ما بين عزاز شامي وامنة مختار... مالكم كيف تحكمون؟؟؟؟؟

Quote: طيب يا رشا قبال ما نضرب راسنا بالحيطة بتاعتك دي .. إنت ليه بتتعامي عن بعض الساءات وبتطلعي حكيمة في بعض الأمور .. أول حاجة لي علمك قبال راسنا ما ينضرب بالحيطة ,, عزاز انا تحجديدا ما جيت داخل علشان ادافع عنها ولا من عادتي بين اخواتي بدخل بيناتن .. لكن في حال انو اي واحده هنا تتعرض للظلم من اي واحد من الناس التافهه اللافه هنا دا .. وعامله فيها مناضلة وتصنف على كيفه .. والله ما بيعجبني الوضع والحمد لله عبرت عن شعوري كتير جدا في الوقت الما بنشوفك بي حكمتك دي فيهو .. يعني اختذلتي المسالة في انها صراع بين اتنين .. طيب قبال ما يظهر الحاصل دا وتقعدي تعايني للناس ديل ما كان تديني تبارك شيخ الدين للعملو مع عزاز دا .. قبال ما تجي تفتشي ليك مبررات غريبه جدا لي آمنة مختار والظاهر عليها عايزه ليها اي مدخل علشان تقول اي كلام في اي شخص ما عاجبه وما تتورع في انها تقول الكلام دا لي اي زميلة هنا .. بس بي فهم انها جلابية .. والفكرة دي مسيطرة عليها .. لحدي الآن اتنين من الأخوات .. ياربي لو بكره اتقلب الأمر عليك في اي خلاف ح نلقى نفس حكمتك ونفس حيطتك المايلة الكان ضربناها ليك بي دماغنا ممكن نهدها ليك على راسك برضو ..؟ ما عايزنك تخجلي يا رشــا .. لكن مرة واحده بس .. ما تلمي الناس في كرتونة واحده المخطي على المصيب .. وتصرفي ليهم البعجبك من توصيات ..

Quote: انا ما بتشتفزني إلا جنس الكتابات دي.. يجي ابو ساندرا يقول ليك و(لآمنة السلام والحب والإحترام) وماعارف(المكتظ بالفهم والإستعلاء الذكوري وبالعنف والقسوة) وتجي رشا وتقول ليك (اخت لك..) و(اخوتنا الرجال هنا (سامحهم الله) هسي الرجال مالم.. ماياهو دي بت جات قات ليكي انا قليلة ادب وما متربية .. وجات ورتنا فهم قلة الادب وعدم التربية... وطرشت لينا من معين اصلها .. الرجال ذنبهم هسي شنو؟!! تجي انتي تقولي سامحنا الله ويجي ابو ساندرا يقول الاستعلاء الذكوري والبطيخ الاحمر.. انتو شيوعين معقدين وعندكم جن بتاع استعلاء وذكورة طايرة ليكم وماعارفين محلها وين ولا قصتكم شنو بالضبط.. بت بتنبذ في بت .. مال هذا الموضوع ومال الذكورة والاستعلاء ومسامحة الرجال.. ده كوم والكوم التاني ياستي رشا.. ياخي البت قات ليها انتي تحرشتي بي جنسياً وانتي وانتي وانتي وشالت وكيلت ليها من كل اصـول اللارباية نبذة.. تجي تقولي ليها (اخت لك).. الخوة دي غيروها؟؟ غيروها هي؟؟ خوة شنو يا رشا ؟؟انتي بتستفزينا ولا القصة شنو؟؟ بتستهتري بي قيم الشتيمة المالحة دي ولا عالمك بلغ درجة من الوردية وبقيتي ما تفرزي الكلام؟؟ قذف (قليلات الادب) والشتايم دي ما واقعة ليك ولا بتستهتري بي مشاعر (بنات الاصول)؟؟

بعد اذن زوار البوست.. سابتدر ردودي بالاخوين تمبس ودكين..

اولا, انا ما ملزمة بتكثيف وجودي في البورد وتنصيب نفسي حكيمة قرية اوز في كل خلاف يحدث وكل شاردة وواردة, حتى يتم تصنيفي من المقسطين والحكماء الذين تقبل شهادتهم..

لم اكن متواجدة بالمنبر ولا اتابع الكثير مما يحدث.. ما استفزاني حقا هو هذا الهجوم البشع من غالبيتكم.. ولا واحد فيكم ما بهدي التاني.. نعم امنة غلطت في حق عزاز.. خلاص يعني.. فجرت.. استحقت القتل والشنق والتنكيل!!!! ما عندها طريقة تستتاب بها مرة واحدة في هذا الامر ولا اقول ثلاثا؟؟؟

اهلنا في المثل قالوا الحسنة معطت شارب الاسد.. يعني لما امنة او اكس من الناس يقول كلمة سيئة في حق واحد تاني ونجي احنا نقبقبو طوالي من تلابيبو وهاك يا جلد فاكيد لا حيرجع هو للحق ولا حيرجع للزول النبذو حقو...

لو كنتو اكتفيتو بالادانة واتعاملتو معاها زي ما اتعاملتو مع علاء حيمورة.. تفتكروا كانت حتلقى نفسها مضطرة لانها ترد ليكم بالاسلوب دا؟؟؟؟ ما هدا علاء قال كلام سيء في حق امنة.. كتبتو شنو؟؟ "كدا ما صاح يا علاء" "الكلام دا ما بشبهنا يا علاء" "احذف لو سمحت".. وفعلا.. استجاب علاء لمناشداتكم وحذف العبارات الطلعت منو ساعة غضب...
كنتو حتخسرو شنو لو اتعاملتو مع امنة بنفس الاسلوب دا؟؟؟؟
وما بالكم انها ممن قال فيهن عليه الصلاة والسلام "ما اكرمهن الا كريم وما اهانهن الا لئيم"


ويا دكين.. البت نبذت البت.. البت الاتنبذت دي ما عندها ايدين ولا كيبورد ترد بيهن؟؟
ثم انو انت الراجل الدخلك شنو في نبذ النسوان؟؟؟
لما يتعرض لعزاز راجل زيك.. ابقى سل سيفك وامرق معاو الخلا اضبحو من الاضان للاضان.. لكن شفتنتك دي ما تعملا علي بت زيها وزي عزاز..

وبتهيأ لي عزاز ست الحق فضلت الصمت.. تفتكروا فضلت الصمت ليه؟؟؟؟ ما اظن عشان عاجباها الولولة البتعملو انتو فيها دي.. حسب معرفتي بعقل عزاز من خلال كتاباتا, فهي اكيد فضلت الصمت من باب انها ما تكبر المشاكل وانو الانزلاق للحتات دي ما بشبها ولا بشبهنا كلنا.. وعلي قول اهلنا "التقماك اقماها"..

يعني ببساطة عزاز عرفت تاخد حقها من امنة بانها صمتت عن اساءاتا وكسبت بذلك حسنات.. ولو كنتو انتو برضو اتلهيتو علي عينكم وسكتو كانت امنة برضو سكتت وما زاد اللغو والكلام الفارغ والحبل الميت بتاع قالت عن نفسها وبطيخ المسكت انت هسي فيو دا..

وبعدين اي انسان يتعرض للرباطية وحركات القرصنة العملتوها لامنة دي كان حيقول ليكم كدا.. يااااخ هو ربنا حلل للمسلمين يقولوا لكفار قريش احنا صبئنا لمن يشتد بيهم التعذيب






__________

حكمة اليوم..

الجفلن خلهن اقرع الواقفات...