محمد حامد جمعة تور بقر الجواميس الرقادن لخ

Quote: غايتو يا كمندان ضحكتني جنس ضحك، ما خليت فيني مصران. الفيلم بتاعك قبل شوييية ما كان مدوِّر في أمان الله: البجي بساطور بنلاقيهو بساطور، والبجي بأم عشرة بنلاقيهو براجمة وألا بشنو ما بعرفو. أها مالك قلبت (انحننكم) و(اتمسكن ليكم). هوببااا من قناة (الأكشن) طوالي لقناة (دريمز) وألا (رومانتيك)! ياخي بالغت! شخصياً بلاحظ ليك في بوستاتك إنّك فاهم سايكلوجي الإنسان السوداني بشكل لا بأس به، عارف وين تخلف ليه الشتم، ووين ترفع ليه المناحة!؟ ومعاك ناس تانين برضو، مثلاً من بوستات السايكلوجي السوداني البوست بتاع الأستاذ الطقي، يا أخوانا قريبي لطشتو دانة، وقريبك منو؟ قريبي قائد عسكري كبير حارس الإذاعة، ويجوك الجماعة الطيبين، كفارة يا الطقي، كفارة يا زول، إن شاء الله يقوم لوليداتو. يتلّب محمّد حامد جمعة (بعد أن يضع –جانباً- شعار الساطور لمن تسوطر علينا، والبندقية لمن يتسلّح في وجهنا) ويقعد ينيييص، هددوني، قالوا لي بنكتلك، وأنا بمشي للشركة وواك واك واك، خليل صعبٌ علينا لا نقدر عليه وحدنا، نريدكم تتعاطفوا معنا، تساعدونا يعني، بالفيها الساهلة أنصرونا في الزنقة دي، الزنقة دي حقتنا كلّنا، وأولاد الغرب جوا عشانكم يا جلابة. هووووووووي يا ود جمعة، دكتور خليل دا كان جرسكم قدر كدي لموا ليهو أهلو من الخلاء دا وهو براهو تاني بتلم. أركز يا كمندان ومافيش داعي للرومانسية جوّه خط البارود، الفتحتو ببوستك براااك. أركز يا كمندان وبلّغ تحياتي لعمر البشير وقوليهو محسن خالد قال ليك وين الحي بيك الأيامات دي (ينقصنا عدم رؤياكم الغالية) قول ليهو: يا جنرال أرفع صلبك من الواطـة وكفاك دفن دقن، خليل قَدَّ سلك ومرقها في تشاد. تنقرش قلت لي في السايكلوجي السوداني، داير الطيبين ناس ندين ونشجب ونستنكر. هوووووي يا الطيبين، إنتو مفتكرين روحكم الناس ديل بطيروا من وشكم بلا أم اللفخ دي، والله فالحين.