نقيس الفم بودعة}
والشعر الناعم اللى غنى ليهو ضمن آخرين وردى
والكفل وال.. ال....
وفى زمن العولمة تغيرت معايير الجمال وده موضوع طويل نخليهو لزمنو..

بس عجبنى كلامك هنا..

Quote: وصلت في مرحلة مبكرة أنو الزول البنقرش الطار فنان وجميل والبدق النوبة وبيضرب الكشكول والزول البنضم السبحة, والبكتب المدحة أو القصيدة جميل وفنان حسب الأداء لكن السؤال من خلال الصنعة هل البنت الجميلة التي تعمل في معامل أسلحة فتاكة وذات دمار شامل مهما كانت خُلقياً جميله فهل هي جميلة ؟

وعم الزبير الجناينى زول جميل- كتبت عنو فى كتابة سميتها ناس فى حياتنا- بيملانى وتروينى انسانيتو كلما امرّ بقصر الشنبرون وتشهق فينى الاشجار المشذبه باتقان
عم الزبير كان بيشذب جناين بلدية كوستى قبل ان تهده السنين الاّ انها لم تهد حلمه فى العوده لجبال النوبه



شكرا ياعماد على التحريض