|
Re: ملامح (8) (Re: abuguta)
|
أبوقوتة العزيز
كلما هل إسمك واشرق، طولى والله اتذكر خلنا وصفينا الحبيب شتات وهو يترنم
أبوقوتة فنبلة الود الموقوتة
وأنا أشيل معاه
أبوقوتة الزول الكريم زى الياقوتة
كيفك يا ابو حميد
كلامك ده ياخ ياهو عز الملامح هو الملامح إنت قايل شنو؟ ما ياها حياتنا كلها، بى كل ألوانها وطبائعها وحالاتها
وتانى "تورت" على المواجع وهيجت أشجان الذكرى الما عايزه تفك تلابيب الروح
الرياض وايام الرياض ومباهج الرياض
سبحان الله يا ابوقوتة تعرف الملتقى العجيب ده، العليا مع التحلية، اتجمعت فيه كل منابع السعادة والحبور فى الأيام ديك
وإنت ماشى شمالا بعد التقاطع تلقى محلات ال "سفن فور سفن" بتاعة اشرطة الموسيقى، ومعاها طوالى سكن اساتذة جامعة الملك سعود، حيث كان الرفاق السمحين، د. عبد الإله ود. سعد ود. بامطرف، ايامها كانوا مساعدين تدريس، ناس عجيبين وكأنهم من كواكب تانية
عبد الإله كان عنده أمنية واحدة، إنه بس يكون عندة "عجلة" عشان يسوقها ويمشى بيها الجامعة، قلت ليه طيب المشكلة شنو؟ قال لى حيقولو على جنيت، سعد كان هوايته تربية الطيور الغريبة، وأنا الوحيد فيهم الكنت "نصيح" تعرف هوايتى كانت شنو ؟
جمع الحجار الملونة، تتذكر ال "ضراب" الزمان بنلعب بيه الفيش، بس زيه كده، وجمعت لى كمية مهولة منها، شى أخضر وشى أزرق وشى أحمر
كدى طمنى بالله، "مطعم الطربوش" لسه فى ولا برضو هدوه وبنو فى مكانه ناطحة؟
والمطعم ده يا ابوقوتة هو الكان مسرح الحكاية الإنت ما نسيتها دى، ذاكرتك خطيرة والله، ياخ أنا يمكن كتبت الموضوع ده قبل ست سنوات
كنا قاعدين فى المطعم وفى الطاولة القريب مننا كان فى مجموعة لبنانيين، قمة الأناقة وال "فل سوتس" وهم طبعا فاكرين نفسهم يا دنيا ما فيك إلا أنا، كانو بتكلمو عن فرقة "البيتلز" الإنجليزية وبذكرو فى أسماء أعضاء الفرقة الأربعة، اتذكرو جون لينون ورنقو ستار وبول مكارنتى والرابع نسوهو تب وغلبهم يتذكرو إسمه، أها أنا نطيت طوالى وقلت ليهم، جورج هاريس وزى كأنه صبت فيهم مطرة، أنى لهذا الفتى الأغبش معرفة البيتلز؟ اصرو إلا نجى ونقعد معاهم ويعزمونا شاى وقهوة، شفت المزيكا مهمة كيف، طلعنا بى عزومة ملح كنا كلنا زبائن يوميين فى الطربوش، وتانى يوم واحد اتذكر اسمه نديم الضاهر، جانى براهو وقال لى
اسمع أنا عايز امتحن الجماعة الليلة وأسألهم من إسم زوجة جون لينون اليابانية، وأنا كمان نسيته برضو، عشان اخليهم يعزمونى الليلة قلت ليهو خلاص أنا برضو حاسالك سؤال لو حليته تعزمنى انت برضو بكره وأنا اوريك إسم زوجة جون لينون، قلت ليه ، منو فى اعضاء البيتلزالكان بعزف الجيتار بى يده الشمال؟
يا ابوقوتة ياخ خليتنا نسرح فى حكايات ما ليها أى معنى
لكين على الأقل انعشت الذاكرة ورجعت لينا ريحة الأيام الحلوة
ايام كنا لا شايلين هم ولا عارفين بكره الجايينا
ثم
أقول قولى هذا وأحييك وأهديك المحبة
|
|
|
|
|
|
|
العنوان |
الكاتب |
Date |
ملامح (8) | أبوذر بابكر | 10-25-08, 06:30 AM |
Re: ملامح (8) | أبوذر بابكر | 10-26-08, 05:45 AM |
Re: ملامح (8) | محمد عثمان | 10-26-08, 09:07 AM |
Re: ملامح (8) | abuguta | 10-26-08, 10:59 AM |
Re: ملامح (8) | أبوذر بابكر | 10-26-08, 12:19 PM |
Re: ملامح (8) | أبوذر بابكر | 10-26-08, 11:59 AM |
Re: ملامح (8) | أبوذر بابكر | 11-03-08, 03:50 PM |
Re: ملامح (8) | محمَّد زين الشفيع أحمد | 10-26-08, 11:13 AM |
Re: ملامح (8) | أبوذر بابكر | 10-26-08, 03:34 PM |
Re: ملامح (8) | هاشم أحمد خلف الله | 10-26-08, 12:14 PM |
Re: ملامح (8) | عبد المنعم سيد احمد | 10-26-08, 04:16 PM |
Re: ملامح (8) | أبوذر بابكر | 10-28-08, 05:31 AM |
Re: ملامح (8) | أبوذر بابكر | 10-27-08, 03:07 PM |
Re: ملامح (8) | أبوذر بابكر | 10-28-08, 06:38 AM |
Re: ملامح (8) | أبوذر بابكر | 10-29-08, 08:21 AM |
Re: ملامح (8) | أبوذر بابكر | 11-02-08, 09:12 AM |
|
|
|