|
Re: وركعت اقبل امدرمان (Re: Mutwali Malik)
|
الشاعر الفاتح حمدتو عشقنا ترابا يا سودان زرعنا أمامنا في الأركان رسمنا حروفا بالألوان و كنا وكانت أم درمان عزيزة و غالية يا أم درمان
شعار شلناهو جيل عن جيل شعار ما بقبل التأويل سلام ممزوج بموية النيل بنور قرآنا و الإنجيل كتبنا فصولو في أم درمان
بديتي الوحدة بالأرحام و كنتي منارة الإسلام قبايل نحن عشنا كرام مع الأقباط هنود و شوام قسمنا اللقمة في أم درمان
و نهر النيل سعيد لاقاك وكان يا أم در بدايتو معاك نتوه في الدنيا ما بننساك و نرجع تاني ليك نرعاك نصون العشرة يا أم درمان
شتات الفرقة طعمو مسيخ أريت لو يرجع التاريخ تقيد نيرانا قبة و شيخ هلالنا يعانق المريخ نقول للدنيا دي أم درمان
تكون جلستنا جنب النيل تدق النوبة حمد النيل نشيل ألواحنا للترتيل و نمشي هناك نقيم الليل نضوق العافية في أم درمان
حضنتي خليل وود بطران وفيكي كرومة عاش فنان طربتي مع الأمين برهان و صوتك عم كل مكان إذاعة تقول هنا أم درمان
سلام للرقدو في البكري أمان في شرفي من بدري تروم ارواحنا ما بندري و ريدتك في العضام تسري محبة شديدة يا أم درمان
سلام يا أم در عظيمة الشان سلام يا أم در أرض شجعان سلام يا أم در كرم حيشان سلام يا أم در عشا الضيفان سلام يحميكي يا أم درمان سلام ينجيكي يا أم درمان سلام يا درة السودان
|
|
|
|
|
|
|
|
|