|
|
 شبكة خالتي حوة وحاجز اللغة
|
ها وليدات ، الشي خباركن ؟ لا هداية من الله ولا هداية من أبواتكن ؟ خباركن شاقين الديرة والدواير ؟ خباركن قاطعين الدرب وحامين الناس المرقة لي برة ؟
يقف وليدات التيوة مشدوهين ، هم يعرفون أن فطومة بت خالتي حوة جات سايقة حبوبتا العميانة ، والحبوبة عترت ووقعت وأمونة ما قدرت توقف حبوبتا ، والوليدات جوا عشان يساعدوها ، لكين أمونة بكت وجرت لي أمها .
شنو مالك يا حبوبة حوة ؟
ملالة الجمر يا يابا ، انا متين بقيت ليك حبوبة ؟ تحبك يا يابا مقرة إن شا الله .
هي كدي بالراحة آ حبوبة حوة ، نحن بتك ما سوينا ليها حاجة .
كدي ؟ دايرين تسووا ليها شنو أكتر من السويتوا ليها ؟ دايرين تسووها ليكن مرة عديل ؟
لا حولا ، حبوبة والله نحن ما سوينا ليها حاجة .
اسكت إت يا ود مريم ، إت بتنفع ؟ إت ما ترباية نسوان .
بس يا حبوبة والله نحن ما سوينا ليها حاجة .
كمان جيتني إت ، تب فوق خليقتك دي ، إت عارف بتي دي بتبقى ليك شنو ؟
مالي ما عارف ؟
نان وكت عارف مالك بتخلي الوليدات يتناهشوها زي الكلاب ورا وقدام ؟
لكين يا حبوبة والله الوليدات ديل ما هبشوها .
خبارا عاد جنت ؟ جاتني في البيت وقالت لي الوليدات جوني دايرين يساعدوني ويرفعوا معاي حبوبتي ، وكت ما قدروا قرصّوني وفاتوا .
والله يا حبوبة حوة نحن ما سوينا كدي ، نحن جينا نساعدا ، لما ما قدرنا رجعنا لي تيوتنا .
ترجع عليك أم هجيمة آ يابا ، بتي دي عمرا ما بتكضّب .
يسمع عبدالله ود أبو الجاك صاحب المنزل المجاور الحوار بين حوة ، ووليدات التيوة ، فيخرج إلهم :
ها ناس مالكن الليلة ، نعل ما في عوجة ؟ مالك آ حوة ؟ التيوة وصلتك في بيتك وللا شنو ؟
والله يا ريت آ عبدالله أخوي ، الوليدات ديل والله سوونا مضحكة ، ولعبوا بينا لعب .
كيفن ؟ ما لن شن سووا ؟
والله بتي جاتني تجري ودميعاتا يقطرن ، سعلتها ، قالت لي الوليدات يمة .
هي نان ما لن الوليدات سووا ليها شنو ؟
الوليدات آ عبد الله أخوي قليلين أدب ، ما مربيين .
يا زولة الوليدات ديل كلهن وليداتنا ما فيهن وليدن غريب .
بس آ عبدالله أخوي الوليدات يسووا بتي مضحكة ؟
هي لكين لي هسة ما وريتيني الوليدات سووا شنو لي بتك .
والله عبد الله أخوي الوليدات ديل ما تشوفن كدي ، ديل بيعرفوا المحن .
نعل ما مدوا إيدن عليها ؟
والله مدّوها ، والبنية خلت حبوبتا واقعة وجاتني جارية .
ها زول ، والله الكلام ده عيب عليكن ، ، ها جنيت دحين دي عملة الزول بيعملها ؟
والله يا خالي عبدالله نحن ما سوينا ليها حاجة ، بس هي براها متحيلة .
عاد متحيلة كيفن ؟
كمان بتقول علي بتي متحيلة ، يعني بتي قليلة أدب وما مربية ؟ والله إت قليل الأدب وأمك ما مربياك يا تربية النسوان .
والله يا خالي عبدالله المرة دي شبكة بس .
المر اليمرمرك آ يابا ، كمان سويتني مرة ، مالك ما بتعرفني خالتك ، وللا الليلة اتغابيت العرفة ؟
كدي آحوة خليني النشوف الوليدات وكلامن ، إتو آ وليدات وكت المرة دي وقعت جريتوا لي عندها ؟
آي والله جرينا قلنا نوقفا علي حيلا .
آها ، وتاني ؟
قدر ما جرّيناها ما قدرنا .
أها وتاني ؟
بس ، رجعنا لي لعبنا ، وما نشوف ليك إلا بت حبوبة حوة بقت تبكي وخلت حبوبتا وجرت البيت .
وإتي آ حوة شن خبرك بي سواة الوليدات ؟
أجي آ ود أمي ، أنا ما لي صغيرة ، البغباني شنو ؟
كيفن البغباك شنو ؟ شن شفتي ؟
ما قلت ليك آ عبد الله بنيتي جاتني تبكي .
نان الببكي كلو مظلوم ؟
عاد كان ما مظلومة الببكيها شنو ؟
ها زولة هوي ، أكان كدي ما عندك كلام . أمشوا آ وليدات العبوا لعبكن ، وإتي أخير لك تمشي بيتك .
كمان آ عبد الله جيت تمرقني جيابة كلام ؟
إتي آ حوة والله بتفتشي لي الفضايح ، هسة الكلام الزي ده الزول بيقولو ؟
خبارنا ، يقرصوا بنياتنا في الصقيعة ونسكت ليهن ؟
يا مرة والله إتي ماك براك ، قالوا ليك بتك دي ما في زولا هبشا . أمشي وخلي الوليدات يلعبوا في لعبن .
استمر الاشتباك ، ومر بالقرب من المشتبكين أستاذ أحمد الناظر :
مالكن ؟ في شنو آ جماعة ؟ في شنو آ عبدالله ؟
ما في شي آ حضرة الناظر ، حوة دي جابت ليها قولا ما بينقال .
مالك في شنو آ حوة ؟
والله آ حضرة الناظر هسة أنا بقيت مغيوزة من عبد الله ده .
عبد الله في شنو آ جماعة ما تفهمونا ؟
حوة قالت الوليدات ديل قرّصوا بتها .
كيف الكلام ده ؟
والله آ الناظر ، هسة متل الكلام ده في زولا عاقل بيقولوا ؟
كلام شنو ده يا حوة ؟
والله آ الناظر الوليدات ديل خاتيين وقاطعين الدرب .
وبتك الجابا للوليدات شنو ؟
بتي أنا آ الناظر تجي لي الوليدات ؟
نان شنو اللماهن علي بعض ؟
هن براهن جوها ، ومعاها حبوبتا .
يعني قصدك حالة تحرش جنسي ؟
قلت شنو ؟
آي دي حالة تحرش جنسي .
يا زول ها إت جيت من وين ، نحن جنسنا ما ياهو جنس ناس البلد ؟ نحن جنسنا مخالف ؟
لا يا حوة ، إتي ما فهمتيني .
الليلة مالكن كلكن بقيتوا تقولوا لي الكلام اللعوج ؟
لا لا ما في عوج آ حوة ، أنا بشوف الموضوع ده في المدرسة .
وإت قايل المعاك في المدرسة ديل بيعرفوا أحسن مننا جنس الناس ؟
كدي يا حوة إنتي خلي الموضوع ده علي ، وأنا بشوفو بي الراحة مع الأولاد .
تشوف شنو آ راجل ؟ إت ذاتك لا بتشوف ولا بتسمع .
خلاص يا حوة ، قلت ليك خلي الموضوع علي .
علة علتك آ يابا .
بكل غيظ الدنيا تنصرف حوة ، وهي تتحدث بصوت غير مسموع وتستمر هكذا إلى أن تدخل بيتها ، وهناك استقبلتها ابنتها الكبرى وهي تدرس بالثانوية ،،
شنو يمة ، مالك ؟ مشيتي وين ؟ ومالك جاية زعلانة ؟
أجي آ بتي ، ما شفتي السووا الوليدات في أختك ، وما سمعتي كلام ود أبو الجاك والناظر .
كمان الناظر ؟
آي ، والله ، ود أبو الجاك بيقول لي بتي كضابة ، والناظر بيقول لي إتو جنسكن كتر .
كيف، كيف ؟
آي والله آ بتي .
هن الوليدات سووا شنو لي أختي ؟
ما شفتيها جات تبكي وتقول وليدات التيوة قرصوني ؟
لا والله أنا كنت بذاكر ، ما سمعتها .
أها هسة عرفتي . شن قولك ؟
يا يمة يمكن الناظر قال ليك ده تحرش جنسي .
بس ، ياها دي كلمتو .
بس يمة ده ما معناهو نحن جنسنا مختلف من الناس .
نان معناتو شنو ؟
يمة دي حاجة إنتي ما بتعرفيها ، أقصد ما بتفهميها ، أقصد ...
أجي مالي اتعجمت ، ما بعرف الكلام ؟
لا بس الكلام ده معناهو ........
معناتو شنو يا بت ؟ ما تتكلمي .
يمة الجنس ده الحاجة البي تحصل بين المرة والراجل ،
أجي يا بت ؟ وإتي شن عرفك بيهو ؟
يمة ده كلام معروف .
تعالي عاد يا بتي ، من وين جبتيهو وإتي شن خبّرك بي الرجال ؟
يمة ده كلام عادي .
العد اليبلعك ، ما تقولي لي من وين جبتي الكلام ده .
يمة ده كلام معروف ، الناس دي كلها عارفاهو .
الناس ينيصوا ضبان ، إتي من وين جبتي الكلام ده ؟
يمة والله إنتي بالجد شبكة .
أجي آ يمة حليل أمي ديك الما عرفت سواة الرجال إلا بعد ما دخل عليها أبوي .
يمة إتي أفهمي الموضوع كده ، وخلي الناظر يشتغل شغلو مع الوليدات .
الوليدات طايرين والناظر ماسك في كرعينن ، وإتي وقرايتك تطيري معاهن .
|
|
 
|
|
|
|
|
| العنوان |
الكاتب |
Date |
| شبكة خالتي حوة وحاجز اللغة | ودقاسم | 02-11-04, 09:35 PM |
| Re: شبكة خالتي حوة وحاجز اللغة | ودقاسم | 05-09-04, 08:39 AM |
| Re: شبكة خالتي حوة وحاجز اللغة | مريم بنت الحسين | 05-10-04, 06:20 PM |
| Re: شبكة خالتي حوة وحاجز اللغة | ودقاسم | 05-10-04, 08:12 PM |
| Re: شبكة خالتي حوة وحاجز اللغة | صديق الموج | 05-10-04, 08:22 PM |
| Re: شبكة خالتي حوة وحاجز اللغة | ودقاسم | 05-10-04, 10:45 PM |
| Re: شبكة خالتي حوة وحاجز اللغة | lana mahdi | 05-10-04, 08:21 PM |
| Re: شبكة خالتي حوة وحاجز اللغة | حبيب نورة | 05-10-04, 10:49 PM |
| Re: شبكة خالتي حوة وحاجز اللغة | ودقاسم | 05-11-04, 08:21 AM |
| Re: شبكة خالتي حوة وحاجز اللغة | ودقاسم | 05-11-04, 07:48 AM |
| Re: شبكة خالتي حوة وحاجز اللغة | مريم بنت الحسين | 05-10-04, 11:20 PM |
| Re: شبكة خالتي حوة وحاجز اللغة | ودرملية | 05-10-04, 11:40 PM |
| Re: شبكة خالتي حوة وحاجز اللغة | ودقاسم | 05-11-04, 12:53 PM |
| Re: شبكة خالتي حوة وحاجز اللغة | lana mahdi | 05-11-04, 07:51 AM |
| Re: شبكة خالتي حوة وحاجز اللغة | yasiko | 05-11-04, 08:13 AM |
| Re: شبكة خالتي حوة وحاجز اللغة | ودقاسم | 05-11-04, 03:54 PM |
| Re: شبكة خالتي حوة وحاجز اللغة | Ali Alhalawi | 05-11-04, 05:02 PM |
| Re: شبكة خالتي حوة وحاجز اللغة | ودقاسم | 05-11-04, 10:18 PM |
| Re: شبكة خالتي حوة وحاجز اللغة | ودرملية | 05-11-04, 10:51 PM |
| Re: شبكة خالتي حوة وحاجز اللغة | طيفور | 05-11-04, 10:51 PM |
 Re: شبكة خالتي حوة وحاجز اللغة | haneena | 05-12-04, 04:34 AM |
| Re: شبكة خالتي حوة وحاجز اللغة | ودقاسم | 05-12-04, 09:51 PM |
| Re: شبكة خالتي حوة وحاجز اللغة | ودرملية | 05-12-04, 10:26 PM |
|
| |
ودقاسم
فيس بوك
تويتر
انستقرام
يوتيوب
بنتيريست