قمرية باضت فرختين............................إبراهيم عبد العزيز عثمان-الدوحة...

Quote: قمرية باضت فرختين قمرية باضت فرختين فرخة بتحب الوطن وأهل السودان عيشة الجروف وموية الحيضان وحتي لو جاد الزمن بوشه بالزيت والسمن ومرة جوعة بنص بطن لكنه في آخر المطاف ديه ما عيشة الوطن لو كان خريف، لو كان جفاف راضية بحكم المصير عرض اللحاف طول السرير راضية بالكون والقِسم واللقمة لازم تنقسم بين الكبير وفم الصغير ***** قمرية باضت فرختين فرخة بتحب العشش عش قديم أو عش جديد راضية بأحوال الزمان وفرخة تتطلع بعيد!! عايزة تخدم لليهود والأمريكان قرفانة من عيشة "العبيد"! في بيت مكندش عاز تبيت تشرب عصير ويسكي ونبيت تاكل فلكس وبرتكان وتحلي كستر وبسكويت لكنه في آخر الزمان شربت مقالب الأمريكان شبعت لماضة ومسخره "يا nigger خليك وره لكبيرنا امسحي ليه الدموع ولصغيرنا دايبر وقسطره روحي أوقدي للشموع نحن في عيد اليسوع يا sitter خليكي زي المسطره" شربت مقالب الأمريكان شبعت لماضة ومسخره وفي آخر الزمن عادت تفتش عن وطن!! ***** قمرية باضت فرختين فرخة بتحب العشش عش قديم أو عش جديد وفرخة تتطلع بعيد وفي آخر الزمن رجعت تفتش عن وطن " أهلا.. حبابك يا مره للبوشه للزيت والسمن كل الأمور متيسره ما تعضي اصبع للندم ما تشيلي هم مستورة لو بنص بطن واللقمة لازم تنقسم نرضي بحكم المصير نرضي بالكون والقِسم واليصير لابد يصير واليطير يسرح بعيد مصيره يرجع للوطن" !