يا طلاب وخريجي جامعة جوبا وثقوا تجاربكم هنا..

Quote: الاخ / عبداللطيف طالما الكبار ما دايرين يتكلموا اخير نتكلم نحنا الصغار ( حلوة دى) رغم انه تجاربنا ما كتيرة لكن برضوا راى يمكن يوثق لفترة معينة طبعا الاكاديميات الشديدة وزحمة المحاضرات دى اول حاجة بتواجه طالب جامعة جوبا وبتذكر لما جينا برالمة للجامعة عرفونا بانه اى كليه من الكليات الخمس فيها (بعبع ) يعنى لازم تعملوا حسابكم منه وبالنسبة لناس اقتصاد كان البعبع ( جون مشيك ) الله يطراه بالخير وده استاذ المحاسبة - المهم فى السمستر الاول كان بدرسنا اصول المحاسبة وقام عمل لينا (تست) و صحح الكراسات ورجعها - الطريف انه كان بينده على اى طالب عشان يستلم كراسو طبعا الواحد قلبوا بيدق وحالة قلق وخوف شديد المهم نده على معظم الاسماء! واحتجز مجموعة من الكراسات ، وقال اى زول ما سمع اسمه يجينى بعد المحاضرة - طبعا انا كنت من ضمنهم ، وبعد داك طبعا ما استوعبت المحاضرة بتقول فى شنو؟ وبقيت اخد وادى يا ربي انحنا عملنا شنو عشان يحجز كراساتنا وليه احنا بالذات؟؟؟؟؟؟؟؟؟ . بعد المحاضرة طبعا بتعرف الناس البتهول ليك المواضيع وجوا يواسوا فينا واحنا بنرتعش من البعبع اللى حا نقابله وانا من غير مبالغة بقيت ابكى بكاء شديد وبقوا يحنسوا فينا المهم فى النهاية قشقنا دموعنا واستجمعنا القوى لجون مشيك ، فلما دخلنا عليه وجدت انه درجتنا كويسة وعالية كمان بس كان عنده ملاحظات بسيطة لصالحنا - المهم طلعنا من عنده ونحن ننفجر من الضحك وقلنا لنفسنا صحى برالمة والله