عاجل الشفاء للصديق ابي _يو كي ... وما يصيبك الا خير

الحبيب الرايق الهايج هوبلس عبدالرحمن
ألفين شكر على البوست وطلب الدعاء لي ، جزيت وأهلك خيرا ، لا أراك الله مكروهاأبدا وجعل لك من كل هم مخرجا
أما ذكرك السرير الأبيض ، فان آثار المرض جعلتني أظنه سرير العرس ، فقلت باين جمال دا فكت منو

عافاك الله من الجنون والمرض القالو كوستا، لأنو بجيب أي حاجه
أما عدم تكاثف الدعاء فللضريبة الذكورية الواجب دفعها


عزيزنا الحبيب كوستا
الله يعافيك ويعافي أهلك يا شاربا من الجمال
أما عن الصبر ، فوالله صابر حداشر سنه بس الحمد لله طبعا ، أهو مرات تزيد ومرات تخف ، وما معروف الأوجاع من شنو ، عشان كدا واحد من اتنين يا حاجه روحانيه ، يا تشخيصك أنو مرض حامد

جابو لي أمبارح بالليل دكتور باطنيه نسيبنا ، وبعد ما سمع و سمع ، قام ذكر أسباب كتيره محتمله ، وأضاف برضو أني ربما كان عندي حاجات عايز أحققها وما حققتها لفترة طويله ، قام أخوي الشافع السغير الخبيس فكا ليهو ضحكه غاظتني ، فبعد ما الدكتور مشى قام الوالد يثير الموضوع وسأل أخوي ضحكت مالك قبيل ؟ قام أخوي يحاكي صوت خطيبتي وطريقتها السريعه في الكلام تلميحا
فمعناتو حتى الشويفع بظن أنو دي أعراض مرض حامد

بس لو توررونا قصة حامد دا ، وحصلت متين في تاريخنا
وهل حـامـد عرس في الآخر ؟ وبقى نصيح وللا مات زي ما هو

aba الأخ
الله يسلمك ويسلم ليك حباب وساره وجعفر وأمهم
وان شاء الله دعاك يستجاب أنو الناس يكونو مع بعض سودانيين فعلا ويتفقدو بعض ، أهو برضو ربما تكون والله أعلم نوع من صلة الرحم اللي قال عنها ربنا أنو من وصلها وصلته
وبعد ما الحاره تزول ، نقوم نرجع للكوماج تاني


elsharief الأخ
الله يبارك فيك وفي أهلك ويحف بيتكم بالملائكه