نـــظرية الحاجات وتـطور البتاعات ..!!

حميدة

و هناك رواية أخرى يرويها أحد الممسكين بتلابيب الغربة حد الإختناق ..
و هو من الذين عندما جاء إلى ميناء جدة قال للعسكري : أنا جاي نهائي لغاية ما ربك يهونا بي هناك..
و من يومها لم يفكر حتى في الحصول على تأشيرة خروج و عودة و بالتالي فهو ضد فكرة خروج نهائي ..

هذا التِلِبْ .. المكنكش في صحراء ( الضبوبة : جمع ضَب .. و هو زاحف صحراوي يقول عنه البدو أنه بطعم السمك الفيليه ... ما علينا ) ... قال و هو يغازل شعراته البيضاء :

أول بالتبادي لما جيت هني ..
قلت أعرس لي مرة .. و أبني لي بيت و أشتري لي لوري سفنجة و أتوكل على الله ...
المرة الأولانية ما نفعتْ
وكت عرفت إنها ما بتنفع معاى .. كان جابت لى خمسة جنُّون ( الجنون جمع تكسير جنيات و مفردها جنا و في رواية زينب أن معناتا جنا يجن جنا فهو مجنن ناس البيت )
أها عرست التانية ..
قامت الأولى عملتْ ليها عمل ..
فمرضتْْ و كدة .. رجعتَ الأولانية .. قامت التانية فكت العمل و رجعتْ للخدمة تاني ..
أها المقاول أكل كل قروشي و إغترب ليبيا ...
أها لملمت قريشات من تاني و إشتريت لوري قلاب ..
أخو مرتي التانية .. قلب بالقلاب الهوبة .. إتزوج منو و بنى بيت في المايقوما و إشترى ليهو تكسي مرخس.
مرتي اللي هي أختو عملت ليها توكيل قلت ليها بيعي القلاب ..
باعت القلاب و إشترتْ بيهو أحفض مالك و غوايش ثعبان و ختَم ماركة أديس أبابا و ختتْ الدهب دة كلو عند خالتها الشفة .. و قالت لى القروش سرقوهن في المحطة الوسطى ..
خالتها تشيل القريشات و تديهن رشوة لواحد هي ميتة فيهو موت و هو مطنشا ..
أها أتزوجا شهرين بس .. و فرتق القضارف يتاجر بباقي القريشات في العيش
لملمتَ لى حبة قريشات .. و رسلتهن لي أخوى ال جا من البلد و سكن الكلاكلة اللفة.
إشترى لى بيت في الشقلة .. و بنى لى فيهو سور جالوص و سكن فيهو واحد غرباوي بيبيع فحم ..
بعد فترة أخوى ضرب لى تلفون قال لى القطعة حقتك مشيت لقيت في زول باني فيها و شدرتو يقوقي فيها القمري بطن حوشو و رابط ليهو كلب قدام البيت سنونو حُمُر .. و قال لى أمشي شوف ليك ناقة أحلبا ..
أها حسع جاني إحباط ..
لاني قادر أقعد هني لأنو وفروني من الشغل بعد موت كفيلي ..
ولاني قادر أرجع لأنو بيت ما عندي ..
و نسواني الإتنين قاعدات عند أهلهن ..

تقول لي حاجات و تطور بتاعات ؟

(عدل بواسطة ابو جهينة on 05-08-2006, 06:47 AM)
(عدل بواسطة ابو جهينة on 05-08-2006, 06:49 AM)