|
احرمونى ولا تحرمونى محجوب شريف
|
احرمونى ولا تحرمونى سنه الاسلام السلام
المجد لله فى الاعالى وعلى الارض السلام
قدلة ا مولاى حافى حالق فى الطرق الشاقى الكلام
فى الفؤاد ترعاه العنايه ملأ روحى وعز المنام
لو هزمت بلملم غناي ما بخون وابيع الكلام
مابسلم شرف الدوّايه للهواجس وليل الخصام
غير ذلك ماعندي غاية غير ذلك بئس الختام
منى شايف شابت مفارق مانى خاين ولا انهزام
العزايم قط لم تفارق ولامانى تماما التمام
ولو علىّ انا بس مابفارق الدوام لله الدوام
توهنا بين هواة الفوارق ياخى ديلك ناساً هوام
كم وكم هم فى القلب عالق وكم جرح تحت المسام
المسالك صبحت مهالك والحلال فى يد الحرام
والبخونك لا شك هالك البيجيبك فى جنح الظلام
نحن منك ما من هنالك ايها الشعب الهمام
نحن منك ما من هنالك مستحيل نقبل تضام
يا حفيف انفاس البيارق فى الشوارع ودفء الزحام
مشتهينك مالك مفارق لفتة منك تشفي السقام
كنت ساهل يا أبويّ ماهل وكل دربا بى ناسو آهل
يا حنونا دافئ المناهل مالو زولك ممكون وناحل
وانت عندك يابا السواحل والسهول غاباتك مراحل
الشمس والنيل والغمام
ياجلوسا تحت الارائك والمسدس تحت الحزام
كل مايك ولا سلك شايك بين جموع الناس والكلام
حصلوهم حتى الاجنّه وصلوهم عتبة سجّنا
كنتو انساً
ام كنتو جناً
الكلام المافيهو انة بوضوح النبرة المرنه سوف نصمد مهما حزنّا
والليالى لكى تمتحنا علمتنا مسكن الاعنه
لو نلاقى الموت سنه . . سنه
كل قطرة دم تبقى حنه
والببايع قط ليس منّا والبخون الشهدا الكرام
احرمونى ولا تحرمونى
|
|
|
|
|
|