تهديد بالقتل والتصفية ( اثبات حالة )

Quote: الأخ محمد سلام أسلوب التهديد مدان بأي صورة وعلى أي حال كان . وده أسلوب جبان , وأقول لمن هدد أن يقرأ كلام محمد حامد جمعة الذي أبان فيه أنه لن ينكسر ولن يجري أويبكي أو يترجاك عشان تبقي على حياتو ، وقد أشهدنا على ذلك ، وإني لمن الشاهدين .. وكان فضلت فيك ذرة من الرجولة واجه الذي هددته بالقتل أيها الجبان .. أها ود جمعة جاك عديل وأعلنها أمام الجميع ، وقال ليك ما خايف منك ، وكان راجل تعال ، أها ورينا رجالتك وتعال ليهو.. ياهو ده نضالكم ؟؟ دي فلاحتكم؟؟ عجزتو عن مواجهة قلمو ، قلتو أحسن نهددو بالقتل؟؟ ونعم النضال والله .. محمد حامد جمعة أعلنها من خلال كتاباته أنه انقاذي ، من حقه أن يكون ما يشاء ، علي كيفو ياخ يكون انقاذي والا يكون مايوي والا يكون شيوعي زاتو ، ومن حق الآخرين أن يكونوا أيضاً يا أيها (المناضلون) أتمنى أن يأتيني أحدكم/ن بدليل (حقيقي) يقنعني أن الشاويش / العميد/جنابو/الأمنجي/ مستشار عمر البشير لشؤون الأمن ، الفريق محمد حامد جمعة شغال في الأمن ، عشان نخلص من الاسطوانة المشروخة دي ، ونعقد محاكمة اسفيرية هنا ده ونقتص منو القديم والجديد.. ما محتاجين لشرح وتبريرات ، وإستقاءات ، وقياسات ، عندكم دليل جيبوهو .. الغريبة انو الاشاعة أُطلقت هنا ، وصدقها من أطلقها .. كرهتونا ياخ ، أي زول عاوز يُوصف بالنضال والوطنية ومش عارف شنو ، يقوم يجي جاري لمحمد حامد جمعة .. ياخي سويتوها شينة وبايخة وما عندها طعم .. وفي الآخر كمان ، جابت ليها تهديد بالقتل والتصفية !! يا لبؤس نضالكم يا هؤلاء ..